ກຕສ ເປີດໂຕສະຖາບັນເຕັກໂນໂລຊີການສື່ສານຂໍ້ມູນຂ່າວສານ

​ເຜີຍ​ແຜ່​ໂດຍ: admin|ຢ້ຽມ​ຊົມ: 62 ຄັ້ງ | ເວ​ລາ | 2024-11-21 13:21:08

ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ຈັດພິທີເປີດໂຕສະຖາບັນເຕັກໂນໂລຊີການສື່ສານຂໍ້ມູນຂ່າວສານ (Open House) ປະຈຳສົກສຶກສາ 2024-2025 ຂຶ້ນໃນວັນທີ 9 ສິງຫານີ້ ທີ່ສະຖາບັນດັ່ງກ່າວ ພາຍໃຕ້ຄຳຂວັນ: “ຍົກລະດັບການສຶກສາດ້ານເຕັກໂນໂລຊີການສື່ສານຂໍ້ມູນຂ່າວສານ ໃນຍຸກດີຈີຕອນ”. ໂດຍໃຫ້ກຽດເຂົ້າຮ່ວມ ຂອງທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ມີພາກສ່ວນທີ່ກ່ຽວຂ້ອງ ແລະ ນັກສຶກສາພາຍໃນເຂົ້າຮ່ວມ.

ທ່ານ ບໍ່ວຽງຄໍາ ວົງດາລາ ກ່າວວ່າ: ເພື່ອກະຕຸກຊຸກຍູ້, ດຶງດູດ ແລະ ສ້າງມະໂນພາບ ກ່ຽວກັບການສຶກສາດ້ານເຕັກໂນໂລຊີ ແລະ ການສື່ສານ ແມ່ນລະບົບການສື່ສານທີ່ສໍາຄັນ ປັດໄຈຕັດສິນການພັດທະນາເສດຖະກິດ ແລະ ສັງຄົມ ໃຫ້ຮັບຮູ້ຢ່າງທົ່ວເຖິງ ຄຽງຄູ່ກັບທ່າແຮງຂອງການໄດ້ຮັບໂອກາດອັນສໍາຄັນ ໃນການຈະມີວຽກເຮັດງານທໍາໃນອາຊີບທີ່ໄດ້ຄ່າຕອບແທນສູງ ເພາະຄວາມຮູ້ດ້ານດັ່ງກ່າວເປັນທີ່ຮຽກຮ້ອງຕ້ອງການໃນຕະຫຼາດແຮງງານໃນລະດັບສູງ ໃນຍຸກການຫັນເປັນດີຈີຕອນ. ສະນັ້ນ, ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໄດ້ມີຄວາມພະຍາຍາມສູງໃນການສືບຕໍ່ປັບປຸງ ແລະ ພັດທະນາຫຼັກສູດໃຫ້ສອດຄ່ອງກັບສະພາບຕົວຈິງ ແລະ ສູ້ຊົນຂົນຂວາຍສ້າງຄູ່ຮ່ວມມືໃນການພັດທະນາເພື່ອເປົ້າໝາຍກໍ່ສ້າງບຸກຄະລາກອນທີ່ມີຄຸນນະພາບອອກຮັບໃຊ້ສັງຄົມຢ່າງກວ້າງຂວາງ ແລະ ຮັບປະກັນຫຼຸດຜ່ອນບັນຫາຂາດເຂີນສີມືແຮງງານທີ່ເປັນຄົນລາວໃນຂະແໜງເຕັກໂນໂລຊີ ແລະ ການສື່ສານ ມີລັກສະນະເຂັ້ມແຂງ ແລະ ຕໍ່ເນື່ອງ.

ນອກຈາກນີ້, ໃນງານຍັງມີຫຼາຍກິດຈະກໍາການວາງສະແດງກ່ຽວກັບບັນດາຫຼັກສູດຊັ້ນປະລິນຍາຕີ ແລະ ຊັ້ນສູງ ທີ່ຕິດພັນກັບຂະແໜງເຕັກໂນໂລຊີ ແລະ ການສື່ສານ, ບັນດາຜະລິດຕະພັນທີ່ໜ້າສົນໃຈຂອງບັນດາຄູ່ຮ່ວມມືທັງພາຍໃນ ແລະ ສາກົນ ຂອງບັນດາບໍລິສັດຊັ້ນນໍາແຖວໜ້າຂອງ ສປປ ລາວ. ພ້ອມນີ້, ຍັງມີການຈັດສໍາມະນາໃຫ້ຄວາມຮູ້ດ້ານວິຊາການ ແລະ ເສີມທັກສະອັນຈໍາເປັນໃນຍຸກດີຈີຕອນ, ບັນດາຜົນງານອັນປະຈັກຕາຂອງມະຫາວິທະຍາໄລທີ່ເປັນຄູ່ຮ່ວມມືຍຸດທະສາດຈາກ ສສ ຫວຽດນາມ, ສປ ຈີນ ແລະ ປະເທດໄທ, ພ້ອມທັງເປີດສະແດງໃຫ້ເຫັນຄວາມພ້ອມຂອງສິ່ງອໍານວຍຄວາມສະ ດວກຮອບດ້ານ ບໍ່ວ່າຈະເປັນຕຶກອາຄານໃໝ່ທັນສະໄໝ, ຫໍສະໝຸດ, ຫ້ອງທົດລອງ ແລະ ລະບົບນໍາໃຊ້ຄອມພິວເຕີທີ່ພຽງພໍເຂົ້າໃນການດໍາເນີນການສິດສອນຂອງຄູ-ອາຈານ ແລະ ການສຶກສາຮໍ່າຮຽນຂອງນັກສຶກສາທຸກຊັ້ນໄດ້ຢ່າງຄົບຖ້ວນ, ມີປະສິດທິພາບ ແລະ ປະສິດທິພົນ.

(ຂ່າວ-ພາບ: ສຳນານ)