ສຕສ ແລະ UNITEL ຮ່ວມລົງນາມພັດທະນາຍົກລະດັບຄຸນນະພາບການສິດສອນ ແລະ ຫຼັກສູດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 76 ຄັ້ງ | ເວ​ລາ | 2024-11-21 13:20:41

ສະຖາບັນເຕັກໂນໂລຊີການສື່ສານຂໍ້ມູນຂ່າວສານ (ສຕສ) ກະຊວງເຕັກໂນໂລຊີ ແລະ ການສື່ສານ (ກຕສ) ແລະ ບໍລິສັດ ສະຕາໂທລະຄົມ ຈໍາກັດ (UNITEL)ໄດ້ລົງນາມບົດບັນທຶກຄວາມເຂົ້າໃຈໃນການພັດສະນາຍົກລະດັບຄຸນນະພາບການສິດສອນ ແລະ ຫຼັກສູດ ໃນຕອນບ່າຍຂອງວັນທີ 9 ສິງຫາ ຜ່ານມາ ນີ້ ທີ່ສູນເຕັກໂນໂລຊີການສື່ສານຂໍ້ມູນຂ່າວສານ ໂດຍຕາງໜ້າຝ່າຍສະຖາບັນເຕັກໂນໂລຊີການສື່ສານຂໍ້ມູນຂ່າວສານ ລົງນາມໂດຍ ທ່ານ ນາງ ໃຈມາລີ ພະກະຊຸມ ຮອງຫົວໜ້າ ສຕສ ແລະ ຕາງໜ້າຝ່າຍ ບໍລິສັດ ສະຕາໂທລະຄົມ ຈໍາກັດ ລົງນາມໂດຍ ທ່ານ ຫງວຽນ ຮວງ ມິງ ຮອງຜູ້ອໍານວຍການໃຫຍ່ບໍລິສັດ ສະຕາໂທລະຄົມ ຈໍາກັດ ໂດຍມີ ທ່ານ ໄຊລືຊາ ອິນສີຊຽງໃໝ່ ຮອງລັດຖະມົນຕີ ກຕສ ພ້ອມດ້ວຍ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂິພິຍານ.

ທ່ານ ປະດັບໄຊ ໄຊຍະໂຄດ ຫົວໜ້າ ສຕສ ໄດ້ໃຫ້ຮູ້ວ່າ: ຈຸດປະສົງຂອງການເຊັນບົດບັນທຶກໃນຄັ້ງນີ້, ກໍເພື່ອເສີມຂະຫຍາຍການຮ່ວມມືໃນການພັດທະນາຍົກລະດັບຄຸນນະພາບການສິດສອນ ແລະ ຫຼັກສູດໃຫ້ມີລັກສະນະຕົວຈິງ, ເປັນທີ່ຕ້ອງການຂອງສັງຄົມ ແລະ ແກ້ໄຂບັນຫາທີ່ພົບພໍ້ໃນວຽກງານໄດ້ຢ່າງມີປະສິດທິພາບ ເພື່ອຮັບປະກັນການແລກປ່ຽນວິຊາການເຂົ້າຊ່ວຍ ໃນການປັບປຸງຫຼັກສູດພາກປະຕິ ບັດຕົວຈິງ, ການລົງຕົວຈິງໃນສະຖານທີ່ເຮັດວຽກ, ການຮ່ວມມືກັນສ້າງແຜນພັດທະນາບຸກຄະລາກອນຄູ -ອາຈານ, ສ້າງຄວາມເຂັ້ມໃຫ້ນັກສຶກສາຈົບແລ້ວ ສາມາດດໍາເນີນວຽກໄດ້ຢ່າງເປັນລະບົບຕາມຄວາມຕ້ອງ ການຂອງຕະຫຼາດແຮງງານ ແລະ ຮ່ວມກັນຈັດງານນໍາສະເໜີຜະລິດຕະພັນໃໝ່ໆໃນງານເປີດໂຕສະຖາບັນທຸກໆປີ.

ການລົງນາມເພື່ອຮ່ວມມືໃນຄັ້ງນີ້, ເປັນຂີດໝາຍອັນສໍາຄັນທັງດ້ານການພັດທະນາ, ຕໍ່ຍອດ ແລະ ເສີມຂະຫຍາຍເຄືອຂ່າຍການຮ່ວມມືທີ່ເປັນຮູບປະທໍາ ສອດຄ່ອງກັບທິດທາງ, ວິໄສທັດ, ແຜນຍຸດທະສາດ ການຫັນເປັນດີຈີຕອນ ຊຶ່ງໃນນີ້ວຽກງານກໍ່ສ້າງບຸກຄະລາກອນເປັນອັນສໍາຄັນພື້ນຖານ ແລະ ໃຈກາງຂອງການຫັນປ່ຽນທາງດ້ານເຕັກນິກ, ນະໂຍບາຍ ແລະ ແນວທາງ ໃຫ້ກ້າວໜ້າໃນທ່ວງທ່າທີ່ໝັ້ນຄົງ, ເຂັ້ມແຂງ, ກຸ້ມຕົນເອງ ແລະ ສ້າງແຮງງານລາວໃຫ້ໄດ້ຍົກລະດັບຂີດຈໍາກັດໃຫ້ຂຶ້ນສູ່ເວທີສາກົນ.

(ແຫຼ່ງ: ປະ​ຊາ​ຊົນ, ຂ່າວ-ພາບ: ສຸກສະຫວັນ, ຂໍ້ມູນຈາກ: ກຕສ)