ສປປ ລາວ ກຳນົດ 7 ຍຸດທະສາດການສຶກສາຮອດປີ2030

​ເຜີຍ​ແຜ່​ໂດຍ: admin|ຢ້ຽມ​ຊົມ: 59 ຄັ້ງ | ເວ​ລາ | 2024-11-21 13:23:26

ສູນສົ່ງເສີມການສຶກສາຮຽນຮ່ວມ ເຜີຍແຜ່ແຜນຍຸດທະສາດ ແລະ ແຜນປະຕິບັດງານດ້ານວຽກງານການສຶກສາຮຽນຮ່ວມ ແຕ່ນີ້ຮອດປີ 2030. ​ໃນວັນທີ 5 ສິງຫາ 2024 ພາຍໃຕ້ການເປັນປະທານຂອງ ທ່ານ ສຸລິອຸດົງ ສູນດາລາ ຮອງລັດຖະມົນຕີກະຊວງສຶກສາທິການ ແລະ ກິລາ.

ແຜນຍຸດທະສາດດັ່ງກ່າວ, ປະກອບມີ 7 ຍຸດທະສາດຄື: ໜຶ່ງ, ຍົກສູງຄວາມສຳຄັນຂອງການສຶກສາຮຽນຮ່ວມ; ສອງ, ປັບປຸງສິ່ງອຳນວຍຄວາມສະດວກ ແລະ ສະພາບແວດລ້ອມ ໃນສະຖານການສຶກສາທີ່ມີ ການສຶກສາຮຽນຮ່ວມທຸກຊັ້ນ, ທຸກສາຍ; ສາມ, ເຊື່ອມສານການສຶກສາຮຽນ ຮ່ວມເຂົ້າໃນຫລັກສູດ, ຝຶກອົບຮົມຄູ, ສ້າງຄູໃນທຸກລະບົບທຸກຊັ້ນທຸກສາຍ; ສີ່, ສົ່ງເສີມການສຶກສາຂອງນັກຮຽນ-ນັກສຶກສາພິການ; ຫ້າ, ສ້າງ ແລະ ເຝິກອົບຮົມຄູອາ-ຈານ, ຜູ້ດູແລນັກຮຽນພິການ ແລະ ບຸກຄະລາກອນສະເພາະດ້ານ ສຳລັບການສຶກສາຄົນພິການ; ຫົກ,ສົ່ງເສີມຜູ້ຮຽນທຸກຄົນ ເຂົ້າເຖິງອາຫານ ທີ່ຖືກຫລັກໂພສະນາການ, ສຸຂະອະນາໄມ, ສຸຂາພິບານ ແລະ ເຈັດ, ສ້າງສະຖານການສຶກສາທີ່ປອດໄພ; ການຮ່ວມມືກັບຂະແໜງການທຸກພາກສ່ວນທີ່ກ່ຽວຂ້ອງ ແລະ ຄູ່ຮ່ວມພັດທະນາຕໍ່ວຽກງານການສຶກສາຮຽນຮ່ວມ ແລະ ການສຶກສາຄົນພິການ.

ທ່ານ ຫຸມພັນ ແກ້ວອຸ່ນຄຳ ຜູ້ອຳນວຍ ການສູນສົ່ງເສີມການສຶກສາຮຽນຮ່ວມ ໄດ້​ກ່າວວ່າ: ແຜນຍຸດທະສາດການສຶກສາຮຽນຮ່ວມແຕ່ນີ້ຫາປີ 2030 ສ້າງຂຶ້ນເພື່ອຈັດຕັ້ງຜັນຂະຫຍາຍ ນະໂຍບາຍແຫ່ງຊາດ ວ່າດ້ວຍການສຶກສາຮຽນຮ່ວມ ແລະ ພັດທະນາຂະແໜງການສຶກສາທິການ ແລະ ກິລາ ໃນແຕ່ລະໄລຍະ, ເພື່ອບັນລຸເປົ້າໝາຍສະຫັດສະວັດ ດ້ານການພັດທະນາແບບຍືນຍົງ (SDG4), ທັງເປັນການຮັບປະກັນສິດທິ ໃນການເຂົ້າເຖິງການສຶກສາທີ່ມີຄຸນນະພາບ, ຄວາມສະເໝີພາບ ແລະ ເທົ່າທຽມຂອງທຸກຄົນໃນສັງຄົມ, ຫລຸດຜ່ອນ ແລະ ລຶບລ້າງຄວາມຫລຸດໂຕນ ໃນການເຂົ້າເຖິງ ການສຶກສາຂອງກຸ່ມທີ່ດ້ອຍໂອກາດ ໂດຍສະເພາະເດັກຍິງ, ແມ່ຍິງ, ເຜົ່າ, ຄົນພິການ ແລະ ຜູ້ທີ່ມີຄວາມຫຍຸ້ງຍາກທາງດ້ານເສດຖະກິດ-ສັງຄົມ ເພື່ອຮັບປະກັນການສຶກສາໃຫ້ມີຄຸນນະພາບ, ເທົ່າທຽມ, ທົ່ວເຖິງ ແລະ ສົ່ງເສີມການຮຽນຮູ້ ຕະຫລອດຊີວິດສຳລັບທຸກຄົນ, ທັງເປັນການປັບປຸງ ຄຸນນະພາບ, ສະພາບແວດລ້ອມທີ່ເອື້ອອຳນວຍ ໃຫ້ແກ່ການສຶກສາຮຽນຮ່ວມ ແລະ ການມີສ່ວນຮ່ວມຂອງຜູ້ຮຽນ, ຄອບຄົວ, ໂຮງຮຽນ, ຊຸມຊົນ ແລະ ສັງຄົມ.

ຂ່າວ: ຂປລ.