ກອງ​ປະ​ຊຸມສະຫຼຸບ​ວຽກ​ງານ​ຜູ້​ບໍ​ລິ​ຫານ ການ​ສຶກ​ສາ 2023-2024

​ເຜີຍ​ແຜ່​ໂດຍ: admin|ຢ້ຽມ​ຊົມ: 56 ຄັ້ງ | ເວ​ລາ | 2024-11-21 13:25:59

ວັນນີ້ 09 ສິງຫາ 2024 ສະ​ຫາຍ ທອງ​ລຸນ​ ສີ​ສ​ຸ​ລິດ, ເລ​ຂາ​ທິ​ການ​ໃຫຍ່ ໃຫ້ທິດຊີ້ນຳຕໍ່ກອງປະຊຸມຜູ້ບໍລິຫານການສຶກສາ ແລະ ກິລາ ທົ່ວປະເທດ ໃນການສະຫຼຸບສົກຮຽນ 2023-2024, ສູນຝຶກອົບຮົມ ICTC ນະຄອນຫຼວງວຽງຈັນ ສປປລາວ".

(ໜຶ່ງ). ຫວນຄືນຄຳຂວັນຊຸກຍູ້ສົ່ງເສີມການສຶກສາໄລຍະຜ່ານມາ: "ຮຽນໜັງສືແມ່ນຮັກຊາດ, ການສຶກສາຕ້ອງໄປກ່ອນບາດກ້າວໜຶ່ງ, ຄູເປັນຄົນຂອງພັກ, ຮຽນໜັງສືແມ່ນການເອົາຊະນະສັດຕູແຫ່ງຄວາມໂງ່ຈ້າຫຼ້າຫຼັງ, ຮຽນໃຫ້ເກັ່ງເສັງໃຫ້ໄດ້ນຳໄຊ້ໃຫ້ເປັນ ແລະ ອື່ນໆ."

(ສອງ). ຫວນຄືນປະຫວັດ "ການຊ່ວຍເຫຼືອກໍ່ສ້າງນັກຮຽນນັກສຶກສານັກຮຽນຮູ້ປັນຍາຊົນ ໄລຍະການປະຕິວັດຊາດປະຊາທິປະໄຕ ເລີ່ມຕົ້ນຈາກການສ້າງເຂດປົດປ່ອຍສອງແຂວງເຕົ້າໂຮມ, ດ້ວຍການຊ່ວຍຈາກສາທາລະນະລັດປະຊາທິປະໄຕຫວຽດນາມ (ຫຽດນາມເໜືອ ສັງຄົມນິຍົມ), ສາທາລະນະລັດປະຊາຊົນຈີນ, ສະຫະພາບສາທາລະນະລັດສັງຄົມນິຍົມໂຊຫວຽດ, ສາທາລະນະລັດກູບາ ແລະ ບັນດາປະເທດສັງຄົມນິຍົມເຂດເອີຣົບຕະເວັນອອກ ແລະ ເພື່ອນມິດຍຸດທະສາດພັກຄອມມູນິດ ແລະ ພັກສາກົນກຳມະຊີບທີ່ມີແນວທາງການຕໍ່ສູ້ເພື່ອສັນຕິພາບ ເອກະລາດ ແລະ ເປັນເຈົ້າຕົນເອັງ, ເຊິ່ງໄດ້ສ້າງໜໍ່ແໜງບຸກຄະລາກອນເປັນພະນັກງານການນຳໃນຍຸກປັດຈຸບັນ".

(ສາມ). ຫວນຄືນຄວາມກະຕືລືລົ້ນໃນການຂື້ນຫ້ອງຮຽນພາຍໃນຈຸດຍຸດທະສາດສູ້ຮົບຂອງເຂດປົດປ່ອຍ "ເຖິງແມ່ນວ່າສະພາບແວດລ້ອມດ້ານການສຶກສາຮໍ່າຮຽນບໍ່ເອື້ອອຳນວຍ ອາໄສຖໍ້າ ເປັນສະຖານທີ່ການສິດສອນ ຫຼື ໂຮງຮຽນ ມີພຽງສໍດຳປື້ມບັນທຶກຈາກເສດເຈັ້ຍ ແລະ ສະພາບການຖີ້ມລະເບີດລ້າງຜານແບບມືດຟ້າມົວດິນ, ນ້ອງນັກຮຽນກໍ່ບໍ່ຫວັ່ນໄຫວ ຈົດກ່າຍເອົາທຸກຄຳເວົ້າຄຳສັ່ງສອນຄູ ເພື່ອຄົ້ນຄວ້າຮໍ່າຮຽນແກ້ໄຂວຽກບ້ານໃຫ້ສຳເລັດຕາມຄາດໝາຍ ພາຍໄຕ້ຕະກຽງນໍ້າມັນກາດ ເປັນແສງສະຫວ່າງສຶກສາຮໍ່າຮຽນດ້ວຍຄວາມໝຸ້ງໝັ້ນ ແລະ ມານະຈິດສູງ".

(ສີ່). ການສຶກສາສ້າງຄົນ ຄົນສ້າງຊາດ "ຄົນຕ້ອງຮັກຕົນເອັງ ຮັກຕົນເອັງຕ້ອງຮຽນ ຊອກຫາວິຊາຄວາມຮູ້ໃຫ້ຕົນເອັງ ມີຄວາມຮູ້ຈຶ່ງສາມາດຊ່ວຍເອັງ ຊ່ວຍຄອບຄົວ ຊ່ວຍພີ່ນ້ອງ ຊ່ວຍປະເທດຊາດບ້ານເມືອງ".

