ຮອງປະທານສະພາແຫ່ງຊາດ ຢ້ຽມຢາມ ແລະ ແລກປ່ຽນບົດຮຽນຢູ່ຫວຽດນາມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 29 ຄັ້ງ | ເວ​ລາ | 2024-10-12 08:05:22 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 0000-00-00 00:00:00

ຄະນະຜູ້ແທນສະພາແຫ່ງຊາດລາວ ນຳໂດຍສະຫາຍ ສົມມາດ ພົນເສນາ ກຳມະການສູນກາງພັກ ຮອງປະທານສະພາແຫ່ງຊາດ ໄດ້ຢ້ຽມຢາມ ແລະ ແລກປ່ຽນບົດຮຽນຢູ່ ສສ ຫວຽດນາມ ຕາມການເຊື້ອເຊີນຂອງສະຫາຍ ຫງວຽນ ດຶກ ຫ້າຍ ກຳມະການສູນກາງພັກກອມມູນິດຫວຽດນາມ ຮອງປະທານສະພາແຫ່ງຊາດ ຫວ່າງບໍ່ດົນມານີ້, ໂດຍໄດ້ພົບປະສອງຝ່າຍຢູ່ນະຄອນດາໜັງ ຊຶ່ງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມືລະຫວ່າງສອງອົງການນິຕິບັນຍັດ ນັບແຕ່ຂັ້ນສູນກາງຮອດຂັ້ນທ້ອງຖິ່ນ, ການຢ້ຽມຢາມຄັ້ງນີ້ ເປັນການສືບຕໍ່ຈັດຕັ້ງຜັນຂະຫຍາຍປະຕິບັດຕາມເນື້ອໃນບົດບັນທຶກຊ່ວຍຈໍາວ່າດ້ວຍການຮ່ວມມືລະຫວ່າງສະພາແຫ່ງຊາດສອງປະເທດ; ສອງຝ່າຍໄດ້ປຶກສາຫາລືຮ່ວມກັນກ່ຽວກັບກົນໄກການຮ່ວມມືຂອງສະພາແຫ່ງຊາດ, ບັນດາກຳມາທິການ, ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ຂະແໜງການຂອງລັດຖະບານ ໂດຍສະເພາະອົງການກວດສອບແຫ່ງລັດ, ບັນດາກະຊວງຂົງເຂດເສດຖະກິດ ໃຫ້ນັບມື້ແໜ້ນແຟ້ນຍິ່ງໆຂຶ້ນ ພ້ອມທັງສະເໜີທິດທາງການຮ່ວມມືຂອງສອງສະພາແຫ່ງຊາດໃນຕໍ່ໜ້າ ໂດຍສຸມໃສ່ການຂຽນປຶ້ມຄົບຮອບ 50 ປີ ການພົວພັນຮ່ວມມືລະຫວ່າງສະພາແຫ່ງຊາດລາວ ກັບ ສະພາແຫ່ງຊາດຫວຽດນາມ, ຊຸກຍູ້ການພົວພັນຮ່ວມມື ພົບປະແລກປ່ຽນບົດຮຽນຂອງສອງນະຄອນຄື ນະຄອນ-ຫຼວງພະບາງ ແລະ ນະຄອນໂຫ້ຍອານ ແຂວງກວາງນາມ, ການຕິດຕາມກວດກາຊຸກຍູ້ສົ່ງເສີມການລົງທຶນຂອງບັນດາຫົວໜ່ວຍທຸລະກິດທີ່ມາລົງທຶນຢູ່ ສປປ ລາວ ແລະ ສສ ຫວຽດນາມ, ຄົ້ນຄວ້າ ແລະ ນໍາໃຊ້ທ່າແຮງທີ່ອໍານວຍຄວາມສະດວກທາງດ້ານແລວເສດຖະກິດຕາເວັນອອກ ໂດຍເລັ່ງໃສ່ການພັດທະນາທ່າເຮືອວຸ້ງອາງ ແລະ ດ່ານນາມຢ່າງ ຊຶ່ງເປັນຍຸດທະສາດເຂດແຄ້ວນລະຫວ່າງບັນດາແຂວງພາກໃຕ້ຂອງ ສປປ ລາວ ແລະ ບັນດາແຂວງພາກກາງຂອງ ສສ ຫວຽດນາມ ເພື່ອຂັບເຄື່ອນທາງດ້ານເສດຖະກິດ ແລະ ບົດຮຽນການຈັດຕັ້ງປະຕິບັດພາລະບົດບາດຂອງອົງການກວດສອບ ໃນການແກ້ໄຂຜົນຂອງການກວດສອບໄດ້ຢ່າງມີປະສິດທິພາບ ແລະ ປະສິດທິຜົນ ເພື່ອປະຕິບັດ 3 ເສົາຄໍ້າ ແລະ 8 ມາດຕະການຂອງອົງການຕົນ; ພ້ອມດຽວກັນນີ້, ສອງຝ່າຍຍັງໄດ້ເປັນເອກະພາບຊຸກຍູ້ສະໜັບສະໜູນ ຊຶ່ງກັນແລະ ກັນໃນເວທີພາກພື້ນ ແລະ ສາກົນ ໂດຍສະເພາະສະໜັບສະໜູນສະພາແຫ່ງຊາດລາວໃນການເປັນເຈົ້າພາບຈັດກອງປະຊຸມ AIPA ຄັ້ງທີ 45 ທີ່ນະຄອນຫຼວງວຽງຈັນ ໃນເດືອນຕຸລາຈະມາເຖິງນີ້.

