ການນຳຂັ້ນສູນກາງ ແລະ ທ້ອງຖິ່ນ ຂຸ້ນຂ້ຽວຊອກມາດຕະການເພື່ອຄຸ້ມຄອງລາຄາສິນຄ້າ

​ເຜີຍ​ແຜ່​ໂດຍ: admin|ຢ້ຽມ​ຊົມ: 45 ຄັ້ງ | ເວ​ລາ | 2024-11-21 13:23:18 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 0000-00-00 00:00:00

ທີ່ຫ້ອງວ່າການແຂວງສະຫວັນນະເຂດ ໄດ້ຈັດກອງປະຊຸມຄົ້ນຄວ້າ ແລະ ກຳນົດມາດຕະການຄຸ້ມຄອງລາຄາສິນຄ້າຢູ່ແຂວງສະຫວັນນະເຂດ ໃນວັນທີ 12 ສິງຫາ 2024, ພາຍໃຕ້ການເປັນປະທານຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ແລະ ທ່ານ ກິແກ້ວ ສິງນະວົງ ຮອງລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍພາກສ່ວນຕ່າງໆທີ່ກ່ຽວຂ້ອງຂັ້ນສູງກາງ ແລະ ທ້ອງຖິ່ນເຂົ້າຮ່ວມຢ່າງພ້ອມພຽງ.

ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ກ່າວວ່າ: ກອງປະຊຸມຮ່ວມປຶກສາຫາລືຂອງພວກເຮົາໃນຄັ້ງນີ້ ແມ່ນມີຄວາມໝາຍສໍາຄັນຍິ່ງ, ເປັນການຈັດຕັ້ງຜັນຂະຫຍາຍມະຕິ 04/ກມສພ, ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ກໍຄືການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ກາຍເປັນຮູບປະທໍາຕົວຈິງ, ໄດ້ຮັບການຈັດ ຕັ້ງປະຕິບັດຢ່າງມີຈຸດສຸມ ແລະ ມີຄວາມເປັນເອກະພາບ ເພື່ອເຮັດໃຫ້ວຽກງານດັ່ງກ່າວ ບັນລຸຜົນໍາເລັດຕາມທິດທາງແຜນການ ແລະ ຄາດໝາຍທີ່ວາງໄວ້ເທື່ອລະກ້າວ. ໂດຍລວມແລ້ວ ໃນໄລຍະ 6 ເດືອນຜ່ານມານີ້ ພາຍໃນແຂວງສະຫວັນນະເຂດ ເຫັນໄດ້ວ່າ ລາຄາສິນຄ້າ ແລະ ຄ່າບໍລິການຈໍານວນໜຶ່ງ ແມ່ນໄດ້ມີການປັບຕົວຂຶ້ນ ຍ້ອນສະພາບອັດຕາແລກປ່ຽນ ແລະ ອັດຕາເງິນເຟີ້ບໍ່ມີສະຖຽນລະພາບ ໃນໄລຍະຜ່ານມາ, ທາງອົງການປົກຄອງແຂວງ ກໍໄດ້ຄົ້ນຄວ້າວິເຄາະວິໄຈຂໍ້ມູນຕົວຈິງໃນຂອດລ້ຽງສັດ, ການປູກພືດຜັກຕ່າງເປັນຕົ້ນ: ການຜະລິດ-ເກັບຊື້ເຂົ້າ, ຕົ້ນທຶນການລ້ຽງໝູ-ລ້ຽງງົວ, ການລ້ຽງໄກ່ຊີ້ນ-ໄກ່ໄຂ່, ການລ້ຽງປານິນກະຊັງ ແລະ ການປູກພືດຜັກສະໜອງໃຫ້ຕະຫຼາດພາຍໃນແຂວງ; ເພື່ອນຳມາຄິດໄລ່ໂຄງປະກອບລາຄາ ຕັ້ງແຕ່ຂອດການລ້ຽງ, ການປູກຈົນເຖິງຂອດຈຳໜ່າຍໜ້າຟາມ, ໜ້າໂຮງສີເຂົ້າ ຫຼື ໜ້າສວນປູກຂອງຊາວກະສິກອນ; ຮອດຂອດໂຮງຂ້າສັດ, ຂອດແມ່ຂຽງ(ທີ່ຂຶ້ນກັບພະແນກກະສິກຳ-ປ່າໄມ້) ຈົນເຖິງຂອດລູກຂຽງ(ຂຶ້ນກັບພະແນກອຸດສາຫະກຳ-ການຄ້າ); ຊຶ່ງມາຮອດປັດຈຸບັນ ແມ່ນໄດ້ສຳເລັດເບື້ອງຕົ້ນການຄິດໄລ່ໂຄງປະກອບລາຄາທັງໝົດແລ້ວ ແລະ ກໍາລັງນຳສະເໜີເຂົ້າກອງປະຊຸມຂອງຄະນະກຳມະການຄຸ້ມຄອງລາຄາຂັ້ນແຂວງ ເລກທີ 1622/ຈຂ, ຮັບຮອງ ແລະ ປະກາດໃຊ້ຢ່າງເປັນທາງການໃນມໍ່ໆນີ້ເປັນຕົ້ນແມ່ນ: ໂຄງປະກອບລາຄາເຂົ້າສານ ເກັບຊື້ເຂົ້າເປືອກນໍາຊາວນາ 8 ພັນກີບ/ກິໂລ, ແປຮູບເຂົ້າເປືອກຂາຍຍົກໜ້າໂຮງສີ 15 ພັນກີບ/ກິໂລ, ຂາຍຍ່ອຍຢູ່ຕະຫຼາດ 16.583 ກີບ/ກິໂລ; ລາຄາຊີ້ນໝູໜ້າຟາມ 46 ພັນກີບ/ກິໂລ, ຂອດໂຮງຂ້າສັດ 65 ພັນກີບ/ກິໂລ, ຂາຍຍ່ອຍຢູ່ຕະຫຼາດຊີ້ນກ້ອນ, ຊີ້ນສາມຊັ້ນ, ໂຄງກະດູກ, ກົກເຫຼັກ 82 ພັນກີບ/ກິໂລ, ຊີ້ນສັນ ລາຄາ 78 ພັນກີບ/ກິໂລ, ເຄື່ອງໃນລວມ 62 ພັນກີບ/ກິໂລ, ໜັງໝູ 47 ພັນກີບ/ກິໂລ(ສະເລ່ຍລູກຂຽງ ໄດ້ກໍາໄລ 536.000 ກີບ/ໝູ 1 ໂຕ); ລາຄາໄຂ່ໄກ່ ໜ້າຟາມ 1.950 ກີບ/ໜ່ວຍ(58.500 ກີບ/ແຕະ), ຂາຍສະເລ່ຍ 65 ພັນກີບ/ແຕະ(ໄຂ່ໄກ່ ເບີ 1 ລາຄາ 77 ພັນກີບ, ເບີ 3 ລາຄາ 72 ພັນກີບ, ເບີ 5 ລາຄາ 58 ພັນກີບ), ລາຍການສິນຄ້າຄວບຄຸມ ທີ່ສາມາດສະໜອງໄດ້ພຽງພໍ ມີ: ເຂົ້າສານໝຽວ, ຊີ້ນໝູ ແລະ ພືດຜັກຈໍານວນໜຶ່ງ); ສ່ວນລາຍການສິນຄ້າຄວບຄຸມ ທີ່ບໍ່ສາມາດສະໜອງໄດ້ພຽງພໍ: ເຂົ້າສານຈ້າວ ຄວາມຕ້ອງການ 23 ໂຕນ/ວັນ, ສາມາດສະໜອງໄດ້ 5 ໂຕນ/ວັນ, ຍັງຕ້ອງການ 18 ໂຕນ/ວັນ, ປະເພດໄຂ່ໄກ່: ຄວາມຕ້ອງການ 8.004 ແຕະ/ວັນ, ສະໜອງໄດ້ 1.585 ແຕະ/ວັນ, ບໍ່ພຽງພໍ 6.419 ແຕະ/ວັນ, ປະເພດໄກ່ຊີ້ນ ຄວາມຕ້ອງການ 3.855 ຕົວ/ວັນ, ສະໜອງໄດ້ພຽງ 1.680 ຕົວ/ວັນ, ບໍ່ພຽງພໍ 2.175 ຕົວ/ວັນ.