(ຫ້າ). ປະເທດຊາດບ້ານເມືອງ ຕ້ອງການໃຫ້ມີຊັບພະຍາກອນມະນຸດ ກໍຄືບຸກຄົນທີ່ມີ:

(1). ຄົນທີ່ມີຄວາມຮັກຊາດຢ່າງດູດດື່ມ,

(2). ຄົນທີ່ມີຄວາມກະຕືລືລົ້ນຕໍ່ການຮຽນຮູ້ສິ່ງໃໝ່ໆ,

(3). ຄົນທີ່ຮຽນຮູ້ເພິ່ງຕົນເອັງ ແລະ ສຶກສາສົມທຽບໄສ່ບຸກຄົນອ້ອມຂ້າງ ຄົນເຫັນຈຸດອ່ອນຕົນເອັງ ຕ້ອງພັດທະນາປັບປຸງຕົນເອັງພາຍໄຕ້ບັນຍາກາດການແຂ່ງຂັນ ໃຫ້ກ້າວຜ່ານຈຸດດ້ອຍຕົນເອັງ ແລະ ກ້າວນຳໜ້າ ດີຂື້ນກວ່າເກົ່າ,

(4). ຄົນທີ່ດຸໝັ່ນຂະຫຍັນພຽນ,

(5). ຄົນທີ່ມີຊີວິດແບບພໍພຽງ ບໍ່ຟູ່ມເຟືອຍ ບໍ່ໂລບມາກໂລພາ ມີຄວາມໜັກແໜ້ນທຸ່ນທ່ຽງ ແລະ ພັດທະນາປັບປຸງຕົນເອັງເທື່ອລະກ້າວ.

(ຫົກ). ສ້າງຄົນລູກຫຼານພວກເຮົາໃຫ້ມີຄ່ານິຍົມທີ່ຖືກຕ້ອງ:

(1). ຢ່າສ້າງຄ່ານິຍົມທີ່ເຫັນແກ່ການໄດ້ຮັບປະລິນຍາ ຫຼື ປະກາດສະນີຍະບັດ ເພີ່ອສົ່ງເສີມປາຣະມີ, ເຊິ່ງຈະເຮັດໃຫ້ເປັນການດ້ອຍຄ່າປະຣິນຍາ (ຜູ້ມອບໃຫ້ກະຈະມີຄວາມລະອາຍແກ່ໃຈ ແຕ່ຜູ້ຮັບພັດກະຕືລືລົ້ນວ່າຕົນເອັງສຳເລັດແລ້ວ ເພິ່ງພໍໃຈເປັນທີ່ສຸດແລ້ວ, ແຕ່ເມຶ່ອຮັບໃບປະກາດສະນີຍະບັດແລ້ວ ເຮັດຫຍັງບໍ່ໄດ້ ບໍ່ມີຜົນປະໂຫຍດ ແລະ ຄຸນຄ່າຫຍັງຕໍ່ສັງຄົມ) ຫຼື ສ້າງຄ່ານິຍົມແບບງ່າຍໆ ຜູ້ຄົນພັດບໍ່ມັກບໍ່ນິຍົມ ແຕ່ສົນໃຈສ້າງຄ່ານິຍົມແບບສະເຫວີຍສຸກ ສ້າງຄວາມທຸກຂັດກັບຄວາມຕ້ອງການທີ່ແທ້ຈິງຂອງສັງຄົມ;

(2). ສ້າງຄ່ານິຍົມທີ່ເປັນໂຕຂອງຕົນເອັງ ເຊື່ອໝັ້ນໃນຕົນເອັງ, ຄຳນຶງເຖິງກຽດ ແລະ ສັກສີຄວາມເປັນຊາດ ເສີມສ້າງວັດທະນະທຳບັນພະບຸລຸດແຫ່ງຊາດສືບທອດມາເປັນພັນໆປີ.

(ເຈັດ). ການສຶກສາໃນໂລກນີ້ ແມ່ນບໍ່ມີລັກສະນະເປັນກາງ ລະບົບການສຶກສາຂອງຊົນຊັ້ນໄດໆ ກໍ່ຮັບໄຊ້ຊົນຊັ້ນນັ້ນໆ ແລ້ວພວກເຮົາຈະສ້າງຄົນແນວໄດ ເພຶ່ອມາຮັບໄຊ້ປະເທດຊາດບ້ານເມືອງ "ຕ້ອງສ້າງຊັບພະຍາກອນມະນຸດທີ່ມີຄວາມຮູ້ຄວາມສາມາດ, ມີຄຸນສົມບັດສິນທຳປະຕິວັດ, ມີມະນຸດສຳພັນ, ມີຈາຣິຍະທຳ, ມີຈັນຍາບັນມີຈັນຍາທຳ, ມີຈາຣິຍະທຳ, ມີສຸດຈະຣິດທຳ", ຈຶ່ງເຮັດໃຫ້ການສຶກສາມີເປົ້າໝາຍເພື່ອທຸກໆຄົນ, ທຸກໆຄົນເພື່ອການສຶກສາ ແລະ ທຸກໆການຈັດຕັ້ງໃນສັງຄົມເພື່ອການສຶກສາ.