ພາວະຜູ້ນຳ

ສະຫຼອງວັນສ້າງຕັ້ງ ກອງທັບປະຊາຊົນລາວ ຄົບຮອບ 71 ປີ

ເຜີຍແຜ່ໂດຍ: admin|ຢ້ຽມຊົມ: 23 ຄັ້ງ | ເວລາ | 2024-11-23 21:02:04

ທ່ານ ປອ ຄຳພັນ ພົມມະທັດ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກເຂົ້າຮ່ວມສະຫຼອງວັນສ້າງຕັ້ງ ກອງທັບປະຊາຊົນລາວ ຄົບຮອບ 71 ປີ

ການສະແດງກຳລັງ ພາຍໃຕ້ລະຫັດ “ຄົມໃນຟັກ-01 2020” ຂອງເຫຼົ່າຮົບສືບຂ່າວ ກອງທັບປະຊາຊົນລາວ ໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ (20 ມັງກອນ 1949) ແລະ ວັນສ້າງຕັ້ງເຫຼົ່າຮົບສືບຂ່າວ ກອງທັບປະຊາຊົນລາວ ຄົບຮອບ 65 ປີ (25 ມັງກອນ 1954) ໄດ້ຈັດຂຶ້ນໃນວັນທີ 17 ມັງກອນນີ້, ທີ່ສະໜາມຝຶກແອບ ວິທະຍາຄານກົມມະດຳ.ໃຫ້ກຽດເຂົ້າຮ່ວມຊົມ ໂດຍມີ ທ່ານ ທອງລຸນ ສີສຸລິດ ນາຍົກລັດຖະມົນຕີ, ຮອງນາຍົກລັດຖະມົນຕີ, ມີທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ ແລະ ທ່ານ ປອ ຄຳພັນ ພົມມະທັດ ຫົວໜ້າຄະນະໂຄສະນາອົບຮົມສູນກາງພັກ, ມີບັນດາການນຳພັກ-ລັດ, ພ້ອມດ້ວຍ ພະນັກງານ ນາຍ ແລະ ພົນທະຫານເຂົ້າຮ່ວມ.
ໂອກາດນີ້, ທ່ານ ພັນໂທ ສີເພັງ ສຸລະເດດ ຫົວໜ້າຫ້ອງເສນາທິການ ກົມ 213 ຜູ້ບັນຊາພາກສະໜາມ ກ່າວວ່າ: ການສະແດງໃນຄັ້ງນີ້ ເພື່ອສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ແລະ ວັນສ້າງຕັ້ງເຫຼົ່າຮົບສືບຂ່າວ, ທັງເປັນການຮັບປະກັນໃຫ້ກຳລັງກົມກອງເຫຼົ່າຮົບສືບຂ່າວ ໄດ້ຮັບການອົບຮົມຫັດແອບຢ່າງຕໍ່ເນື່ອງ, ປະຕິບັດລະບຽບພາກສະໜາມ, ມີຄວາມຊຳນິຊຳນານທາງດ້ານສິລະປະຍຸດ, ຍຸດທະວິທີສືບຂ່າວ, ເຕັກນິກການນຳໃຊ້ອາວຸດ-ກະສູນ, ອຸ ປະກອນປະກອບສະເພາະສືບຂ່າວ ແລະ ຮູບແບບການປະຕິບັດໜ້າທີ່ສູ້ຮົບປະສານກັບເຫຼົ່າຮົບທະຫານອາກາດ ກຽມພ້ອມປະຕິບັດໜ້າທີ່ແກ້ໄຂສະພາບການຕ່າງໆ ຕາມຄຳສັ່ງຂອງຂັ້ນເທິງ ໃນສະເພາະໜ້າ ແລະ ຍາວນານ.
