ລັດຖະມົນຕີກະຊວງສຶກສາຮຽກຮ້ອງຄູລາວພັດທະນາໃຫ້ກ້າວທັນ ກັບການປ່ຽນແປງຂອງວິທະຍາສາດ ແລະ ເຕັກໂນໂລຊີ

​ເຜີຍ​ແຜ່​ໂດຍ: admin|ຢ້ຽມ​ຊົມ: 65 ຄັ້ງ | ເວ​ລາ | 2024-11-21 15:28:03

ໃນເນື່ອງໂອກາດວັນຄູແຫ່ງຊາດ ຄົບຮອບ 28 ປີ (07 ຕຸລາ 1994-07 ຕຸລາ 2022) ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ ຮຽກຮ້ອງໃຫ້ຄູລາວທົ່ວປະເທດ ຕ້ອງພັດທະນາ 3 ຢ່າງ ເພື່ອໃຫ້ກ້າວທັນກັບການປ່ຽນແປງຂອງວິທະຍາສາດ ແລະ ເຕັກໂນໂລຊີ .

ທ່ານລັດຖະມົນຕີ ກະຊວງສຶກສາທິການ ແລະ ກິລາກ່າວວ່າ: ຄູລາວທົ່ວເທດ ຕ້ອງພັດທະນາ 3 ຢ່າງ ເພື່ອໃຫ້ກ້າວທັນກັບການປ່ຽນແປງຂອງວິທະຍາສາດ ແລະ ເຕັກໂນໂລຊີ, ຊຶ່ງປະກອບມີໜຶ່ງ: ຕ້ອງໄດ້ຄົ້ນຄວ້າລົງເລິກວິຊາທີ່ຕົນຮັບຜິດຊອບໃຫ້ເລິກເຊິ່ງ, ການສອນວິຊາສະເພາະຕ້ອງຕິດພັນກັບການນຳໃຊ້ຕົວຈິງກັບຊີວິດສັງຄົມ ສາມາດປະສົມປະສານແຫຼ່ງການຮຽນຮູ້ທີ່ມີຢ່າງຫຼາກຫຼາຍໃນປັດຈຸບັນໃຫ້ເກີດປະໂຫຍດສູງສຸດໃນການຮຽນຂອງຜູ້ຮຽນ. ນອກຈາກຈະມີວິຊາສະເພາະແລ້ວຕ້ອງຮຽນຮູ້ບັນດາທັກສະສະຕະວັດທີ 21 ເຊັ່ນ: ການນຳໃຊ້ເຕັກໂນໂລຊີ ຂໍ້ມູນຂ່າວສານ, ທັກສະການຮຽນດ້ວຍຕົນເອງ, ທັກສະທາງດ້ານສັງຄົມ, ຮູ້ນຳໃຊ້ພາສາຕ່າງປະເທດ ແລະ ອື່ນໆ.ສອງ: ຕ້ອງເປັນຜູ້ນຳພາເຮັດຕົວຈິງໃນທຸກພາລະກິດທີ່ພັກ-ລັດ ມອບໝາຍໃຫ້ສຳເລັດ, ມີຄຸນນະພາບ ແລະ ດ້ວຍຄວາມຮັບຜິດຊອບສູງ ເຊັ່ນ: ຜັນຂະຫຍາຍຈິດໃຈ 3 ລັກສະນະ ແລະ 5 ຫຼັກມູນການສຶກສາ ຕິດພັນກັບ ຂໍ້ແຂ່ງຂັນ ຮັກຊາດ ແລະ ພັດທະນາ ແລະ 3 ຂໍ້ແຂ່ງຂັນຂອງຂະແໜງການຄື ສອນດີ-ຮຽນເກັ່ງ, ຕ້ານປະກົດການຫຍໍ້ທໍ້ ແລະ ສ້າງສະພາບແວດລ້ອມທີ່ດີໃນສະຖານການສຶກສາ ໃຫ້ເປັນຮູບປະທຳແລະສາມ:ຕ້ອງເປັນຜູ້ທີ່ມີຈັນຍາບັນອັນໜັກແໜ້ນ ແລະ ມີຈິດວິນຍານຂອງຄວາມເປັນຄູຢ່າງເລິກເຊິ່ງ; ໃຫ້ຮັກສາ ແລະ ເສີມຂະຫຍາຍມູນເຊື້ອແຫ່ງຄວາມສາມັກຄີກັນເປັນປຶກແຜ່ນແໜ້ນໜາ, ນໍ້າໃຈອາສາສະໝັກ, ຄວາມເປັນແບບຢ່າງທັງດ້ານແນວຄິດ ແລະ ການກະທຳ.

ຈາກ, ໜັງສືພິມສຶກສາ ແລະກິລາ