ພິທີລົງນາມ 2 ສັນຍາການຮ່ວມມືທາງດ້ານເສດຖະກິດດິຈິຕ໋ອນລະຫວ່າງລັດຖະບານ ແຫ່ງ ສປປ ລາວ ແລະ ສປ ຈີນ

​ເຜີຍ​ແຜ່​ໂດຍ: admin|ຢ້ຽມ​ຊົມ: 31 ຄັ້ງ | ເວ​ລາ | 2024-11-21 18:18:04

ພິທີລົງນາມ 2 ສັນຍາການຮ່ວມມືທາງດ້ານເສດຖະກິດດິຈິຕ໋ອນລະຫວ່າງລັດຖະບານ ແຫ່ງ ສປປ ລາວ ແລະ ສປ ຈີນ ໃນກອງປະຊຸມ “ໜຶ່ງແລວທາງ ໜຶ່ງເສັ້ນທາງ” ເພື່ອການຮ່ວມມືສາກົນ ຄັ້ງທີ 03 ຢູ່ ນະຄອນຫຼວງ ປັກກິ່ງ, ສປ ຈີນ

...........................

ໃນໂອກາດທີ່ ຄະນະຜູ້ແທນຂັ້ນສູງ ຂອງ ສປປ ລາວ  ໄດ້ເດີນທາງໄປຢ້ຽມຢາມ ສາທາລະນະລັດ ປະຊາຊົນ ຈີນ ແລະ ເຂົ້າຮ່ວມງານ ເວທີ​ປາ​ໄສ ໜຶ່ງ​ແລວ​ໜຶ່ງ​ເສັ້ນທາງເພື່ອການຮ່ວມມືສາກົນ ຄັ້ງ​ທີ 3 ( The 3rd Belt and Road Forum for International Cooperation ) ລະຫວ່າງວັນທີ 19~20 ຕຸລາ 2023 ທີ່ຜ່ານມານີ້, ກະຊວງເຕັກໂນໂລຊີ ແລະ ການສື່ສານ ນໍາໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ​ ແຫ່ງ ສາທາລະນະລັດ ປະຊາທິປະໄຕ ປະຊາຊົນ ລາວ  ໄດ້ຮ່ວມລົງນາມ 2 ສັນຍາການຮ່ວມມືທາງດ້ານເສດຖະກິດດິຈິຕ໋ອນລະຫວ່າງລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນ ລາວ ແລະ ສາທາລະນະລັດ ປະຊາຊົນ ຈີນ ໃນກອງປະຊຸມ “ໜຶ່ງແລວທາງ ໜຶ່ງເສັ້ນທາງ” ເພື່ອການຮ່ວມມືສາກົນ ຄັ້ງທີ 03 ຄື: 1) ບົດບັນທຶກຄວາມເຂົ້າໃຈວ່າດ້ວຍການຮັດແໜ້ນການຮ່ວມມື ທາງດ້ານເສດຖະກິດດິຈິຕ໋ອນ ຮ່ວມກັບ ຄະນະກໍາມະການພັດທະນາ ແລະ ປະຕິຮູບ ແຫ່ງ ສປ ຈີນ ຊຶ່ງຕາງໜ້າຝ່າຍຈີນລົງນາມໂດຍ ທ່ານ ເຈິ້ງ ຊານເຈ້ຍ, ປະທານ ຄະນະກໍາມະການພັດທະນາ ແລະ ປະຕິຮູບ ແຫ່ງ ສປ ຈີນ; ແລະ 2) ສັນຍາວ່າດ້ວຍການຮ່ວມມືກ່ຽວກັບການນໍາໃຊ້ຊັ້ນອາວະກາດຢ່າງສັນຕິ ຮ່ວມກັບ ອົງການອາວະກາດ ແຫ່ງ ສປ ຈີນ ຊຶ່ງຕາງໜ້າຝ່າຍຈີນລົງນາມໂດຍ ທ່ານ ຈາງ ເຄີຈຽນ, ປະທານ ອົງການອາວະກາດ ແຫ່ງ ສປ ຈີນ.

ການລົງນາມ 2 ສັນຍາທີ່ສໍາຄັນໃນຄັ້ງນີ້ ກໍເພື່ອເສີມຂະຫຍາຍຄວາມສໍາຄັນຂອງເສດຖະກິດດິຈິຕ໋ອນ, ຮັດແໜ້ນຄວາມສາມັກຄີຮ່ວມມືຮອບດ້ານທີ່ໝັ້ນຄົງຍາວນານ ລະຫວ່າງ ສປປ ລາວ ແລະ ສປ ຈີນ, ໃຫ້ກຽດເຂົ້າຮ່ວມເປັນສັກຄີພະຍານໃນພິທີດັ່ງກ່າວໂດຍ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນ ລາວ ແລະ ພະນະທ່ານ ສີ ຈິ້ນຜິງ, ປະທານປະເທດ ແຫ່ງ ສາທາລະນະລັດ ປະຊາຊົນ ຈີນ ພ້ອມດ້ວຍຄະນະຜູ້ແທນຂັ້ນສູງ.