ປີ 2024 ສູ້ຊົນຜະລິດພືດສະບຽງອາຫານ ໃຫ້ໄດ້ 279.680 ເຮັກຕາ

​ເຜີຍ​ແຜ່​ໂດຍ: admin|ຢ້ຽມ​ຊົມ: 23 ຄັ້ງ | ເວ​ລາ | 2024-11-21 15:58:15

ໂດຍ: ແສງຈັນ

ເພື່ອຍູ້ແຮງການຜະລິດສະບຽງອາຫານ ແລະ ການຜະລິດສິນຄ້າກະສິກຳ ໃຫ້ມີທ່າແຮງຂະຫຍາຍຕົວ, ຫຼາກຫຼາຍ, ສະອາດ, ປອດໄພ, ປະຊາຊົນມີລາຍຮັບ ທັງຮັບປະກັນລະບົບນິເວດໃຫ້ມີຄວາມຂຽວງາມ ແລະ ຍືນຍົງ ໂດຍຮັກສາລະດັບການເຕີບໂຕຂອງຂະແໜງກະສິກຳ ແລະ ປ່າໄມ້ໃຫ້ໄດ້ 2,6%, ຫຼື ປະມານ 20,8% ຂອງລວມຍອດຜະລິດຕະພັນພາຍໃນ.

ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ລາຍງານໃນກອງປະຊຸມວຽກງານກະສິກໍາທົ່ວປະເທດ ທີ່ຫໍປະຊຸມແຫ່ງຊາດເມື່ອບໍ່ດົນມານີ້ວ່າ: ປະຕິບັດຕາມທິດທາງແຜນການພັດທະນາກະສິກຳ-ປ່າໄມ້ ແລະ ພັດທະນາຊົນນະບົດ 4 ແຜນງານ ຄື: 1. ແຜນງານການປະກັນສະບຽງອາຫານ ແລະ ໂພຊະນາການ: ສູ້ຊົນຜະລິດເຂົ້າ ໃຫ້ໄດ້ 3,86 ລ້ານໂຕນ, ໂດຍສຸມໃສ່ 10 ແຂວງເປົ້າໝາຍ ຂອງໂຄງການຄໍ້າປະກັນສະບຽງອາຫານຫຼາຍແຫ່ງຊາດ, ສູ້ຊົນຜະລິດພືດສະບຽງອາຫານປະມານ 279.680 ເຮັກຕາ, ຜົນຜະລິດ 2,46 ລ້ານໂຕນ. ການລ້ຽງສັດ ແລະ ປະມົງ ສູ້ຊົນຜະລິດຊີ້ນ, ໄຂ່ ແລະ ປາ ໃຫ້ໄດ້ 554.000 ໂຕນ, ຂະຫຍາຍຝູງສັດ ຢູ່ໃນລະດັບ 3,5% ຕໍ່ປີ (ຄວາຍ 1%, ງົວ 3%, ໝູ 4%, ແກະ/ແບ້ 5% ແລະ ສັດປີກ 5%) ແລະ ການປະມົງ ຂະຫຍາຍຕົວ 4,3%, 2. ແຜນງານການຜະລິດກະສິກຳ ເປັນສິນຄ້າ: ດ້ານການຜະລິດ ສູ້ຊົນຜະລິດພືດ, ສັດ ແລະ ໄມ້ເປັນສິນຄ້າສົ່ງອອກໃຫ້ໄດ້ 1,2 ຕື້ໂດລາ, ໃນນັ້ນ ພືດໃຫ້ໄດ້ 1.100 ລ້ານໂດລາ ແລະ ສັດໃຫ້ໄດ້ 100 ລ້ານໂດລາ; ສູ້ຊົນຜະລິດງົວ ເພື່ອສົ່ງອອກ ລວມທັງສົ່ງອອກໄປ ສປ ຈີນ ໃຫ້ໄດ້ 50.000 ໂຕ/ປີ, ຜະລິດນໍ້ານົມງົວ ໃຫ້ໄດ້ 50.000 ໂຕນ. ດ້ານການເຈລະຈາດ້ານສຸຂານາໄມ ພືດ-ສັດ ແລະ ການສົ່ງອອກ ສືບຕໍ່ເຈລະຈາດ້ານສຸຂານາໄມພືດ ແລະ ສັດ ກັບປະເທດຄູ່ຄ້າ ໂດຍສະເພາະບັນດາລາຍການສິນຄ້າບຸລິມະສິດຂອງລາວ ທີ່ໄດ້ປະເມີນຄວາມສ່ຽງສັດຕູພືດ ແລະ ໄດ້ສົ່ງໃຫ້ປະເທດຄູ່ຄ້າ ແລ້ວນັ້ນ ເຊັ່ນ: ສປ ຈີນ 28 ພືດ, ຣາຊະອານາຈັກໄທ 5 ພືດ, ສສ ຫວຽດນາມ 4 ພືດ ແລະ ປະເທດ ອື່ນໆ; ສືບຕໍ່ເຈລະຈາດ້ານສຸຂານາໄມ ເພື່ອສົ່ງອອກຜະລິດຕະພັນຊີ້ນ ແລະ ປາ ກັບ ສປ ຈີນ ແລະ ສສ ຫວຽດນາມ; 3. ແຜນງານຄຸ້ມຄອງ ແລະ ປົກປັກຮັກສາປ່າໄມ້: ສືບຕໍ່ຈັດຕັ້ງ ຜັນຂະຫຍາຍ ບັນດາກົດໝາຍ ແລະ ນິຕິກຳ ເປັນຕົ້ນ: ຄໍາສັ່ງ 15/ນຍ, 05/ນຍ ແລະ 11/ນຍ ໃຫ້ເປັນຮູບປະທຳ, ປະສານສົມທົບກັບຂະແໜງການ ແລະ ອົງການປົກຄອງທ້ອງຖິ່ນ ອອກເອກະສານສິດນຳໃຊ້ທີ່ດິນ ໃຫ້ກັບປະຊາຊົນ ທີ່ອາໄສໃນເຂດ 3 ປະເພດປ່າ, ຊຸກຍູ້ສົ່ງເສີມຜູ້ປະກອບການ ໃນການພັດທະນາການທ່ອງທ່ຽວແບບອະນຸລັກທຳມະຊາດ ຕິດພັນກັບສ້າງລາຍຮັບໃຫ້ ກັບປະຊາຊົນໃນສາມປະເພດປ່າ, ສືບຕໍ່ພັດທະນາລະບົບທຽບຖານຂໍ້ມູນ ກ່ຽວກັບວຽກງານ REDD ໃຫ້ເປັນລະບົບເຊື່ອຖືໄດ້ ຄຽງຄູ່ກັບການສົ່ງເສີມພາກເອກະຊົນ ທັງພາຍໃນ ແລະ ຕ່າງປະເທດ ເຂົ້າມາລົງທຶນໃສ່ວຽກງານດັ່ງກ່າວ; 4. ແຜນງານການພັດທະນາຊົນນະບົດ ແລະ ແກ້ໄຂຄວາມທຸກຍາກ: ສືບຕໍ່ຈັດຕັ້ງປະຕິບັດຄໍາສັ່ງ ຂອງກົມການເມືອງສູນກາງພັກ ເລກທີ 097/ກມສພ, ຄໍາສັ່ງແນະນຳ ຂອງຄະນະເລຂາທິການສູນກາງພັກ ສະບັບເລກທີ 233/ຄລສພ; ກົດໝາຍ ວ່າດ້ວຍການຈັດສັນພູມລຳເນົາ ແລະ ອາຊີບ ເລກທີ 45/ສພຊ, ດຳລັດ 348/ລບ; ຂໍ້ຕົກລົງ ເລກທີ 72/ນຍ; ສູ້ຊົນສ້າງຄອບຄົວພົ້ນທຸກ ໃຫ້ໄດ້ 35.000 ຄອບຄົວ; ສ້າງບ້ານພົ້ນທຸກໃຫ້ໄດ້ 500 ບ້ານ; ສ້າງເມືອງພົ້ນທຸກໃຫ້ໄດ້ 15 ເມືອງ; ສ້າງຄອບຄົວພັດທະນາໃຫ້ໄດ້ 33.000 ຄອບຄົວ; ສ້າງບ້ານພັດທະນາໃຫ້ໄດ້ 500 ບ້ານ; ສ້າງເມືອງເຂັ້ມແຂງຮອບດ້ານ ໃຫ້ໄດ້ 4 ເມືອງ.

