ຕີລາຄາການຈັດຕັ້ງປະຕິບັດວຽກງານວິຊາສະເພາະປະຈຳປີ 2023 ຂອງຂະແໜງພາສີທົ່ວປະເທດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 50 ຄັ້ງ | ເວ​ລາ | 2024-11-21 13:18:11

 

ກົມພາສີກະຊວງການເງິນໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະປະຈຳປີ 2023 ແລະ ກຳນົດທິດທາງແຜນການ, ມາດຕະການປະຈຳປີ 2024ຂອງຂະແໜງພາສີທົ່ວປະເທດຂຶ້ນໃນວັນທີ 14 ທັນວາ 2023  ທີ່ສູນການຮ່ວມມືສາກົນ ແລະ ຝຶກອົບຮົມ ICTC ນະຄອນຫຼວງວຽງຈັນ ໂດຍການເປັນປະທານຂອງທ່ານ ສັນຕິພາບ ພົມວິຫານລັດຖະມົນຕີກະຊວງການເງິນ, ມີທ່ານ ພູເຂົາຄຳ ວັນນະວົງໄຊ ຫົວໜ້າກົມພາສີ, ມີຫົວໜ້າພາສີປະຈໍານະຄອນຫຼວງວຽງຈັນ-ແຂວງ,ຫົວໜ້າດ່ານພາສີສາກົນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ພູເຂົາຄຳ ວັນນະວົງໄຊ ກ່າວວ່າ: ກອງປະຊຸມໃນຄັ້ງນີ້ຈັດຂຶ້ນເພື່ອເປັນການສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະປະຈຳປີ2023 ແລະ ກຳນົດທິດທາງແຜນການ ແລະ ມາດຕະການປະຈຳປີ 2024 ຂອງຂະແໜງພາສີຊຶ່ງການຈັດເກັບລາຍຮັບໃນປີ 2023 ກົມພາສີໄດ້ຮັບແຜນຈັດເກັບລາຍຮັບ 10,476 ຕື້ກີບ,ປະຕິບັດໄດ້ 11,624 ຕື້ກີບ ເທົ່າກັບ 110,97% ຂອງແຜນການປີທຽບໃສ່ໄລຍະດຽວກັນເພີ່ມຂຶ້ນ 34,19% ເທົ່າກັບ2,962 ຕື້ກີບ. ໃນນັ້ນລາຍຮັບທີ່ເກີດຂຶ້ນໃໝ່ມີຄື: ຈາກການເກັບພັນທະຄ່າບໍລິການຕູ້ສິນຄ້າທາງລົດໄຟຜ່ານເຂດທ່າບົກ-ທ່ານາແລ້ງ11,9 ຕື້ກີບ ແລະ ຈາກການເກັບຄ່າພາສີຂາອອກປະເພດແຮ່ທາດ 95,8 ຕື້ກີບ. ມາຮອດວັນທີ 11 ທັນວາ 2023 ປະຕິບັດໄດ້ 12.144 ຕື້ກີບ ເທົ່າກັບ 115% ຂອງແຜນການປີ.ໝົດປີ 2023 ຈະສູ້ຊົນໄດ້ 12.571 ຕື້ກີບ ຫຼືເທົ່າກັບ 120% ຂອງແຜນການປີ ຫຼືລື່ນແຜນ 2.095ຕື້ກີບ.
