ສປປ ລາວ ບໍ່ພົບຜູ້ຕິດເຊືຶ້ອພະຍາດໂຄວິດ-19 ຕິດຕໍ່ກັນ 15 ວັນແລ້ວ

​ເຜີຍ​ແຜ່​ໂດຍ: admin|ຢ້ຽມ​ຊົມ: 14 ຄັ້ງ | ເວ​ລາ | 2024-12-05 02:00:35

ໃນວັນທີ 27 ເມສາ 2020, ຄະນະສະເພາະກິດ ຕ້ານ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ໄດ້ຖະແຫລງຢືນຢັນຕື່ມອີກເປັນມື້ ທີ່ 15 ຕິດຕໍ່ກັນທີ່ ສປປ ລາວບໍ່ພົບຜູ້ຕິດເຊື້ອພະຍາດໂຄວິດ-19 ເພີ່ມຂຶ້ນ ໂດຍມີການເກັບຕົວຢ່າງມາກວດທັງໝົດ 61 ຄົນ, ໃນນັ້ນ ຜູ້ມີອາການສົງໄສມາກວດຢູ່ໂຮງໝໍ 5 ຄົນ, ບຸກຄົນທົ່ວໄປທີ່ບໍ່ມີອາການ 27 ຄົນ, ແຮງງານລາວທີ່ກັບມາຈາກປະເທດໄທ 29 ຄົນ ຊຶ່ງຜົນກວດທັງໝົດ 61 ຄົນ ບໍ່ພົບເຊື້ອ. ທ່ານ ດຣ. ລັດຕະນະໄຊ ເພັດສຸວັນ, ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ເປີດເຜີຍວ່າ: ສຳລັບການຕິດຕາມ ຢູ່ສະຖານທີ່ຈຳກັດບໍລິເວນຂອງແຂວງ ແລະ ຜູ້ຈຳກັດບໍລິເວນຢູ່ເຮືອນ ລວມທັງຜູ້ເດີນທາງມາຈາກຕ່າງປະເທດ, ມາຮອດວັນທີ 26 ເມສາ 2020 ທົ່ວປະເທດ ຍັງມີສູນຈໍາກັດບໍລິເວນ ທັງໝົດ 193 ສູນ, ມີຜູ້ຈຳກັດບໍລິເວນ 899 ຄົນ, ຈໍາກັດບໍລິເວນຢູ່ເຮືອນ 599 ຄົນ, ເກັບຕົວຢ່າງມາກວດວິເຄາະຫາເຊື້ອ 492 ຄົນ ຊຶ່ງທັງໝົດບໍ່ພົບເຊື້ອ. ສ່ວນການຕິດຕາມປິ່ນປົວຄົນເຈັບຢູ່ໂຮງໝໍ ປັດຈຸບັນ ມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍພຽງແຕ່ 12 ຄົນ; ໃນນັ້ນ, ຢູ່ໂຮງໝໍແຂວງຫລວງພະບາງ ມີ 1 ຄົນ ເປັນເພດຊາຍ, ເຫັນວ່າມີອາການຂັ້ນເບົາ ບາງ ແລະ ຍັງຕິດຕາມປິ່ນປົວຕາມຫລັກວິຊາການຕໍ່ໄປ ແລະ ຢູ່ໂຮງໝໍມິດຕະພາບ 150 ຕຽງ ມີ 11 ຄົນ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມປິ່ນປົວຕາມອາການຕື່ມອີກ. ເຖິງວ່າ ສປປ ລາວ ບໍ່ພົບກໍລະນີຜູ້ຕິດເຊື້ອເພີ່ມເປັນໄລຍະເວລາຕິດຕໍ່ກັນ 15 ວັນແລ້ວ ແຕ່ເຈົ້າໜ້າທີ່ ຂະແໜງການທີ່ກ່ຽວຂ້ອງຍັງບໍ່ໄດ້ລົດລະ ຫລື ຍົກເລີກລະບຽບ, ມາດຕະການໂດຍໄດ້ຮຽກຮ້ອງໃຫ້ພໍ່ແມ່ປະຊາຊົນບັນດາເຜົ່າສືບຕໍ່ປະຕິບັດມາດຕະການຮັກສາອະນາໄມ ຮຽກຮ້ອງໃຫ້ເພີ່ມຄວາມເຂັ້ມງວດໃນການຮັກສາອະນາໄມພາຍໃນຄອບຄົວຂອງຕົນຄື: ໝັ່ນອະນາໄມປັດກວາດເຮືອນ-ຊານ, ທີ່ພັກພາອາໄສ, ສໍານັກງານ ຫ້ອງການ, ຮ້ານຄ້າ, ຊຸບເປີມາກເກັດ ມີເຫລົ້າ 90 ຫລື ເຢວລ້າງມື ປະຈໍາຮ້ານຂອງຕົນ, ໝັ່ນລ້າງມືເປັນປະຈໍາ, ໃສ່ຜ້າອັດປາກ-ດັງ, ຮັກສາໄລຍະຫ່າງໃນການຢູ່ຮ່ວມກັນ 