ພາວະຜູ້ນຳ

ນາຍົກລັດຖະມົນຕີ ຊີ້ນໍາບາງບັນຫາ ກ່ຽວກັບ ການຫັນເປັນດິຈິຕ໋ອນ ຂອງ ສປປ ລາວ

ເຜີຍແຜ່ໂດຍ: admin|ຢ້ຽມຊົມ: 24 ຄັ້ງ | ເວລາ | 2024-11-21 18:17:54

ໃນໂອກາດເຂົ້າຮ່ວມກອງປະຊຸມສໍາມະນາການນໍາລະດັບລັດຖະມົນຕີ ວ່າດ້ວຍການນໍາໃຊ້ກຸ່ມຂໍ້ມູນຜູກພັນ 4.0 ເພື່ອພັດທະນາເສດຖະກິດດິຈິຕ໋ອນຂອງ ສປປ ລາວ ໃນວັນທີ 26 ພຶດສະພາ 2023 ນີ້, ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ມີຄໍາເຫັນຊີ້ນໍາວ່າ: ໃນການຫັນເປັນດິຈິຕ໋ອນຂອງປະເທດເຮົາ ຈະຕ້ອງໄດ້ເອົາໃຈໃສ່ທິດທາງວຽກງານຕົ້ນຕໍຈຳນວນໜຶ່ງ ເປັນຕົ້ນແມ່ນ:

