ອຸດົມໄຊ ປະກາດບົ່ງຕົວແຕ່ງຕັ້ງບຸກຄະລາກອນຂອງສະມາຄົມນັກທຸລະກິດໜຸ່ມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 42 ຄັ້ງ | ເວ​ລາ | 2024-11-21 13:20:41

ພິທີປະກາດບົງຕົວແຕ່ງຕັ້ງ ບຸກຄະລາກອນຂອງສະມາຄົມນັກທຸລະກິດໜຸ່ມແຂວງອຸດົມໄຊ ໄດ້ຈັດຂຶ້ນ ໃນວັນທີ 6 ຕຸລາ 2023 ຜ່ານມາ ທີ່ຫ້ອງປະຊຸມຫ້ອງວ່າການແຂວງອຸດົມໄຊ ໂດຍການເປັນປະທານຂອງທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ, ມີຄະນະບໍລິຫານງານຊາວໜຸ່ມແຂວງ, ຄະນະສະມາຄົມນັກທຸລະກິດໜຸ່ມແຫ່ງຊາດ, ຈາກພະແນກການ ອົງການທີ່ກ່ຽວຂ້ອງເຂົ້າຮ່ວມ. 
ໃນພິທີ ຄະນະຈັດຕັ້ງແຂວງໄດ້ຂຶ້ນຜ່ານມະຕິຕົກລົງ ວ່າດ້ວຍການບົງຕົວ ແຕ່ງຕັ້ງ ບຸກຄະລາກອນຂອງສະມາຄົມນັກທຸລະກິດໜຸ່ມແຂວງອຸດົມໄຊ, ໂດຍໄດ້ແຕ່ງຕັ້ງ ທ່ານ ບົວພັນ ພຸດທະວົງ ປະທານບໍລິສັດອິນດາລາກໍ່ສ້າງ ເປັນປະທານສະມາຄົມນັກທຸລະກິດໜຸ່ມແຂວງອຸດົມໄຊ, ແຕ່ງຕັ້ງ ທ່ານ ນາງ ດາວວົງ ປະທານບໍລິສັດ KMN ກໍ່ສ້າງ, ຕິດຕັ້ງໄຟຟ້າ ເຄຫະສະຖານ ເປັນຮອງປະທານ, ແຕ່ງຕັ້ງ ນາງ ໝອນຄຳ ສຸກສິງຫາ (ໂຮງແຮມສິງຫາ) ເປັນຮອງປະທານ, ພ້ອມນີ້ ຍັງໄດ້ແຕ່ງຕັ້ງ ຄະນະທີ່ປຶກສາ ຈຳນວນ 3 ທ່ານ, ແຕ່ງຕັ້ງ ຄະນະປະຈຳ ຈຳນວນ  7 ທ່ານ, ແຕ່ງຕັ້ງປະທານ ຮອງປະທານ ກວດກາ 2 ທ່ານ  ແລະ ຄະນະບໍລິຫານງານອີກຈໍານວນ 21 ທ່ານ, ເພື່ອບໍລິຫານວຽກງານຂອງສະມາຄົມໃຫ້ເດີນແມ່ນແລ່ນສະດວກ, ຖືກຕາມທິດຊີ້ນຳຂອງແຂວງ.
ໃນໂອກາດດັ່ງກ່າວ, ທ່ານເຈົ້າແຂວງອຸດົມໄຊ ກໍໄດ້ໂອ້ລົມຕໍ່ພິທີຄັ້ງນີ້ວ່າ: ການປະກາດບົ່ງຕົວແຕ່ງຕັ້ງບຸກຄະລາກອນຂອງສະມາຄົມນັກທຸລະກິດໜຸ່ມແຂວງອຸດົມໄຊນີ້ ກໍເພື່ອເຮັດໃຫ້ນັກທຸລະກິດພາຍໃນແຂວງອຸດົມໄຊ ໄດ້ເຕົ້າໂຮມຄວາມສາມັກຄີ ໄດ້ແລກປ່ຽນບົດຮຽນຊຶ່ງກັນ ແລະ ກັນ ແລະ ເປັນຫົວໜ້າທຸລະກິດທີ່ເຂັ້ມແຂງ ເພື່ອເຊື່ອມຕໍ່ກັບບັນດາປະເທດ ແລະ ເຮັດໃຫ້ນັກທຸລະກິດແຂວງອຸດົມໄຊມີບົດບາດສູງຂຶ້ນໃນເວທີສາກົນ, ພ້ອມດຽວກັນນີ້ ທ່ານຍັງໄດ້ເນັ້ນໃຫ້ນັກທຸລະກິດໜຸ່ມພາຍໃນແຂວງອຸດົມໄຊ ໃຫ້ຫັນມານຳໃຊ້ທ່າແຮງຂອງແຂວງອຸດົມໄຊເພື່ອພັດທະນາທຸລະກິດຂອງຕົນ ເປັນຕົ້ນແມ່ນທ່າແຮງທາງດ້ານການທ່ອງທ່ຽວ, ທ່າແຮງດ້ານບໍລິການ ທາງຜ່ານຂອງບັນດາແຂວງພາກເໜືອ ແລະ ທ່າແຮງທາງດ້ານບໍລິການສິນຄ້າເຊື່ອມຕໍ່ກັບເສັ້ນທາງລົດໄຟ ແລະ ອື່ນໆ. 
(ຂ່າວ-ພາບ: ແສງອາທິດ)