2023 ທົ່ວປະເທດສ້າງຄອບຄົວພົ້ນທຸກໄດ້ 32.864 ຄອບຄົວ

​ເຜີຍ​ແຜ່​ໂດຍ: admin|ຢ້ຽມ​ຊົມ: 81 ຄັ້ງ | ເວ​ລາ | 2024-12-22 00:00:00

ກອງປະຊຸມກະສິກໍາ, ປ່າໄມ້ ແລະ ພັດທະນາຊົນນະບົດທົ່ວປະເທດ ໄດ້ຈັດຂຶ້ນໃນວັນທີ 22 ມັງກອນ ທີ່ຫໍປະຊຸມແຫ່ງຊາດ, ໂດຍການເປັນປະທານຂອງ ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້, ເຂົ້າຮ່ວມມີບັນດາຮອງລັດຖະມົນຕີ, ບັນດາກະຊວງ-ທຽບເທົ່າກະຊວງ, ບັນດາທ່ານຮອງເຈົ້າແຂວງ, ຮອງເຈົ້າຄອງນະຄອນຫຼວງ ພ້ອມດ້ວຍບັນດາທ່ານແຂກຖືກເຊີນທີ່ກ່ຽວຂ້ອງ ທີ່ມາຈາກສູນກາງ ແລະ ທ້ອງຖິ່ນທົ່ວປະເທດ.

ໃນວາລະ, ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້ (ກປ), ລາຍງານການຈັດຕັ້ງປະຕິບັດ ແຜນພັດທະນາກະສິກຳ, ປ່າໄມ້ ແລະ ພັດທະນາຊົນນະບົດ ປະຈໍາປີ 2023 ວ່າ: ແຜນງານພັດທະນາຊົນນະບົດ ແລະ ແກ້ໄຂຄວາມທຸກຍາກ ເຫັນວ່າປະຊາຊົນຢູ່ເຂດຊົນນະບົດ, ເຂດຫ່າງໄກສອກຫຼີກ, ເຂດພື້ນຖານການປະຕິວັດເກົ່າ ລ້ວນແຕ່ໄດ້ຮັບການພັດທະນາດີຂຶ້ນ, ລະດັບຊີວິດການເປັນຢູ່ ຂອງປະຊາຊົນ ໄດ້ຮັບການປັບປຸງຍົກລະດັບຂຶ້ນເທື່ອລະກ້າວ ຕາມມາດຖານດໍາລັດ 348/ລບ ແລະ ການຈັດຕັ້ງປະຕິບັດ ມະຕິກອງປະຊຸມສະພາແຫ່ງຊາດ ສະບັບເລກທີ 82/ສພຊ ໂດຍລວມ ແມ່ນມີຄວາມຄືບໜ້າ ແລະ ບັນລຸໄດ້ຕາມຄາດໝາຍທີ່ວາງໄວ້ເປັນສ່ວນໃຫຍ່. ນອກນັ້ນ, ຍັງສາມາດແກ້ໄຂ ແລະ ຍົກລະດັບຊີວິດການເປັນຢູ່ ຂອງປະຊາຊົນຢູ່ເຂດຊົນນະບົດດີຂຶ້ນເທື່ອລະກ້າວ. ໃນປີ 2023 ສາມາດສ້າງຄອບຄົວພົ້ນທຸກໄດ້ 32.864 ຄອບຄົວ ເທົ່າກັບ 205% ຂອງແຜນການ, ສ້າງຄອບຄົວພັດທະນາ ໄດ້ 50.598 ຄອບຄົວ ເທົ່າກັບ 252,99% ຂອງແຜນການ; ສ້າງບ້ານພັດທະນາບັນລຸ 710 ບ້ານ ເທົ່າກັບ 284% ຂອງແຜນການ, ສ້າງບ້ານພົ້ນທຸກໄດ້ 310 ບ້ານ ເທົ່າກັບ 155% ຂອງແຜນການ; ສ້າງບ້ານໃຫຍ່ກາຍເປັນຕົວເມືອງໃນຊົນນະບົດ ໄດ້ບັນລຸ 8 ບ້ານ ເທົ່າກັບ 200% ຂອງຂອງແຜນການ ແລະ ສ້າງເມືອງພົ້ນທຸກໄດ້ 9 ເມືອງ ເທົ່າກັບ 60% ຂອງແຜນການ; ສ້າງເມືອງເຂັ້ມແຂງຮອບດ້ານ ໄດ້ 3 ເມືອງ ເທົ່າກັບ 75% ຄື: 1) ເມືອງຫາດຊາຍຟອງ ນະຄອນຫຼວງວຽງຈັນ; 2) ນະຄອນ-ຫຼວງພະບາງ ແຂວງຫຼວງພະບາງ ແລະ 3) ເມືອງທ່າແຂກ ແຂວງຄໍາມ່ວນ. ຈັດສັນພູມລຳເນົາ ແລະ ບ່ອນຢູ່ອາໄສໄດ້ 496 ຄອບຄົວ ເທົ່າກັບ 351% ຂອງແຜນການ.

 

(ແຫຼ່ງ: ປະ​ຊາ​ຊົນ, ຂ່າວ-ພາບ: ແສງຈັນ)