ກອງປະຊຸມລະດັບສູງຂອງໜ່ວຍງານຄວບຄຸມຢາເສບຕິດຄັ້ງທີ 18

​ເຜີຍ​ແຜ່​ໂດຍ: admin|ຢ້ຽມ​ຊົມ: 55 ຄັ້ງ | ເວ​ລາ | 2024-11-21 13:17:53

ຫ້ອງການກວດກາແລະ ຄວບຄຸມຢາເສບຕິດກົມໃຫຍ່ຕຳຫຼວດກະຊວງປ້ອງກັນຄວາມສະຫງົບຮ່ວມກັບສະ
ຖານເອກອັກຄະລັດຖະທູດແຫ່ງປະເທດອົສຕຣາລີປະຈຳ ສປປ ລາວແລະ ອົງການສະຫະປະຊາຊາດ ເພື່ອຄວບຄຸມຢາເສບຕິດ ແລະ ຕ້ານອາຊະຍາກໍາປະຈຳ ສປປ ລາວ ໄດ້ຈັດກອງປະຊຸມລະດັບສູງຂອງຂະແໜງການຄວບຄຸມຢາເສບຕິດຄັ້ງທີ 18 ປະຈຳປີ 2023 ຂຶ້ນໃນວັນທີ 7 ທັນວາ 2023 ທີ່ໂຮງແຮມແລນມາກ ພາຍໃຕ້ການເປັນປະທານຮ່ວມຂອງທ່ານ ພົນຕີ ກິ່ງ ຜຸຍຫຼ້າມະນີວົງ ຮອງລັດຖະມົນຕີຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ(ປກສ) ແລະ ທ່ານ ໂພລ ແຄລີເອກອັກຄະລັດຖະທູດປະເທດອົສຕຣາລີ ປະຈຳສປປ ລາວປະທານກຸ່ມບັນດາປະເທດທີ່ໃຫ້ການຊ່ວຍເຫຼືອ ເພື່ອຄວບຄຸມຢາເສບຕິດໃຫ້ແກ່ ສປປ ລາວ, ມີທູຕານຸທູດ, ຜູ້ຕາງໜ້າອົງການຈັດຕັ້ງສາກົນ,ບັນດາກະຊວງທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ຮັບຟັງການລາຍງານສະພາບບັນຫາຢາເສບຕິດຂອງ ສປປລາວ, ພາກພື້ນ ແລະ ສາກົນຈາກການລາຍງານຂອງພາກສ່ວນທີ່ກ່ຽວຂ້ອງທັງພາຍໃນ ແລະ ຕ່າງປະເທດ ຊຶ່ງເຫັນວ່າບັນຫາຢາເສບຕິດໄດ້ເພີ່ມຂຶ້ນທາງດ້ານປະລິມານແລະ ຖືກລັກລອບລໍາລຽງຂົນສົ່ງຜ່ານ ສປປ ລາວ ໄປຍັງປະເທດທີ 3 ຢ່າງໜ້າເປັນຫ່ວງ. ກອງປະຊຸມຍັງໄດ້ທົບທວນຄືນການຈັດຕັ້ງປະຕິບັດວຽກງານກວດກາ ແລະຄວບຄຸມຢາເສບຕິດໃນປີຜ່ານມາປະກອບດ້ວຍວຽກງານໂຄສະນາສຶກສາອົບຮົມ, ວຽກງານບຳບັດ-ປິ່ນປົວຜູ້ຕິດຢາເສບຕິດ, ວຽກງານສະກັດກັ້ນ ແລະ ເຝົ້າລະວັງ, ການລັກລອບປູກຝິ່ນຄືນໃໝ່ຂອງປະຊາຊົນໃນບາງທ້ອງຖິ່ນ, ການປະຕິບັດໂຄງການພັດທະນາຊົນນະບົດທົດແທນການປູກຝິ່ນ, ສະພາບການລັກລອບຊື້-ຂາຍ, ລໍາລຽງຂົນສົ່ງຢາເສບຕິດ, ວຽກງານປະຕິບັດມາດຕະການທາງດ້ານກົດໝາຍ ແລະ ວຽກງານສຳຄັນອື່ນໆ.ພ້ອມດຽວກັນນັ້ນ, ກອງປະຊຸມຍັງໄດ້ປຶກສາຫາລື ແລກປ່ຽນບົດຮຽນເພື່ອຊອກຫາມາດຕະການ ແລະ ວິທີການເໝາະສົມ ເພື່ອແນໃສ່ເຮັດໃຫ້ການປະຕິບັດແຜນການສະກັດກັ້ນ ແລະ ແກ້ໄຂບັນຫາຢາເສບຕິດໃນຕໍ່ໜ້າໃຫ້ນັບມື້ນັບໄດ້ຮັບຜົນດີພ້ອມທັງເປັນການປະກອບສ່ວນເຂົ້າໃນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ (2021-2023) ຂອງສປປ ລາວ.
ຂ່າວ-ພາບ: ພູວັນ