ປະທານສະພາແຫ່ງຊາດ ມອບເຄື່ອງກອງນ້ຳສະອາດ ໃຫ້ບ້ານສົມສະໄໝ

​ເຜີຍ​ແຜ່​ໂດຍ: admin|ຢ້ຽມ​ຊົມ: 28 ຄັ້ງ | ເວ​ລາ | 2024-11-21 17:20:58

(ສພຊ) ໃນວັນທີ 29 ສິງຫາ 2023 ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວມອບເຄື່ອງກອງນໍ້າສະອາດ ທີ່ໄດ້ຕິດຕັ້ງສໍາເລັດແລ້ວ ໃຫ້ແກ່ບ້ານສົມສະໄໝ ເມືອງໄຊທານີ ນະຄອນຫຼວງວຽງຈັນ ເຊິ່ງເຄື່ອງດັ່ງກ່າວ ແມ່ນໄດ້ຮັບການຊ່ວຍເຫຼືອຈາກບໍລິສັດ ທີ່ປຶກສາ ດາຊານ ສ. ເກົາຫຼີ.

ໂອກາດດັ່ງກ່າວ ທ່ານ ເກດແກ້ວ ສີຫາລາດ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ໃນນາມຄະນະຈັດຕັ້ງພິທີ ໄດ້ລາຍງານໃຫ້ຮູ້ວ່າ: ໃນລະຫວ່າງທ້າຍເດືອນກັນຍາ 2022 ຕາງໜ້າຈາກ ກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ກໍາມາທິການການຕ່າງປະເທດ, ອົງການປົກຄອງເມືອງ 3 ເມືອງ ແລະ ອົງການປົກຄອງບ້ານທັງ 3 ບ້ານຄື: ບ້ານນາຫອຍປັງ ເມືອງສັງທອງ, ບ້ານສົມສະໄໝ ເມືອງໄຊທານີ ແລະ ບ້ານຊຽງແລນາ ເມືອງປາກງື່ມ ຮ່ວມກັບຄະນະຊ່ຽວຊານຂອງບໍລິສັດ ທີ່ປຶກສາດາຊານ ສ. ເກົາຫຼີ ໄດ້ລົງສໍາຫຼວດກວດກາ ແລະ ເປັນເອກະພາບກັນ ກໍານົດຈຸດທີ່ຈະຕັ້ງເຄື່ອງກອງນໍ້າສະອາດ; ບໍລິສັດ ທີ່ປຶກສາ ດາຊານ ສ. ເກົາຫຼີ ໄດ້ເອົານໍ້າແຕ່ລະຈຸດທີ່ຈະຕິດຕັ້ງໄປວິໄຈ ເພື່ອກໍານົດມາດຕະຖານເຄື່ອງກອງນໍ້າໃຫ້ຖືກຕາມເປົ້າໝາຍ ຕາມສະພາບຕົວຈິງຂອງແຕ່ລະເຂດ. ປະຕິບັດຕາມແຜນການເຄື່ອນໄຫວທີ່ໄດ້ກໍານົດ ຕາງໜ້າກໍາມາທິການເສດຖະກິດ, ເຕັກໂລໂລຊີ ແລະ ສິ່ງແວດລ້ອມ, ກໍາມາທິການການຕ່າງປະເທດ ສະພາແຫ່ງຊາດ ປະສານສົມທົບກັບອົງການປົກຄອງເມືອງທັງ 3 ເມືອງ ແລະ ອົງການປົກຄອງບ້ານທັງ 3 ບ້ານ ຮ່ວມກັບຄະນະວິຊາການບໍລິສັດທີ່ປຶກສາ ດາຊານ ສ. ເກົາຫຼີ ໄດ້ຕິດຕັ້ງເຄື່ອງກອງນໍ້າທັງ 3 ເຄື່ອງ ໃນ 3 ບ້ານສຳເລັດໃນລະຫວ່າງວັນທີ 7-9 ມິຖຸນາ 2023, ໃນວັນທີ 13-14 ມິຖຸນາ 2023 ໄດ້ລົງຕິດຕາມກວດກາ ແລະ ໃຫ້ການແນະນໍາກ່ຽວກັບການຄຸ້ມຄອງນໍາໃຊ້; ໃນຕອນແລງຂອງວັນທີ 14 ມິຖຸນາ 2023 ໄດ້ຈັດພິທີ ມອບ-ຮັບ ເຄື່ອງກອງນໍ້າ ລະຫວ່າງ ບໍລິສັດທີ່ປຶກສາ ດາຊານ ສ. ເກົາຫຼີ ແລະ ສະພາແຫ່ງຊາດ ຢ່າງເປັນທາງການ ໂດຍການເຂົ້າຮ່ວມພິທີດັ່ງກ່າວ ຕາງໜ້າຈາກ ບັນດາກໍາມາທິການພາຍໃນສະພາແຫ່ງຊາດ, ເອກອັກຄະລັດຖະທູດ ສ. ເກົາຫຼີ ປະຈໍາ ສປປລາວ, ກົມຊົນລະປະທານ, ກົມກ່ຽວຂ້ອງ ພາຍໃນສະພາແຫ່ງຊາດ, ອົງການປົກຄອງເມືອງທັງ 3 ເມືອງ ແລະ ອົງການປົກຄອງບ້ານທັງ 3 ບ້ານ.

