ມອບ-ຮັບໜ້າທີ່ ປະທານກຳມະບານລາວຜູ້ເກົ່າ-ຜູ້ໃໝ່

​ເຜີຍ​ແຜ່​ໂດຍ: admin|ຢ້ຽມ​ຊົມ: 55 ຄັ້ງ | ເວ​ລາ | 2024-11-21 13:21:31

ສູນກາງສະຫະພັນກຳມະບານລາວ (ສກລ) ໄດ້ຈັດພິທີມອບ-ຮັບໜ້າທີ່ເລຂາຄະນະບໍລິຫານງານພັກ ປະທານຄະນະບໍລິຫານງານ ສກລ ຜູ້ເກົ່າ ແລະ ຜູ້ໃໝ່ ລະຫວ່າງ ສະຫາຍນາງ ອາລີ ວົງໜໍ່ບຸນທຳ ກຳມະການສູນກາງພັກ ປະທານຄະນະບໍລິຫານງານ ສກລ ຜູ້ເກົ່າ ແລະ ສະຫາຍ ເລັດ ໄຊຍະພອນ ກຳມະການສູນກາງພັກ ປະທານຄະນະບໍລິຫານງານ ສກລ ຜູ້ໃໝ່ ຂຶ້ນໃນວັນທີ 9 ຕຸລາ 2023 ຜ່ານມາ ທີ່ ສກລ ໂດຍການເຂົ້າຮ່ວມເປັນສັກຂີພິຍານຂອງ ສະຫາຍນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ, ມີຮອງປະທານ ສກລ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.   
ໃນພິທີ, ທ່ານ ດອນ ໄພວົງ ຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນຜ່ານຄຳສັ່ງຂອງກົມການເມືອງສູນກາງພັກ ສະບັບເລກທີ 11/ກມສພ, ລົງວັນທີ 27 ກັນຍາ 2023 ວ່າດ້ວຍການຍົກ ຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່ ໂດຍເຫັນດີຍົກຍ້າຍ ສະຫາຍນາງ ອາລີ ວົງໜໍ່ບຸນທຳ ກຳມະ ການສູນກາງພັກ ເລຂາຄະນະບໍລິຫານງານພັກ ປະທານຄະນະບໍລິຫານງານ ສກລ ຜູ້ເກົ່າໄປຮັບໜ້າທີ່ໃໝ່ ຢູ່ສູນກາງສະຫະພັນແມ່ຍິງລາວ; ຜ່ານມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 349/ຄລສພ ລົງວັນທີ 27 ກັນຍາ 2023 ວ່າດ້ວຍການແຕ່ງຕັ້ງຄະນະບໍລິຫານງານພັກ ສກລ ໂດຍຕົກລົງແຕ່ງຕັ້ງ ສະຫາຍເລັດ ໄຊຍະພອນ ກຳມະການສູນກາງພັກ ເປັນຄະນະບໍລິຫານງານພັກ ສກລ; ມະຕິຕົກລົງກົມການເມືອງສູນກາງພັກ ສະບັບເລກທີ 23/ກມສພ, ລົງວັນທີ 27 ກັນຍາ 2023 ວ່າດ້ວຍການແຕ່ງຕັ້ງເລຂາຄະນະບໍລິຫານງານພັກ ສກລ ໂດຍຕົກລົງແຕ່ງຕັ້ງ ສະຫາຍ ເລັດ ໄຊຍະພອນ ກໍາມະການສູນກາງພັກ ເປັນເລຂາຄະນະບໍລິຫານງານພັກ ປະທານ ສກລ ຜູ້ໃໝ່.
ໂອກາດນີ້, ສະຫາຍນາງ ສີໃສ ລືເດດມູນສອນ ໄດ້ມີຄຳເຫັນບາງຕອນວ່າ: ການມອບ-ຮັບໜ້າທີ່ໃນຄັ້ງນີ້ ສຸດທີ່ມີຄວາມໝາຍສໍາຄັນໃນການສັບປ່ຽນພະນັກງານຍຸດທະສາດ, ພະນັກງານຂັ້ນສູງຂອງພັກເຂົ້າຄຸ້ມຄອງ, ບັນຊາໃນແຕ່ລະວຽກງານ ໂດຍອີງຕາມຫຼັກການຄຸ້ມຄອງ, ສັບຊ້ອນພະນັກງານຂັ້ນສູງຂອງພັກ, ທັງອີງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກໃນໄລຍະໃໝ່ ລວມທັງມາດຕະຖານເງື່ອນໄຂຂອງພະນັກງານນຳພາຂັ້ນສູງຂອງພັກ-ລັດ ຊຶ່ງຜ່ານມາພັກເຮົາໄດ້ດຳເນີນການສັບຊ້ອນພະນັກງານນຳພາຫຼັກແຫຼ່ງຢ່າງເປັນປົກກະຕິທັງຢູ່ສູນກາງ ແລະ ທ້ອງຖິ່ນ ທັງເປັນຫຼັກການອັນໜຶ່ງຂອງພັກ ເພື່ອຮັບປະກັນລັກສະນະສືບທອດຕໍ່ເນື່ອງໃນການປະຕິບັດໜ້າທີ່ການເມືອງໃນແຕ່ລະຂົງເຂດ ກໍຄືການປັບປຸງວຽກງານໃນແຕ່ລະໄລຍະ. ສໍາລັບສະ ຫາຍນາງ ອາລີ ວົງໜໍ່ບຸນທຳ ທີ່ຖືກຍົກຍ້າຍໄປຮັບໜ້າທີ່ໃໝ່ຢູ່ສູນກາງສະຫະພັນແມ່ຍິງລາວ ຈົ່ງສືບຕໍ່ເສີມຂະ ຫຍາຍບົດຮຽນການນຳພາ, ບັນຊາຮ່ວມກັບໝູ່ຄະນະນຳໄປໝູນໃຊ້ເຂົ້າໃນການຄຸ້ມຄອງ, ບັນຊາ, ນຳພາວຽກງານຂົງເຂດສູນກາງສະຫະພັນແມ່ຍິງລາວໃຫ້ນັບມື້ດີຂຶ້ນ. ສຳລັບ ສະຫາຍ ເລັດ ໄຊຍະພອນ ທີ່ຖືກແຕ່ງຕັ້ງເປັນເລຂາຄະນະບໍລິຫານງານພັກ ປະທານ ສກລ ຜູ້ໃໝ່ນີ້ ເຊື່ອວ່າໃນການຄຸ້ມຄອງນຳພາໃນຕໍ່ໜ້າ ຈະສືບຕໍ່ເສີມຂະຫຍາຍຜົນງານຜ່ານມາຂອງ ສກລ, ສາມາດເຮັດໃຫ້ວຽກງານດັ່ງກ່າວມີຜົນສຳເລັດນັບມື້ດີຂຶ້ນເປັນກ້າວໆ.
(ຂ່າວ-ພາບ: ວັນເພັງ)