ເຊັນບົດບັນທຶກຄວາມເຂົ້າໃຈ ຮ່ວມມືດ້ານການສຶກສາ

​ເຜີຍ​ແຜ່​ໂດຍ: admin|ຢ້ຽມ​ຊົມ: 61 ຄັ້ງ | ເວ​ລາ | 2024-11-21 13:23:17

ໃນວັນທີ 28 ກຸມພາ ຜ່ານມາ, ທ່ານ ສຸລິອຸດົງ ສຸນດາລາ ຮອງລັດຖະມົນຕີກະຊວງສຶກສາ ແລະ ກິລາ, ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ ພ້ອມດ້ວຍ ທ່ານ ກໍ່ສັກ ໄຊລັດສະໝີສັກ ປະທານກຳມະການບໍລິຫານ ບໍລິສັດ ຊີພີ ອໍລ ຈຳກັດ (ມະຫາຊົນ) ເຂົ້າຮ່ວມເປັນສັກຂີພະຍານການລົງນາມໃນບົດບັນທຶກຄວາມເຂົ້າໃຈ (MOU) ຮ່ວມມືທາງດ້ານການສຶກສາ ລະຫວ່າງ ວິທະຍາໄລເຕັກນິກ ປາກປ່າສັກ ສປປ ລາວ ແລະ ວິທະຍາໄລ ເຕັກໂນໂລຊີ ປັນຍາພິວັດ ຊຶ່ງໄດ້ຈັດຂຶ້ນທີ່ຫ້ອງປະຊຸມປັນຍາງາມ ວິທະຍາໄລເຕັກໂນໂລຊີ ປັນຍາພິວັດ ປະເທດໄທ.

ຮ່ວມລົງນາມໃນຄັ້ງນີ້ລະຫວ່າງ ທ່ານ ສາຍສະໝອນ ງາມສີ ຜູ້ອໍານວຍການ ວິທະຍາໄລເຕັກນິກ ປາກປ່າສັກ ແລະ ທ່ານ ປິຍະວັດ ທິຕະສັດທາວໍລະກຸນ ຜູ້ຮັບໃບອະນຸຍາດ ວິທະຍາໄລ ເຕັກໂນໂລຊີ ປັນຍາພິວັດ. ຈຸດປະສົງຂອງການລົງນາມໃນຄັ້ງນີ້ ເພື່ອເປັນການຊຸກຍູ້ສົ່ງເສີມການສຶກສາອາຊີວະສຶກສາ ລະບົບທະວີພາຄີ ໃຫ້ນັກຮຽນລະດັບປະກາຊະນີຍະບັດ ວິຊາຊີບ (ປວຊ) ແລະ ລະດັບປະກາຊະນີຍະບັດ ວິຊາຊີບຊັ້ນສູງ (ປວສ) ປະເພດວິຊາບໍລິຫານທຸລະກິດ, ສາຂາການຈັດການທຸລະກິດການຄ້າຍ່ອຍ, ສາຂາການທຸລະກິດການຄ້າຍ່ອຍສະໄໝໃໝ່ ແລະ ສາຂາອື່ນໆ ທີ່ເໝາະກັບຄວາມຕ້ອງການຂອງສະຖານທີ່ປະກອບການ ຕະຫຼອດຮອດສົ່ງເສີມສະໜັບສະໜູນໃຫ້ນັກຮຽນໄດ້ພັດທະນາການຮຽນຮູ້ທັກສະ ແລະ ປະສົບການຕົວຈິງຈາກການຝຶກປະຕິບັດ ການຝຶກອາຊີບໃນສະຖານທີ່ປະກອບການ ໂດຍຈະຮ່ວມມືກັນພັດທະນາຫຼັກສູດການຮຽນ-ການສອນ, ການຝຶກອົບຮົມ ຕາມຫຼັກສູດອາຊີວະສຶກສາ ລະບົບທະວິພາຄີ ພ້ອມທັງປະສານຄວາມຮ່ວມມືໃນການຝຶກອົບຮົມພັດທະນາຄູ ແລະ ບຸກຄະລາກອນທາງການສຶກສາ ເພື່ອມຸ່ງເນັ້ນຜະລິດ ແລະ ພັດທະນາກຳລັງຄົນທີ່ມີປະສິດທິພາບສອດຄ່ອງກັບຄວາມຕ້ອງການຂອງຕະຫຼາດແຮງງານ ແລະ ສະຖານທີ່ປະກອບການທັງພາຍໃນ ແລະ ຕ່າງປະເທດ.