ຈາກນັ້ນ, ຄະນະປະທານ ກໍໄດ້ຜັດປ່ຽນກັນປະກອບຄຳເຫັນ ແລະໂອ້ລົມຕໍ່ກອງປະຊຸມ ພ້ອມນີ້, ໃນພິທີ ຍັງໄດ້ມີການລາຍງານຜົນກອງປະຊຸມວິຊາການໃນການປຶກສາຫາລືແລກປ່ຽນໃນວັນທີ 9 ສິງຫາ 2024 ໂດຍສັງເຂບ ກ່ຽວກັບວຽກງານຄຸ້ມຄອງລາຄາສິນຄ້າ, ຄຸ້ມຄອງການນຳເຂົ້າ-ສົ່ງອອກສິນຄ້າ, ການສົ່ງເສີມການຜະລິດສິນຄ້າກະສິກຳ ເພື່ອທົດແທນການນຳເຂົ້າ, ວຽກງານສະກັດກັ້ນສິນຄ້ານອກລະບົບ, ລາຍງານກ່ຽວກັບການສົ່ງເສີມການຜະລິດ 5 ລາຍການສິນຄ້າ(ເຂົ້າ, ຊີ້ນໝູ, ປາ, ໄຂ່ ແລະ ພືດຜັກ) ແລະລາຍງານວຽກງານຕ່າງໆທີ່ກ່ຽວຂ້ອງ ພ້ອມທັງໄດ້ມີການປະກອບຄຳຄິດຄຳເຫັນແລກປ່ຽນບົດຮຽນຮ່ວມກັນໃນວຽກງານດັ່ງກ່າວນຳອີກ; ໃນວັນດຽວກັນ, ທີ່ບໍລິເວນເດີ່ນຈອດລົດສູນການຄ້າສະຫວັນ-ໄອເຕັກ ໄດ້ຈັດກິດຈະກຳຈຳໜ່າຍສິນຄ້າອຸປະໂພກ-ບໍລິໂພກຫຼຸດລາຄາ ຕາມນະໂຍບາຍຂອງຄະນະສະເພາະກິດ 19/ກມສພ ຊຶ່ງໄດ້ມີຫົວໜ່ວຍທຸລະກິດພາຍໃນແຂວງເຂົ້າຮ່ວມ 19 ຫົວໜ່ວຍ ແລະ ມີພໍ່ແມ່ປະຊາຊົນຫຼັ່ງໄຫຼກັນເຂົ້າມາເລືອກຊື້ເລືອກໃຊ້ສິນຄ້າພາຍໃນງານຢ່າງຫຼວງຫຼາຍ ນັບວ່າເປັນກິດຈະກຳທີ່ດີ ທີ່ທາງພະແນກອຸດສາຫະກຳ ແລະການຄ້າ ໄດ້ຈັດຂຶ້ນເປັນຄັ້ງທີ 7 ແລ້ວ.

 

(ແຫຼ່ງ: ປະ​ຊາ​ຊົນ, ຂ່າວ: ສະຫວັນນະເຂດ)