ໃນຫຼາຍປີທີ່ຜ່ານມາ, ກຳ ລັງກົມກອງເຫຼົ່າຮົບສືບຂ່າວ ໄດ້ຈັດຕັ້ງອົບຮົມ-ຫັດແອບ ຕາມຄຳສັ່ງອົບຮົມ-ຫັດແອບປະຈຳປີ ຂອງກົມອົບຮົມ ກົມໃຫຍ່ການເມືອງກອງທັບຢ່າງຕໍ່ເນື່ອງ ໂດຍໄດ້ສຸມໃສ່ອົບຮົມ-ຫັດແອບການທະຫານ ແລະ ການບັນຊາ, ໃນນີ້ ໄດ້ສຸມໃສ່ອົບຮົມ-ຫັດແອບສິລະປະຍຸດ ແລະ ຍຸດທະວິທີສືບຂ່າວເປັນຈຸດໜັກ.
ການສະແດງໃນຄັ້ງນີ້ປະກອບມີ ການສະແດງສິລະປະ, ການສະແດງມວຍສືບຂ່າວ (ມວຍຫັດກາຍຊາຍ, ມວຍສູ້ຮົບຊາຍ-ຍິງ, ສືບຂ່າວຂ້າມຜ່ານສິ່ງກີດຂວາງ ແລະ ໝອບສືບຂ່າວກຳລັງພາຍໃນ), ການໂດດຈ້ອງສະແດງກຳລັງ, ການຍິງເປີດປ້າຍຄຳຂວັນ, ການປະຕິບັດໜ້າທີ່ຕີ-ຈັບຜູ້ບັນຊາແກນນຳກຸ່ມຊຸມນຸມປະທ້ວງ, ການບຸກຈັບຜູ້ບັນຊາແກນນຳ-ກອບກູ້ຊ່ວຍເຫຼືອຕົວປະກັນ, ການໂດດຈ້ອງລົງແນວຫຼັງ ປິດລັບບັງເອີນຫຼອນຕີທຳລາຍຂຸມປືນໃຫຍ່ຂອງສັດຕູ, ການບິນສະແດງຂອງຍົນສູ້ຮົບ ແລະ ລາຍການສະແດງອື່ນໆອີກ
ໃນໂອກາດນີ້, ທ່ານ ທອງລຸນ ສີສຸລິດ ໄດ້ໃຫ້ກຽດມີຄຳເຫັນໂອ້ລົມວ່າ: ຊຶ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ 65 ປີແຫ່ງການເຕີບໃຫຍ່ເຂັ້ມແຂງ ຂໍໃຫ້ບັນດາສະຫາຍ ນາຍ ແລະ ພົນທະຫານ ສືບຕໍ່ກຽມພ້ອມຮັບມືກັບບັນດາສິ່ງທ້າທາຍທີ່ອາດຈະເກີດຂຶ້ນ ຮຽກຮ້ອງໃຫ້ບັນດາສະຫາຍເພີ່ມທະວີສະຕິລະວັງຕົວສືບຕໍ່ຝຶກຝົນຫຼໍ່ຫຼອມທັງສືບຕໍ່ຮໍ່າຮຽນສິລະປະຍຸດ, ຍຸດທະວິທີເພື່ອປະຕິບັດໜ້າທີ່ໆ ພັກ-ລັດ ແລະ ປະຊາຊົນມອບໝາຍໃຫ້ ຂໍໃຫ້ສົມກັບຊື່ລະຫັດຊ້ອມຮົບເທື່ອນີ້ຄື: ຄົມໃນຟັກ ຢ່າງແທ້ຈິງຮຽກຮ້ອງ ແລະ ໃຫ້ສືບຕໍ່ປະກອບສ່ວນໃນການປະຕິບັດ 4 ໜ້າທີ່ໃຫຍ່ ແລະ 26 ແຜນງານຂອງກະຊວງປ້ອງກັນປະເທດວາງອອກ ຂໍອວຍພອນໃຫ້ 71 ປີຂອງກອງທັບປະຊາຊົນລາວ ແລະ 65 ປີຂອງເຫຼົ່າຮົບສືບຂ່າວຈົ່ງປະສົບຜົນສຳເລັດໃນໜ້າທີ່ ທີ່ ພັກ-ລັດ ມອບໝາຍໃຫ້ຢ່າງໃຫຍ່ຫຼວງ.

ທີ່ມາ: ວຽງຈັນໃໝ່

ຂ່າວໃໝ່ລ່າສຸດ 7 ອັນດັບ