ການພົບປະແລກປ່ຽນບົດຮຽນລະຫວ່າງຄະນະຜູ້ແທນສະພາແຫ່ງຊາດສອງປະເທດໃນຄັ້ງນີ້ ເປັນການຮັດແໜ້ນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ນັບເຂັ້ມແຂງທັງລວງກວ້າງ ແລະ ລວງເລິກ.

ນອກຈາກນີ້, ສະຫາຍ ສົມມາດ ພົນເສນາ ແລະ ສະຫາຍ ຫງວຽນ ດຶກ ຫ້າຍ ຍັງໄດ້ຮ່ວມກັນເປັນປະທານກອງປະຊຸມສຳມະນາຫົວຂໍ້ສະເພາະ “ບົດບາດຂອງສະພາແຫ່ງຊາດ ໃນການສ້າງ ແລະ ຜັນຂະຫຍາຍນະໂຍບາຍພັດທະນາເສດຖະກິດ-ສັງຄົມ” ທີ່ນະຄອນດາໜັງ.

ໃນວັນທີ 7 ກັນຍາ ທີ່ນະຄອນຫຼວງຮ່າໂນ້ຍ, ຄະນະຜູ້ແທນສະພາແຫ່ງຊາດລາວ ໄດ້ຢ້ຽມຢາມ ແລະ ເຮັດວຽກກັບອົງການກວດສອບແຫ່ງລັດ ພາຍໃຕ້ຫົວຂໍ້ “ຍົກສູງບົດບາດ ແລະ ປະສິດທິຜົນໃນການເຄື່ອນໄຫວຂອງອົງການກວດສອບແຫ່ງລັດຫວຽດນາມ” ໂດຍແມ່ນສະຫາຍ ໂງ ວັນ ຕວັນກຳມະການສູນກາງພັກ ປະທານອົງການກວດສອບແຫ່ງລັດ ພ້ອມດ້ວຍຄະນະໃຫ້ການຕ້ອນຮັບ ແລະ ເຮັດວຽກຮ່ວມກັບຄະນະຜູ້ແທນລາວ. ສະຫາຍຮອງປະທານສະພາແຫ່ງຊາດລາວ ຕີລາຄາວ່າການພົບປະແລກປ່ຽນບົດຮຽນໃນຄັ້ງນີ້ ເຮັດໃຫ້ຄະນະຜູ້ແທນທີ່ເຂົ້າຮ່ວມ ກໍາໄດ້ບົດຮຽນຂອງເພື່ອນກ່ຽວກັບການອອກ ແລະ ການປະຕິບັດນະໂຍບາຍການດຶງດູດການລົງທຶນຈາກຕ່າງປະເທດ, ນະໂຍບາຍເສດຖະກິດລວມສູນ, ແຜນແມ່ບົດແຫ່ງຊາດໃນການຈັດຕັ້ງປະຕິບັດນະໂຍບາຍສິນເຊື່ອເພື່ອພັດທະນາເສດຖະກິດ-ສັງຄົມຢູ່ບັນດາ ເຂດພູດອຍຫ່າງໄກສອກຫຼີກ ແລະ ການເສີມຂະຫຍາຍບົດບາດຂອງອົງການກວດສອບໃນການປະກອບສ່ວນຍົກສູງບົດບາດສະພາແຫ່ງຊາດ, ຍົກສູງປະສິດທິພາບ ແລະ ປະສິດທິຜົນຂອງການແກ້ໄຂຜົນການກວດສອບ ແລະ ມາດຕະການຈັດຕັ້ງປະຕິບັດ.

ພ້ອມກັນນັ້ນ, ຄະນະຜູ້ແທນລາວ ແລະ ຫວຽດນາມ ຍັງໄດ້ຢ້ຽມຢາມກຸ່ມບໍລິສັດຫຸ້ນສ່ວນ ເຈື່ອງຫ້າຍ (Truong Hai-THACO), ເຂດເສດຖະກິດເປີດ ຈູລາຍ (Chu Lai), ລັດວິສາຫະກິດຕັດຫຍິບ ຮວ່າເຖາະ (Hòa Thọ), ເຂດທີ່ໝັ້ນການປະຕິວັດລາວໃຕ້ ແລະ ຮ່ອງຮອຍປະຫວັດສາດທາງດ້ານວັດທະນະທໍາ; ພົບປະສະຫາຍ ເລືອງ ຫງວຽນ ມິ່ງ ຈ໋ຽດ ກຳມະການສໍາຮອງສູນກາງພັກ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງແຂວງກວາງນາມ; ພົບປະສະຫາຍ ຫງວຽນ ວັນ ກວາງ ກຳມະການສູນກາງພັກ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງນະຄອນດາໜັງ ແລະ ຢ້ຽມຢາມສະຖານກົງສູນໃຫຍ່ປະຈໍານະຄອນດາໜັງ. ພ້ອມດຽວກັນນີ້, ຮອງປະທານສະພາແຫ່ງຊາດລາວ ໄດ້ເຊື້ອເຊີນສະຫາຍ ຫງວຽນ ດຶກ ຫ້າຍ ຮອງປະທານສະພາແຫ່ງຊາດຫວຽດນາມ ໄປຢ້ຽມຢາມ ແລະ ພົບປະແລກປ່ຽນບົດຮຽນທີ່ ສປປ ລາວ ໃນເວລາອັນຄວນ.

(ຂ່າວ-ພາບ: ສພຊ)