ກະຊວງສຶກສາໃຫ້ບູລິມະສິດຊັບຊ້ອນຄູໃນຊັ້ນປະຖົມແລະການສຶກສາກ່ອນໄວຮຽນ

​ເຜີຍ​ແຜ່​ໂດຍ: admin|ຢ້ຽມ​ຊົມ: 51 ຄັ້ງ | ເວ​ລາ | 2024-11-21 13:25:47

ໃນວາລະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໃນພາກເຊົ້າຂອງວັນທີ 17 ມິຖຸນາ2022 ທ່ານພຸດ ສິມມາລາວົງ ລັດຖະມົນຕີກະຊວງສຶກສາທິການແລະກິລາໄດ້ຍົກໃຫ້ຮູ້ເຖິງຜົນງານ ແລະການ ເຄື່ອນໄຫວວຽກງານສຶກສາໃນໄລຍະຜ່ານມາ ແລະແຜນການພັດທະນາສຶກສາໃນຕໍ່ໜ້າ ໃນນັ້ນທ່ານໄດ້ຍົກໃຫ້ເຫັນວ່າ ຈຸດໃຈກາງຂອງວຽກງານສຶກສາຄືຊັ້ນປະຖົມແລະການສຶກສາກ່ອນໄວຮຽນ ດັ່ງນັ້ນ ໃນການຊັບຊ້ອນຄູກະຊວງສຶກສາທິການແລະກິລາຈິ່ງໃຫ້ບຸລິມະສິດໃນຊັ້ນຮຽນດັ່ງກ່າວ ໂດຍສະເພາະແມ່ນໂຮງຮຽນທີ່ບໍ່ມີຄູສອນຈັກຄົນ. ຈາກການສຳຫຼວດເມື່ອສົກຮຽນນີ້ມີ 250 ກວ່າໂຮງຮຽນທີ່ບໍ່ມີຄູປະຈຳການຈັກຄົນ ສຳລັບ ຊັ້ນມັດທະຍົມ ອາຊີວະສຶກສາ ແລະການສຶກສາຊັ້ນສູງໄດ້ເນັ້ນໃສ່ຄູວິຊາທີ່ມີຄວາມຈຳເປັນອີຫຼີໃນການຊັບຊ້ອນຄູ. ນອກນັ້ນແມ່ນໄດ້ປະຕິບັດມາດຕະການໃນການແກ້ໄຂຄູສອນບໍ່ຖືກວິຊາແລະບໍ່ໄດ້ຮຽນວິຊາຄູ ເຊິ່ງມີ2ປະເພດຄືຄູສອນບໍ່ຖືກສາຍວິຊາສະເພາະແລະຈົບສາຍອື່ນມາເປັນຄູສອນທີ່ເກ່ງວິຊາການແຕ່ບໍ່ມີວິຊາຄູ ປະເພດຄູເຫຼົ່ານີ້ໄດ້ຈັດໃຫ້ໄປຝຶກອົບຮົມຄືນໃໝ່ ສ່ວນກໍລະນີແກ້ໄຂຄູສອນອາສາສະໝັກທ່ານລັດຖະມົນຕີໄດ້ກ່າວວ່າ ຄູອາສາສະໝັກເກີດຂຶ້ນມາຈາກ2ດ້ານຄືເປັນຄວາມຕ້ອງການຂອງລູກຫຼານທີ່ຮຽນເປັນຄູແລ້ວຢາກເປັນຄູ ແລະຄວາມຮຽກຮ້ອງຕ້ອງການຂອງໂຮງຮຽນທ້ອງຖິ່່ນນັ້ນຂາດເຂີນຄູ. ອີງຕາມຜົນສຳຫຼວດສົກຮຽນ 2016-2017 ພົບວ່າທົ່ວປະເທດມີຄູອາສາສະໝັກ 12 ພັນກວ່າຄົນ. ເລື່ອງນະໂຍບາຍຮັບຄູອາສາສະໝັກກະຊວງພາຍໃນກໍໄດ້ອອກແຈ້ງການບໍ່ໃຫ້ຮັບແລະກະຊວງສຶກສາກໍໄດ້ແຈ້ງໃຫ້ທຸກສະຖາບັນການສຶກສາໃນຂອບເຂດທົ່ວປະເທດໄດ້ຮັບຊາບໃນສົກຮຽນ 2017-2018 ເປັນຕົ້ນມາ ແຕ່ໃນຄວາມເປັນຈິງກໍຍັງມີການຮັບເອົາຄູອາສາສະໝັກ ແລະມາຮອດປັດຈຸບັນກະຊວງສືກສາກໍໄດ້ວາງມາດຕະການແກ້ໄຂຄູອາສາສະໝັກໄປເທື່ອລະກ້າວ.