ກະຊວງສຶກສາພົບເຫັນການຮຽນ-ການສອນທາງໄກບໍ່ທົ່ວເຖິງ ແລະ ບໍ່ໄດ້ຄຸນນະພາບ

​ເຜີຍ​ແຜ່​ໂດຍ: admin|ຢ້ຽມ​ຊົມ: 47 ຄັ້ງ | ເວ​ລາ | 2024-11-21 17:17:51 ອັບ​ເດດ​ຄັ້ງ​ລ້າ​ສຸດ ໂດຍ: admin ເວ​ລາ 0000-00-00 00:00:00

ກະຊວງສຶກສາທິການ ແລະ ກິລາ (ສ​ສກ) ໄດ້ຕັດສິນໃຈເປີດການຮຽນ-ການສອນໃນຮູບແບບທາງໄກໃນໄລຍະໂຄວິດ-19 ມີການແຜ່ລະບາດ ທັງນີ້ໄດ້ມີການປັບຫຼັກສູດຈຳ​ນວນ​ໜຶ່ງໃຫ້ສາມາດຈັດການຮຽນ-ການສອນໄດ້ໃນເວລາທີ່ສັ້ນລົງສໍາລັບການສຶກສາກ່ອນໄວຮຽນ ແລະ ສາຍສາມັນສຶກສາເພື່ອສືບຕໍ່ປະຄັບປະຄອງ, ການຮຽນ-ການສອນຢ່າງຕໍ່ເນື່ອງ ຊຶ່ງໄດ້ມີການປັບທາງດ້ານໂຄງສ້າງວິຊາຮຽນ ແລະ ເວລາຮຽນ, ປັບໂຄງສ້າງເນື້ອໃນວິຊາຮຽນ, ວິທີ ສອນ, ການປະເມີນຜົນ ແລະ ອື່ນໆ.

ທ່ານ ພຸດ ສິມມາລາວົງ ລັດ​ຖະ​ມົນຕີ​ກະຊວງ​ ສ​ສກ ໄດ້ຊີ້ແຈງຄຳຊັກຖາມຂອງສະມາຊິກສະພາແຫ່ງຊາດ ຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດຊຸດທີ IX ໃນວັນທີ 4 ພະຈິກຜ່ານມານີ້, ກ່ຽວກັບການຈັດຕັ້ງການຮຽນ-ການສອນແບບທາງໄກ ທ່ານກ່າວ​ວ່າ: ໃນສົກຮຽນ 2021-2022 ເພື່ອຮັບປະກັນໃຫ້ສາມາດຈັດຕັ້ງການຮຽນ-ການສອນໄດ້ປົກກະຕິ ​ທາງກະຊວງໄດ້ມີວິທີການ ແລະ ມາດຕະການ ເພື່ອປັບປຸງຄຸນນະພາບຂອງການສຶກສາເປັນຕົ້ນຄຸນນະພາບຂອງຄູ-ອາຈານ, ຄຸນນະພາບຂອງການຮຽນ-ການສອນແບບທາງໄກ ເຖິງແມ່ນວ່າພະຍາດໂຄວິດ-19 ຍັງສືບຕໍ່ມີ​ການລະບາດໃນຫຼາຍແຂວງ ຊຶ່ງ​ໃນ​ໄລ​ຍະຂອງ​ການ​ຈັດ​ຕັ້ງ​ປະ​ຕິ​ບັດການ​ຮຽນ-ການ​ສອນ​ ພວ​ກ​ເຮົາໄດ້ພົບເຫັນຫຼາຍສາເຫດທີ່ຍັງເປັນສິ່ງທ້າທາຍທົດ​ສອບເຮັດໃຫ້ການຮຽນ-ການສອນທາງໄກບໍ່ທົ່ວເຖິງ ແລະ ບໍ່ໄດ້ຄຸນນະພາບເຊັ່ນ: ຄວາມພ້ອມດ້ານພື້ນຖານໂຄງລ່າງເພື່ອສຸມໃສ່ການຫັນປ່ຽນຈາກການຮຽນແບບເຊິ່ງໜ້າປົກກະຕິມາເປັນການສຶກສາແບບທາງໄກໃຫ້ໄດ້ຄຸນນະພາບ ຕິດພັນກັບການຫັນເປັນທັນສະໄໝ ແລະ ວິຖີຊີວິດປົກກະຕິແບບໃໝ່ຍັງຈຳກັດ, ມີພຽງນັກຮຽນຈຳນວນໜຶ່ງທີ່ພໍ່ແມ່-ຜູ້ປົກຄອງ ສາມາດຊື້ເຄື່ອງມືອີເລັກໂຕຣນິກເຊັ່ນ: ແທບເລັດ/ໂນດບຸກ ຫຼື ສະມາດໂຟນໃຫ້ແກ່ລູກຫຼານຂອງຕົນໄດ້, ຄ່າອິນເຕີເນັດຍັງແພງ, ໂຮງຮຽນຫຼາຍແຫ່ງບໍ່ມີໄຟຟ້າໃຊ້, ການຊົມໃຊ້ຊ່ອງໂທລະພາບສຶກສາກິລາຂອງປະຊາຊົນຍັງຈຳກັດລວມເຖິງຄວາມພ້ອມຂອງຜູ້ບໍລິຫານການສຶກສາ ແລະ ກິລາ ທຸກຂັ້ນ ແລະ ຄຸນນະພາບຂອງຄູ-ອາຈານ ຍັງບໍ່ທັນມີຄວາມພ້ອມສູງ, ງົບປະມານບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການຕົວຈິງຂອງການພັດທະນາການສຶກສາ ແລະ ກິລາ ໃນໄລຍະໃໝ່ເຊັ່ນ: ໃນປີ 2019 ຂະແໜງການສຶກສາ ແລະ ກິລາ ໄດ້ຮັບງົບປະມານພຽງແຕ່ 12,6% ຂອງລາຍຈ່າຍລັດຖະບານ, ປີ 2020 ໄດ້ 11,3% ແລະ ປີ 2021 ໄດ້ 12,73%, ການປຸກລະດົມປະຊາຊົນ, ພໍ່ແມ່ຜູ້ປົກຄອງ, ຜູ້ປະກອບການ ແລະ ພາກສ່ວນໃນສັງຄົມ ເພື່ອຍູ້ແຮງການພັດທະນາການສຶກສາ ແລະ ກິລາ ເພື່ອເຂົ້າຮ່ວມການປະຕິບັດສິດ ແລະ ພັນທະຕໍ່ການສຶກສາ ແລະ ກິລາ ຍັງເຮັດບໍ່ໄດ້ດີ ແລະ ເລິກເຊິ່ງເທົ່າທີ່ຄວນ.

ການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ຂະແໜງການສຶກສາທົ່ວໂລກ ຫັນໄປສູ່ການຈັດການຮຽນ-ການສອນໃນຮູບແບບທາງໄກ ແລະ ອອນລາຍຫຼາຍຂຶ້ນ ເພື່ອຮັບປະກັນຄວາມພ້ອມຂອງນັກຮຽນ-ນັກສຶກສາ, ບັນຫາຄຸນນະພາບຂອງການຮຽນທາງໄກຍັງເປັນສິ່ງທ້າທາຍໃນຫຼາຍປະເທດລວມທັງປະເທດລາວ, ການນໍາໃຊ້ຮູບແບບການຮຽນດັ່ງກ່າວເປັນຫຼັກກໍຍັງບໍ່ທັນແທດເໝາະກັບເດັກນ້ອຍເທົ່າທີ່ຄວນ ເພາະເຂົາເຈົ້າຍັງຕ້ອງການ ການດູແລເອົາໃຈໃສ່ຈາກຄູ ແລະ ຜູ້ປົກຄອງຢ່າງໃກ້ຊິດ, ສະນັ້ນ ມີ​ຄວາມ​ຈຳ​ເປັນ​ຢ່າງ​ຍິ່ງທີ່​ຈະ​ຕ້ອງ​ໄດ້ປັບປຸງຄຸນນະພາບການສຶກສາ ຄຸນນະພາບຂອງຄູ-ອາຈານ ແລະ ຄຸນນະພາບການຮຽນ-ການສອນທາງໄກ ເພື່ອສ້າງຄວາມເຂັ້ມ​ແຂງໃຫ້​ຂະ ​ແໜ​ງ​ການ​ສຶ​ກສາມີ​ຄວາມ​ຍືນ​ຍົງ.

 

(ແຫຼ່ງ: ປະ​ຊາ​ຊົນ, ຂ່າວ-ພາບ: ພູ​ວັນ) /  5-11-2021