ຈາກນັ້ນ, ທ່ານ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມກຸ່ມຜະລິດກະສິກຳອິນຊີ ບ້ານທ່າຊ້າງ ເມືອງປາກງື່ມ ນະຄອນຫຼວງວຽງຈັນ ເຊິ່ງໄດ້ຮັບຟັງການລາຍງານສະພາບລວມກ່ຽວກັບກຸ່ມຜະລິດກະສິກຳອິນຊີ ຈາກພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ ແລະ ຕາງໜ້າກຸ່ມຜະລິດກະສິກຳທ່າຊ້າງ. ຈາກນັ້ນ, ຄະນະ ຍັງໄດ້ຢ້ຽມຊົມເຂດທຳການຜະລິດຕື່ມອີກ.

ໂອກາດນີ້, ທ່ານປະທານສະພາແຫ່ງຊາດ ໄດ້ມີຄຳເຫັນໂອ້ລົມວ່າ: ໃຫ້ອຳນາດການປົກຄອງບ້ານ ແລະ ພໍ່ແມ່ປະຊາຊົນ ເອົາໃຈໃສ່ປົກປັກຮັກສາເພື່ອນຳໃຊ້ເຄື່ອງກອງນ້ຳດັ່ງກ່າວ ໃຫ້ເກີດປະໂຫຍດ ແລະ ນຳໃຊ້ໃຫ້ໄດ້ຍາວນານ, ເອົາໃຈໃສ່ຮັກສາສຸຂະນາໄມດື່ມນ້ຳສະອາດ, ຮັກແພງສາມັກຄີຊ່ວຍເຫຼືອ ເຊິ່ງກັນ ແລະ ກັນ ຮັກສາຄວາມສະຫງົບພາຍໃນບ້ານ, ຊຸກຍູ້ສົ່ງເສີມໃຫ້ລູກຫຼານໄດ້ເຂົ້າສຶກສາຮ່ຳຮຽນຢ່າງເປັນປົກກະຕິ. ສຳລັບກຸ່ມຜະລິດກະສິກຳອິນຊີ ບ້ານທ່າຊ້າງແມ່ນໃຫ້ສືບຕໍ່ເອົາໃຈໃສ່ທຳການຜະລິດໃຫ້ໄດ້ຫຼາຍ ເຊິ່ງຈະເປັນການສ້າງເສດຖະກິດໃຫ້ແກ່ຊຸມຊົນ ກໍຄືພໍ່ແມ່ປະຊາຊົນໃຫ້ກຸ້ມຢູ່ກຸ້ມກິນ ສາມາດຜະລິດເປັນສິນຄ້າສົ່ງອອກທັງພາຍໃນ ແລະ ຕ່າງປະເທດ ທັງເປັນການສ້າງວຽກເຮັດງານທຳໃຫ້ປະຊາຊົນ ຫຼຸດຜ່ອນການໄປອອກແຮງງານຢູ່ຕ່າງປະເທດ.