ໃນໂອກາດນີ້, ທ່ານ ສັນຕິພາບ ພົມວິຫານ ໄດ້ໃຫ້ກຽດໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ, ຂະແໜງກົມພາສີທີ່ສາມາດບຸກບືນເຮັດລ້ອນໜ້າທີ່, ບັນລຸຕາມແຜນທີ່ວາງໄວ້ໃນໄລຍະ 1 ປີຜ່ານມາ. ເພື່ອສ້າງຄວາມເຂັ້ມແຂງໃຫ້ວຽກງານດັ່ງກ່າວ, ຂະແໜງພາສີຄວນເອົາໃຈໃສ່ໃນການຈັດຕັ້ງປະຕິບັດເປັນຕົ້ນ:1. ໃຫ້ຄະນະນໍາພາສີແຕ່ລະຂັ້ນເອົາໃຈໃສ່ຕໍ່ບັນຫາການເມືອງແນວຄິດຂອງພະນັກງານ,ສ້າງພະນັກງານໃຫ້ມີຄຸນທາດການເມືອງໜັກແໜ້ນ, ສ້າງວັດທະນາທຳອົງກອນໃຫ້ມີຄຸນນະທຳ ແລະ ຈາລິຍະທຳ,ມີຄວາມສະເໝີພາບ, ສ້າງຂະແໜງພາສີໃຫ້ກາຍເປັນອົງການສືບສວນ-ສອບສວນທີ່ເຂັ້ມແຂງ;2. ໃນໜຶ່ງປີຜ່ານມາໄດ້ມີການປັບປຸງກົງຈັກການຈັດຕັ້ງຂອງຂະແໜງພາສີຕາມພາລະບົດບາດໃນຂໍ້ຕົກລົງເລກທີ 2059/ກງ ສຳເລັດ, ຜ່ານການຈັດຕັ້ງປະຕິບັດໃນຊຸມປີຜ່ານມາ ບັນດາທ່ານເຫັນອັນໃດຍັງບໍ່ທັນສອດຄ່ອງຄວນປັບປຸງຄືນເປັນຕົ້ນໂຄງປະກອບກົງຈັກພາສີຢູ່ຂັ້ນທ້ອງຖິ່ນ ແລະພະແນກການຂອງກົມພາສີ, ການແບ່ງຄວາມຮັບຜິດຊອບ,ກົນໄກປະສານງານ,ຂອບເຂດສິດ ແລະ ອື່ນໆ, ຮີບຮ້ອນໃຫ້ສໍາເລັດໂດຍໄວ; 3. ວຽກບຸກຄະລາກອນ, ການກຽມພ້ອມກັບບັນຫາການຂາດແຄນບຸກຄະລາກອນໃນຊຸມປີຕໍ່ໜ້າຂອງຂະແໜງພາສີ, ການຖ່າຍທອດບົດຮຽນປະສົບການ, ການສືບທອດປ່ຽນແທນມີແຜນຄືແນວໃດ, ດັ່ງທີ່ຮູ້ກັນວ່າ ປັດຈຸບັນບຸກຄະລາກອນຂອງຂະແໜງພາສີກຳລັງຢູ່ໃນໄລຍະດັດສົມທາງດ້ານຈຳນວນ ແລະ ຄຸນນະພາບ.ສະນັ້ນ, ກອງປະຊຸມຄັ້ງນີ້ສະເໜີໃຫ້ຄົ້ນຄວ້າ ແລະ ກໍານົດທິດທາງແຜນການຈັດສັນບຸກຄະລາກອນ ແລະ ການພັດທະນາບຸກຄະລາກອນໃຫ້ມີຄວາມຊັດເຈນ,ຈະແຈ້ງ ແລະ ຖືກທິດຄື: ຫັນພະນັກງານ-ລັດຖະກອນພາສີໃຫ້ມີທັກສະຂັ້ນສູງ ແລະ ເປັນມືອາຊີບ, ມີສະຕິຄວາມຮັບຜິດຊອບສູງ, ມີຈັນຍາບັນ-ຈັນຍາທຳສູງພ້ອມທັງດຳເນີນການຖ່າຍທອດບົດຮຽນ-ປະສົບການ, ແຜນການ, ການສືບທອດປ່ຽນແທນໄປພ້ອມໆກັນ; 4. ວຽກນິຕິກໍາໃຫ້ທົບທວນຄືນບັນດານິຕິກໍາທີ່ອອກຜ່ານມາ ເຫັນລະບຽບການໃດທີ່ບໍ່ທັນສອດຄ່ອງ, ພາໃຫ້ເກີດມີຊ່ອງຫວ່າງຮົ່ວໄຫຼໃນການຈັດເກັບລາຍຮັບເຂົ້າງົບປະມານ ຫຼືມີລັກສະນະບໍ່ສົ່ງເສີມການດຳເນີນທຸລະກິດແມ່ນໃຫ້ຮີບຮ້ອນຄົ້ນຄວ້າ,ປັບປຸງ ອັດໃຫ້ໄດ້ທຸກຊ່ອງຫວ່າງ ແລະ ແກ້ໄຂທຸກຂອດອຸດຕັນ;5. ວຽກງານການອໍານວຍຄວາມສະດວກທາງດ້ານການຄ້າ ການຈັດຕັ້ງປະຕິບັດແຜນງານຜູ້ປະກອບການເອອີໂອຂອງ ສປປລາວ ມີຄືແນວໃດໃນປີ 2024, ມີຈຸດໃດທີ່ຈະຕ້ອງປັບປຸງຕື່ມດ້ານນິຕິກຳ, ສາມາດເປີດໃຫ້ຜູ້ປະກອບການອື່ນເຊັ່ນ: ຜູ້ບໍລິການແຈ້ງພາສີ, ຜູ້ບໍລິການສາງ, ຜູ້ຂົນສົ່ງເຂົ້າຮ່ວມໂຄງການໄດ້ບໍ່ ເພື່ອສ້າງໃຫ້ໂຄງການນີ້ມີຄວາມເປີດກວ້າງ ແລະ ຫຼາກຫຼາຍທີ່ນອກເໜືອຈາກນໍາເຂົ້າ ແລະ ສົ່ງອອກ, ເປັນໄປໄດ້ບໍ່ຈະໃຫ້ໄດ້ຢ່າງໜ້ອຍ 3 ບໍລິສັດໃນປີໜ້າ. ນອກຈາກນັ້ນ, ວຽກງານ AEO MRA ການຮັບຮູ້ເຊິ່ງກັນ ແລະ ກັນຂອງລັດຖະການພາສີ ກ່ຽວກັບຜູ້ປະກອບການເອອີໂອໄດ້ດຳເນີນການຄືແນວໃດ; 6. ວຽກງານການຮ່ວມມືກັບສາກົນ: ການປະເມີນຄືນກອບການຮ່ວມມືທາງພາສີຮ່ວມກັບພາກພື້ນ ແລະ ສາກົນມີຄືແນວໃດ ແລະ ການກະກຽມເປັນເຈົ້າພາບກອງປະຊຸມອາຊຽນທີ່ ສປປລາວ ເປັນເຈົ້າພາບໃນປີ 2024 ທີ່ຕິດພັນກັບກົມພາສີລາວມີຄວາມພ້ອມຄືແນວໃດ;7. ວຽກງານສືບສວນ-ສອບສວນ ແລະ ປາບປາມ: ໃຫ້ພ້ອມກັນຄົ້ນຄວ້າກຳນົດທິດທາງ ແລະ ມາດຕະການວຽກງານດັ່ງກ່າວໃຫ້ມີຈຸດສຸມ ແລະ ວິທະຍາສາດ, ຫັນວຽກງານສືບສວນ-ສອບສວນໄປສູ່ຄວາມເຂັ້ມແຂງ ແລະໃຫ້ບຸກຄົນ,ນິຕິບຸກຄົນມີສ່ວນຮ່ວມໃນວຽກງານຕ້ານ ແລະ ສະກັດກັ້ນການລັກລອບໜີພາສີນັບມື້ໃຫ້ສູງຂຶ້ນ. ໃນນັ້ນ, ວຽກງານກວດສອບຄືນການແຈ້ງພາສີເປັນມາດຕະການໜຶ່ງທີ່ມີບົດບາດສຳຄັນ, ເພື່ອກວດສອບການຈັດຕັ້ງປະຕິບັດກົດໝາຍ ແລະ ລະບຽບການທາງພາສີຕໍ່ບໍລິສັດນຳເຂົ້າ-ສົ່ງອອກ ແລະ ຜ່ານແດນ, ທັງເປັນການເກັບກຳຂໍ້ມູນ. ດັ່ງນັ້ນໃຫ້ສືບຕໍ່ເອົາໃຈໃສ່ຄົ້ນຄວ້າ,ປຶກສາຫາລືໃນຕໍ່ໜ້າຈະເຮັດແນວໃດ ໃຫ້ວຽກນີ້ມີຄວາມໜັກແໜ້ນ ແລະ ເຂັ້ມແຂງ; ວຽກງານຄຸ້ມຄອງການແຈ້ງພາສີ; ການສົ່ງເສີມການສົ່ງອອກ ແລະ ການລົງທຶນ; ວຽກງານຫັນພາສີເປັນທັນສະໄໝ ແລະ ວຽກກວດກາ-ກວດການໃຫ້ສືບຕໍ່ເອົາໃຈໃສ່ຕິດຕາມກວດກາ-ກວດການ ການຈັດຕັ້ງປະຕິບັດວຽກງານວິຊາສະເພາະແລະ ການລະເມີດຫຼັກຈັນຍາບັນ-ຈັນຍາທໍາຂອງພະນັກງານ ແລະ ເຈົ້າໜ້າທີ່ພາສີ,ຖ້າພົບເຫັນກໍລະນີລະເມີດໃຫ້ຮີບຮ້ອນຄົ້ນຄວ້າ ແລະ ຊອກວິທີແກ້ໄຂໃຫ້ທັນການ ຕາມກົດໝາຍ ແລະ ລະບຽບການຢ່າງເຂັ້ມງວດສົ່ງເສີມຄົນດີ,ຄົນເກັ່ງ ແລະ ແກ້ໄຂຄົນເສຍທາດຂາດຄຸນ.
ຂ່າວ-ພາບ: ວັນເພັງ