1-2 ແມັດ ເພື່ອຫຼີກລຽງການຕິດເຊື້ອ ແລະ ຫລີກລ່ຽງ ຕ້ານການແພ່ລະບາດຂອງພະຍາດດັ່ງກ່າວບໍ່ໃຫ້ມີອີກຮອບທີສອງ. ຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດ COVID-19 ຍັງໄດ້ຊີ້ໃຫ້ເຫັນວ່າ: ການຮ່ວມແຮງ ຮ່ວມໃຈໃນການປະຕິບັດມາດຕະການຕ້ານສະກັດກັ້ນການແພ່ລະບາດ ຂອງພະຍາດດັ່ງກ່າວ ແມ່ນມີປະສິດທິຜົນ ແລະ ໄດ້ຮຽກຮ້ອງມາຍັງພໍ່ແມ່ປະຊາຊົນບັນດາເຜົ່າສືບຕໍ່ປະຕິບັດຄືດັ່ງທີ່ໄດ້ແນະນໍາໄປແລ້ວ ເພາະວ່າ ມາຮອດປັດຈຸບັນ ພໍ່ແມ່ປະຊາຊົນໄດ້ມີພື້ນຖານໃນການປະຕິບັດມາດຕະການດັ່ງກ່າວ ແລະ ເຮັດໄດ້ດີພໍສົມຄວນ ແລະ ໃຫ້ສືບຕໍ່ປະຕິບັດໃຫ້ກາຍເປັນຄວາມຊີນເຄີຍ ການປະຕິບັດດັ່ງກ່າວຍັງບໍ່ພຽງແຕ່ແມ່ນການປ້ອງກັນການແຜ່ເຊື້ອພະຍາດ COVID-19 ແຕ່ຍັງເປັນການປ້ອງກັນພະຍາດອື່ນໆ ທີ່ອາດເກີດຂື້ນຕາມລະດູການຕ່າງໆ. ມາຮອດວັນທີ 27 ເມສານີ້ ຈໍານວນຜູ້ຕິດເຊື້ອ COVID-19 ຕົວເລກຜູ້ຕິດເຊື້ອຍັງຄົງທີ່ ຈໍານວນທັງໝົດ 19 ຄົນ ແລະ ໄດ້ຮັບການປີ່ນປົວດີ ແລະ ໄດ້ອອກໂຮງໝໍແລ້ວ 7 ຄົນ.
ເປັນຫຍັງຈຶ່ງສາມາດເວົ້າໄດ້ວ່າ ຍຸດທະສາດຕ້ານໂຄວິດຂອງລັດຖະບານລາວຖືກຕ້ອງສອດຄ້ອງທີ່ສຸດ? ພວກເຮົາມາໄລ່ລຽງເຫດການນຳກັນດັ່ງນີ້:
1. ເມື່ອລາວເຮົາບໍ່ທັນພົບກໍລະນີຜູ້ຕິດເຊື້ອ, ລັດຖະບານກໍໄດ້ສຶກສາ ຄົ້ນຄ້ວາ ສະຖານະການແຜ່ລະບາດຂອງພະຍາດໃນໂລກ ແລະ ພາກພື້ນຢ່າງໃກ້ສິດ ແລະ ຍັງໃຫ້ສັງຄົມເຄື່ອນໄຫວໄດ້ເປັນປົກກະຕິ ເຖິງແມ່ນເວລານັ້ນ ບັນດາປະເທດໃກ້ຄຽງຈະມີການລະບາດແລ້ວກໍຕາມ.
2. ພາຍຫຼັງພົບເຫັນກໍລະນີຜູ້ຕິດເຊືອລາຍທຳອິດ ໃນວັນທີ 24 ມີນາ2020, ລັດຖະບານກໍຮີບຟ້າວຄົ້ນຄ້ວາປືກສາ ຫາລື ມາດຕະການສະກັດກັ້ນ, ຕ້ານ ແລະ ຄວບຄຸມພະຍາດດັ່ງກ່າວຢ່າງທັນທີ ດ້ວຍຄຳສັ່ງເລກທີ 06 /ນຍ ອັນເຂັ້ມງວດ ຂອງນາຍົກລັດຖະມົນຕີ, ລົງວັນທີ 29 ມີນາ2020. ໃນນັ້ນ: ໄດ້ສັ່ງປິດສະຖາບັນການສຶກສາທຸກລະດັບຊັ້ນ ທັງພາກລັດ ແລະ ເອກະຊົນໃນທົ່ວປະເທດ; ສັ່ງປິດສະຖານທີ່ການບໍລິການທີ່ບໍ່ຈຳເປັນຈຳນວນໜຶ່ງ; ຫ້າມເຕົ້າລວມຊຸມນຸມຫຼາຍຄົນ ນັບທັງການຄົມມະນາຄົມຂົນສົ່ງສາທາລະນະ, ຢຸດເຄື່ອນໄຫວທາງລັດຖະການ ປຸກລະດົມໃຫ້ເຮັດວຽກຢູ່ເຮືອນ ແລະ ແຕ່ງຕັ້ງປະຈຳການ; ປິດປະເທດ(Lockdown) ປຸກລະດົມປະຊາຊົນໃຫ້ປະຕິບັດໄລຍະຫ່າງທາງສັງຄົມ(ຢູ່ເຮືອນ) ເຖິງວັນທີ 19 ເມສາ2020.