ມາດຕະການຈັດຕັ້ງປະຕິບັດປີ 2024 ຄື:

1. ຜັນຂະຫຍາຍ 2 ນະໂຍບາຍການປູກ-ການລ້ຽງ ທີ່ລັດຖະບານຮັບຮອງ ແລະ ປະກາດໃຊ້ແລ້ວ ໃຫ້ເປັນອັນລະອຽດ ພ້ອມທັງປະສານສົມທົບກັບບັນດາຂະແໜງການ ແລະ ທ້ອງຖິ່ນ ຈັດຕັ້ງປະຕິບັດ ໃຫ້ເປັນຮູບປະທຳ; 2. ສ້າງເງື່ອນໄຂ ແລະ ສະພາບແວດລ້ອມທີ່ເອື້ອອໍານວຍໃຫ້ແກ່ການຜະລິດ ເຊັ່ນ: ການເຂົ້າເຖິງແຫຼ່ງທຶນ ດອກເບ້ຍທີ່ເໝາະສົມ, ນະໂຍບາຍການນໍາເຂົ້າ ປັດໄຈການຜະລິດທີ່ເຮົາບໍ່ສາມາດ ຜະລິດໄດ້; 3. ກຳນົດຈຸດສຸມ, ປັບປຸງກໍາລັງການຜະລິດ, ກຸ່ມ, ສະຫະກອນ, ສະມາຄົມ ເພື່ອຍົກສູງຜະລິດຕະພາບການຜະລິດ ແລະ ຕິດພັນກັບການສ້າງຕັ້ງໂຮງງານ; 4. ສືບຕໍ່ສ້າງ ແລະ ປັບປຸງ ນິຕິກຳ ເພື່ອສົ່ງເສີມການຜະລິດ ຕິດພັນກັບການປຸງແຕ່ງ, ຄຸ້ມຄອງໂຮງງານປຸງແຕ່ງ ດ້ວຍມາດຕະຖານການຜະລິດ, ໂດຍການສ້າງຖານການຜະລິດ ຢູ່ເຂດຊົນນະບົດ ເພື່ອເປັນຕະຫຼາດແຮງງານ ແລະ ຕະຫຼາດວັດຖຸດິບ; 5. ຊຸກຍູ້ ແລະ ສ້າງເງື່ອນໄຂທີ່ເອື້ອອຳນວຍ ໃຫ້ແກ່ບັນດານັກທຸລະກິດ ແລະ ຜູ້ປະກອບການແນໃສ່ການຜະລິດພືດ ແລະ ສັດ ບຸລິມະສິດ ທີ່ມີຕະຫຼາດຮອງຮັບແລ້ວ ແລະ ການເຮັດສັນຍາຂໍ້ຜູກພັນສອງສົ້ນ ລະຫວ່າງ ຜູ້ຜະລິດ-ຜູ້ປະກອບການ ແລະ ການລົງທຶນແບບຮ່ວມສຳພັນທຸລະກິດ; 6. ອອກແຮງຂົນຂວາຍ ແລະ ປຸກລະດົມ ຜູ້ປະກອບການລົງທຶນ ໃນການພັດທະນາພື້ນຖານໂຄງລ່າງ, ປັດໄຈການຜະລິດໃຫ້ເປັນຂະບວນການແຂງແຮງ.

ແຫຼ່ງ: ປະ​ຊາ​ຊົນ 29/1/2024