ລົງນາມບົດບັນທຶກຄວາມເຂົ້າໃຈລະຫວ່າງ ຄຕພ ແລະ ກຕສ

​ເຜີຍ​ແຜ່​ໂດຍ: admin|ຢ້ຽມ​ຊົມ: 80 ຄັ້ງ | ເວ​ລາ | 2024-11-21 13:20:37

ໃນຕອນເຊົ້າວັນທີ 15 ສິງຫາ ນີ້, ທີ່ສຳນັກງານຄະນະພົວພັນຕ່າງປະເທດສູນກາງພັກ ໄດ້ຈັດພິທີລົງນາມບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືຫັນວຽກງານຂອງຄະນະພົວພັນຕ່າງປະເທດສູນກາງພັກເປັນດີຈີຕອນລະຫວ່າງຄະນະພົວພັນຕ່າງປະເທດສູນກາງພັກ (ຄຕພ) ແລະ ກະຊວງເຕັກໂນໂລຊີ ແລະ ການສື່ສານ (ກຕສ), ໃຫ້ກຽດລົງນາມບົດບັນທຶກດັ່ງກ່າວ ໂດຍທ່ານ ທອງສະຫວັນ ພົມວິຫານ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ແລະ ທ່ານ ບໍ່ວຽງຄຳ ວົງດາລາ ກຳມະການສູນກາງພັກ ລັດຖະມົນຕີກະຊວງເຕັກໂນໂລຊີ ແລະ ການສື່ສານ; ມີບັນດາຄະນະພັກ, ຄະນະນຳ ພ້ອມດ້ວຍພະນັກງານຂອງທັງສອງຝ່າຍ ເຂົ້າຮ່ວມ.

ຈຸດປະສົງໃນການເຊັນບົດທັນທຶກຄວາມເຂົ້າໃຈໃນຄັ້ງນີ້ເພື່ອເປັນການເພີ່ມທະວີການຮ່ວມມື, ເປັນກົນໄກປະສານງານ, ແລກປ່ຽນຂໍ້ມູນຂ່າວສານ, ພັດທະນາຂີດຄວາມສາມາດໃນການຫັນເປັນດີຈີຕອນທາງດ້ານຂໍ້ມູນຂ່າວສານກ່ຽວກັບການຄຸ້ມຄອງ ແລະ ບໍລິຫານລັດ, ເຜີຍແຜ່ຂໍ້ມູນຂ່າວສານການເຄື່ອນໄຫວວຽກງານຕ່າງປະເທດດ້ານພັກ ແລະ ການທູດປະຊາຊົນຂອງຄະນະພົວພັນຕ່າງປະເທດສູນກາງພັກຢູ່ພາຍໃນປະເທດ ແລະ ຕ່າງປະເທດ, ເຊື່ອມໂຍງລະບົບຂໍ້ມູນຂ່າວສານກັບບັນດາຂະແໜງການກ່ຽວຂ້ອງ ແຕ່ສູນກາງຮອດທ້ອງຖິ່ນ ໄດ້ຢ່າງວ່ອງໄວ, ທັນສະໄໝ ແລະ ມີຄວາມປອດໄພ.

ການເຊັນບົດທັນທຶກໃນຄັ້ງນີ້ໄດ້ມີການກໍານົດຂອບເຂດການຮ່ວມມືແຕ່ລະດ້ານຄື: 1. ສະໜັບສະໜູນການຫັນເປັນທັນສະໄໝໃນວຽກງານຄຸ້ມຄອງ ແລະ ບໍລິຫານລັດຂອງ ຄຕພ ໂດຍສອດຄ່ອງກັບຍຸດທະສາດລວມແຫ່ງຊາດກ່ຽວກັບວຽກງານເຕັກໂນໂລຊີ ແລະ ການສື່ສານ ເຊັ່ນວ່າ: ລະບົບຫ້ອງການທັນສະໄໝ (E-Office), ລະບົບ E-mail, ລະບົບສື່ສານພາກລັດ (G-Chats), ລະບົບ G-Share, ລະບົບກອງປະຊຸມທາງໄກ, G-Web ແລະPlatform ຕ່າງໆ, 2. ໃຫ້ຄຳປຶກສາ, ຊ່ວຍສ້າງ, ເປັນທີ່ປືກສາການສ້າງຖານຂໍ້ມູນພະນັກງານເພື່ອຫັນເປັນທັນສະໄໝດ້ວຍລະບົບດີຈີຕອນ, 3. ສະໜັບສະໜູນການສ້າງຖານຂໍ້ມູນວິຊາສະເພາະຂອງບັນດາກົມຂອງ ຄຕພ ໂດຍນໍາໃຊ້ເປັນຄັງຂໍ້ມູນແບບ Cloud ຊຶ່ງສາມາດເຂົ້າເຖິງຖານຂໍ້ມູນດັ່ງກ່າວໄດ້ທຸກທີ່, ທຸກເວລາ ແລະ ຮັບປະກັນຄວາມປອດໄພທາງໄຊເບີ (Cyber Security), 4. ສະໜັບສະໜູນໃນການປະເມີນຄວາມຕ້ອງການທາງດ້ານອຸປະກອນ IT ທີ່ທັນສະໄໝທີ່ຈໍາເປັນນໍາໃຊ້ເຂົ້າໃນວຽກງານດັ່ງກ່າວ, 5. ຮ່ວມມືກັນບໍາລຸງກໍ່ສ້າງພະນັກງານ ແລະ ພັດທະນາລະບົບດີຈີຕອນຂອງ ຄຕພ.

ພາຍຫຼັງລົງນາມບົດບັນທຶກຄວາມເຂົ້າໃຈສະບັບດັ່ງກ່າວ, ສອງຝ່າຍຈະໄດ້ພ້ອມກັນຄົ້ນຄວ້າແຕ່ງຕັ້ງຄະນະຮັບຜິດຊອບເພື່ອຈັດຕັ້ງປະຕິບັດ ບັນດາໜ້າວຽກໃນການຫັນເປັນດີຈີຕອນຮ່ວມກັນເພື່ອປະກອບສ່ວນເຂົ້າໃນວຽກງານໂຄສະນາແນວທາງນະໂຍບາຍການຕ່າງປະເທດຂອງ ພັກ ປປ ລາວ ທັງສອດຄ່ອງກັບເປົ້າໝາຍຂອງລັດຖະບານທີ່ໄດ້ຮັບຮອງວິໄສທັດການພັດທະນາເສດຖະກິດດີຈີຕອນແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດີຈີຕອນແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາເສດຖະກິດດີຈີຕອນແຫ່ງຊາດ ໄລຍະ 5 ປີ (2021-2025).

ຂ່າວ:ຄຕພ, ພາບ: ແສງຈັນ