ແຕ່ພໍມາເຖິງວັນທີ 15 ເມສາ2020 ລັດຖະບານ ແລະ ຄະນະສະເພາະກິດ ໄດ້ປະເມີນ ຕີລາຄາສະພາບການລະບາດຂອງພະຍາດຢູ່ໃນພາກພື້ນ ແລະ ໃນໂລກ ເຫັນວ່າຍັງມີຄວາມຮຸນແຮງຂຶ້ນ ເລື້ອຍໆ, ມີຜູ້ຕິດເຊື້ອ ແລະ ເສຍຊີວິດເປັນຈຳນວນຫຼວງຫຼາຍ. ລັດຖະບານລາວຈື່ງໄດ້ເລື່ອນ(ຍືດ)ເວລາອອກໄປຕື່ມອີກຈົນເຖິງວັນທີ 3 ພຶດສະພາ2020.
3. ໃນຊ່ວງໄລຍະລໍຖ້າເຖິງວັນທີ 3 ພຶດສະພາ2020 ນັ້ນ, ລັດຖະບານກໍໄດ້ເລັ່ງຄົ້ນຄ້ວາມາດຕະການ ນະໂຍບາຍ ແກ້ໄຂໃຫ້ປະຊາຊົນ, ຊາວຜູ້ອອກແຮງງານ(ນັບທັງຢູ່ໃນລະບົບ ແລະ ບໍ່ຢູ່ໃນລະບົບ), ພາກທຸລະກິດນ້ອຍ, ໃຫ່ຍທັງພາກລັດ ແລະ ເອກະຊົນທີ່ໄດ້ຮັບຜົນກະທົບຈາກ ການລະບາດຂອງພະຍາດ ໂຄວິດ-19 ຢ່າງເປັນຮູບປະທຳ ທັນການທາງດ້ານທິດສະດີ ແລະ ຈະສືບຕໍ່ຈັດຕັ້ງປະຕິບັດໄລຍະຕໍ່ໄປຢ່າງແນ່ນອນ.
4. ກະກຽມຄວາມພ້ອມທຸກຢ່າງໃຫ້ແກ່ການຜ່ອນຜັນມາດຕະການເປີດປະເທດຄືນໃໝ່ພາຍຫຼັງວັນທີ 3 ພິດສະພາ2020ນີ້ ໃຫ້ກັບມາເຄື່ອນໄຫວເປັນປົກະຕິ ຖ້າສະຖານະນະການລະບາດຂອງພະຍາດໂຄວິດ19ຫາກຜ່ອນຄາຍລົງ ອາດຈະເປັນການຜ່ອນຜັນເປັນບາງມາດຕະການ ຫຼື ອາດຈະປົດລ໊ອກດາວ ທັງໝົດກໍເປັນໄດ້(ລໍຖ້າການປະກາດຂອງລັດຖະບານໃນວັນທີ 3 ພືດສະພານີ້). ເມື່ອມາລຳດັບເບິ່ງເຫດການດັ່ງກ່າວຂອງລັດຖະບານແລ້ວເຫັນວ່າ ມີຄວາມສອດຄ່ອງເໝາະສົມກັບສະຖານະການແຕ່ລະໄລຍະ, ມີການວາງແຜນລ່ວງໜ້າທຸກບັນຫາ ແລະ ທັນການທີ່ສຸດ. ພວກເຮົາປະຊາຊົນລາວທຸກຖ້ວນໜ້າ ຈົ່ງເຊື່ອໝັ້ໜການນຳພາຂອງພັກ ແລະ ລັດຖະບານ. ແຕ່ອັນທີ່ສຳຄັນທີ່ສຸດກໍຄື ເມື່ອມີເຫດການໃດເກີດຂື້ນກໍຕາມ ຄວາມສາມັກຄີຂອງປະຊາຊົນທັງຊາດ ບວກກັບແນວທາງທີ່ຖືກຕ້ອງ ແມ່ນປັດໃຈທີ່ສຳຄັນທີ່ຈະເອົາຊະນະໄດ້ທຸກຢ່າງໄດ້.

ແຫຼ່ງ: ກະ​ຊວງ ສາ​ທາ​ລະ​ນະ​ສຸກ