ປາຖະກະຖາວັນລັດຖະທຳມະນູນແຫ່ງຊາດ ຄົບຮອບ 33 ປີ

​ເຜີຍ​ແຜ່​ໂດຍ: admin|ຢ້ຽມ​ຊົມ: 44 ຄັ້ງ | ເວ​ລາ | 2024-11-21 13:20:39

(ສພຊ) ເພື່ອສະເຫຼີມສະຫຼອງວັນລັດຖະທຳມະນູນແຫ່ງຊາດ ຄົບຮອບ 33 ປີ (15 ສິງຫາ 1991-15 ສິງຫາ 2024) ຊຶ່ງເປັນກິດຈະກຳໜຶ່ງທີ່ມີຄວາມໝາຍສຳຄັນໃນການຫວນຄືນເຖິງຂະບວນການສ້າງ ແລະ ປັບປຸງ ກໍຄືການເຕີບໃຫຍ່ຂະຫຍາຍຕົວຂອງລັດຖະທຳມະນູນແຫ່ງ ສປປ ລາວ ໃນໄລຍະຜ່ານມາ, ສະພາແຫ່ງຊາດ (ສພຊ) ຈຶ່ງໄດ້ຈັດພິທີປາຖະກະຖາວັນລັດຖະທໍາມະນູນແຫ່ງຊາດ ຄົບຮອບ 33 ປີ ໃນຕອນເຊົ້າວັນທີ 14 ສິງຫາຜ່ານມາ ໂດຍການເປັນປະທານຂອງ ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ, ມີບັນດາທ່ານຮອງປະທານກຳມາທິການ, ຫົວໜ້າ-ຮອງຫົວໜ້າສະຖາບັນຄົ້ນຄວ້ານິຕິກຳພ້ອມດ້ວຍຄະນະກົມ, ສູນ, ຫ້ອງການ, ພະແນກ ແລະ ພະນັກງານ-ລັດຖະກອນ ພາຍໃນ ສພຊ ແລະ ຜູ້ຕາງໜ້າຈາກບັນດາກະຊວງ-ອົງການທີ່ກ່ຽວຂ້ອງເຂົ້າຮ່ວມຢ່າງຫຼວງຫຼາຍ.

ທ່ານ ຈະເລີນ ເຢຍປາວເຮີ ໄດ້ມີຄໍາເຫັນກ່າວເປີດວ່າ: ໂດຍປົກກະຕິແລ້ວ ການຈັດພິທີປາຖະກະຖາ ແມ່ນຈະມີລັກສະນະເລົ່າຄືນມູນເຊື້ອ, ຂະບວນວິວັດໃນການຈັດຕັ້ງປະຕິບັດໜ້າທີ່ວຽກງານ, ການເຕີບໃຫຍ່ຂະຫຍາຍຕົວຂອງບຸກຄົນ, ການຈັດຕັ້ງ ຫຼື ວັນສຳຄັນຕ່າງໆຂອງຊາດ. ແຕ່ສຳລັບພິທີໃນມື້ນີ້ ແມ່ນຈັດຂຶ້ນໃນຈຸດພິເສດທີ່ຕິດພັນກັບຂະບວນການປັບປຸງລັດຖະທຳມະນູນ ສະບັບປີ 2015 ຂອງຄະນະກຳມະການລະດັບຊາດ; ສະນັ້ນ, ຈະດຳເນີນໃນລັກສະນະເປັນການແລກປ່ຽນຄວາມຄິດເຫັນກ່ຽວກັບການສ້າງ ແລະ ປັບປຸງລັດຖະທຳມະນູນໃນໄລຍະຜ່ານມາ ເວົ້າລວມ, ເວົ້າສະເພາະ ກໍເພື່ອເປັນການເກັບກຳຂໍ້ມູນທີ່ເປັນປະໂຫຍດໃນການກະກຽມປັບປຸງລັດຖະທຳມະນູນ ໃນຕໍ່ໜ້າ ໃຫ້ມີຄວາມສອດຄ່ອງ, ຮັດກຸມ, ແທດຕົວຈິງ. ດັ່ງນັ້ນ, ຈຶ່ງຂໍໃຫ້ບັນດາທ່ານຈົ່ງຕັ້ງໃຈຮັບຟັງ, ຄົ້ນຄວ້າ ແລະ ມີຄຳເຫັນຕໍ່ກັບບົດສະຫຼຸບການປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ເພື່ອເປັນຂໍ້ມູນປັບປຸງບົດສະຫຼຸບດັ່ງກ່າວ ໃຫ້ມີເນື້ອໃນຄົບຖ້ວນ, ສົມບູນ ກ່ອນຈະສະເໜີລາຍງານຂໍທິດຊີ້ນຳຈາກກອງປະຊຸມກົມການເມືອງ ຮ່ວມກັບຄະນະເລຂາທິການສູນກາງພັກ ໃນທ້າຍເດືອນສິງຫານີ້.

ໃນພິທີ, ທ່ານ ຄຳແພງ ວິລະພັນ ຄະນະປະຈຳສະພາແຫ່ງຊາດ ປະທານກໍາມາທິການກົດໝາຍໄດ້ສະເໜີບົດສະຫຼຸບການປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ແລະ ຮັບຟັງການປາຖະກະຖາວັນລັດຖະທໍາມະນູນແຫ່ງຊາດ ຄົບຮອບ 33 ປີ ຈາກທ່ານ ຈະເລີນ ເຢຍປາວເຮີ ໂດຍທ່ານໄດ້ເລົ່າຄືນເລີ່ມຕັ້ງແຕ່ມື້ລົງມືສ້າງ, ບຸກຄົນຢູ່ໃນຄະນະສ້າງ, ປັບປຸງ ແລະ ເຫດຜົນຂອງການປະກາດເປັນວັນລັດຖະທໍາມະນູນແຫ່ງຊາດຈົນຮອດປັດຈຸບັນ.

(ຂ່າວ-ພາບ: ສອນສັກວັນວິໄຊ)