ບຸກທະລຸທາງດ້ານຈິນຕະນາການ ເພື່ອສ້າງຄວາມສຳນຶກທີ່ເປັນເອກະພາບ, ເສີມຂະຫຍາຍບົດບາດການນຳພາຂອງພັກ ແລະ ການຄຸ້ມຄອງລັດ, ສົ່ງເສີມການມີສ່ວນຮ່ວມທຸກອົງການຈັດຕັ້ງທາງດ້ານການເມືອງ-ສັງຄົມ, ປູກຈິດສຳນຶກໃຫ້ແກ່ຄະນະພັກ ແລະ ອຳນາດການປົກຄອງທຸກຂັ້ນ ເຫັນໄດ້ຄວາມສຳຄັນອັນຮີບດ່ວນ ແລະ ເຂົ້າຮ່ວມຢ່າງຕັ້ງໜ້າ ໃນການຫັນເປັນດິຈິຕອນ, ໂດຍຖືວຽກງານດັ່ງກ່າວເປັນວຽກງານຈຸດສຸມເຊື່ອມໂຍງກັບບັນດາເປົ້າໝາຍຂອງການພັດທະນາເສດຖະກິດ-ສັງຄົມ, ການປົກປັກຮັກສາສິ່ງແວດລ້ອມ, ການປ້ອງກັນຊາດ ປ້ອງກັນຄວາມສະຫງົບ ແລະ ຮັບປະກັນຄວາມປອດໄພຂອງທຸກຂະແໜງການ. ສ້າງ ແລະ ປັບປຸງນິຕິກຳຂອງທຸກໆຂະແໜງການໃຫ້ສອດຄ່ອງຮອງຮັບການຫັນເປັນດິຈິຕອນ ແລະ ສາມາດເຊື່ອມໂຍງກັບສາກົນຢ່າງເປັນເຈົ້າການ ເພື່ອສ້າງເງື່ອນໄຂສະດວກໃຫ້ແກ່ການຫັນເປັນດິຈິຕອນຂອງປະເທດເຮົາໃຫ້ເກີດມີແຫຼ່ງລາຍຮັບໃໝ່, ຜະລິດຕະພັນໃໝ່, ການບໍລິການໃໝ່ ແລະ ເສດຖະກິດແບບໃໝ່ທີ່ນຳໃຊ້ເຕັກໂນໂລຊີດິຈິຕ໋ອນ; ແຕ່ພ້ອມກັນນັ້ນ ຕ້ອງປ້ອງກັນຜົນກະທົບທາງລົບຕໍ່ກັບເສດຖະກິດ-ສັງຄົມໃຫ້ໄດ້ຢ່າງທັນການ; ຮັບປະກັນການປ້ອງກັນຊາດ, ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ ແລະ ຄວາມປອດໄພທາງໄຊເບີ; ສ້າງກົນໄກຄຸ້ມຄອງໃຫ້ເໝາະສົມກັບການພັດທະນາເສດຖະກິດດິຈິຕ໋ອນ, ສ້າງເງື່ອນໄຂທີ່ເອື້ອອຳນວຍໃຫ້ແກ່ການສ້າງນະວັດຕະກຳ, ຜະລິດຕະພັນ ແລະ ການບໍລິການຫັນເປັນດິຈິຕ໋ອນ, ສ້າງເຂດອຸດສາຫະກຳເຕັກໂນໂລຊີດິຈິຕ໋ອນ, ສ້າງມາດຕະຖານເຕັກນິກ ແລະ ຍົກສູງຄຸນນະພາບຂອງຜະລິດຕະພັນໃຫ້ໄດ້ມາດຕະຖານສາກົນ.
ພັດທະນາຊັບພະຍາກອນມະນຸດ ຕ້ອງມີຄຸນນະພາບສູງ ແລະ ສອດຄ່ອງກັບສະພາບການຫັນ ປ່ຽນຂອງຍຸກສະໄໝ ເພື່ອຮອງຮັບການຫັນເປັນດິຈິຕ໋ອນຂອງປະເທດເຮົາ. ເອົາໃຈໃສ່ຍົກລະດັບ ແລະ ປັບປຸງເນື້ອໃນການສຶກສາ ແລະ ການຝຶກອົບຮົມເພື່ອໃຫ້ພະນັກງານ, ນັກຮຽນຮູ້, ນັກສຶກສາ, ປັນຍາຊົນ ແລະ ທົ່ວສັງຄົມ ໃຫ້ສາມາດເຂົ້າເຖິງແຫຼ່ງຄວາມຮູ້ທາງດ້ານດິຈິຕ໋ອນ, ມີຫົວຄິດປະດິດສ້າງ ແລະ ມີການພັດທະນາໃຫ້ທັນກັບຄວາມກ້າວໜ້າຂອງເຕັກໂນໂລຊີທີ່ປ່ຽນແປງຢູ່ສະເໝີ; ສົ່ງເສີມການຮຽນຮູ້ທັກສະທາງດ້ານເຕັກໂນໂລຊີດິຈິຕ໋ອນຂັ້ນພື້ນຖານ ແລະ ພາສາຕ່າງປະເທດເຂົ້າໃນຫຼັກສູດການສຶກສາລະດັບສາມັນທົ່ວໄປ; ປັບປຸງວິທີການຮຽນການສອນໃຫ້ທັນສະໄໝ ບົນພື້ນຖານການນຳໃຊ້ເຕັກໂນໂລຊີດິຈິຕ໋ອນ; ຖືເອົາຄວາມຕ້ອງການທາງດ້ານຕະຫຼາດແຮງງານ ແລະ ການປະເມີນຂອງວິສາຫະກິດ ເປັນຕົວຊີ້ວັດໃນການປັບປຸງຄຸນນະພາບຂອງການຮຽນການສອນຢູ່ໃນມະຫາວິທະຍາໄລ; ສົ່ງເສີມໃຫ້ນັກຮຽນ-ນັກສຶກສາສ້າງທັກສະທາງດ້ານດິຈິຕ໋ອນ ແລະ ແຂ່ງຂັນຄວາມຮູ້ກ່ຽວກັບເຕັກໂນໂລຊີດິຈິຕ໋ອນ. ສ້າງນະໂຍບາຍ ແລະ ກົນໄກຊຸກຍູ້ ສົ່ງເສີມໃຫ້ບັນດາອົງການຈັດຕັ້ງ ແລະ ວິສາຫະກິດທີ່ກ່ຽວພັນກັບເຕັກໂນໂລຊີດິຈິຕ໋ອນ ມີສ່ວນຮ່ວມໂດຍກົງໃນການສົ່ງເສີມການສຶກສາ, ການຝຶກອົບຮົມເພື່ອສະໜັບສະໜູນການພັດທະນາເສດຖະກິດດິຈິຕ໋ອນ; ສົ່ງເສີມການຮ່ວມມືລະຫວ່າງພາກລັດ ແລະ ເອກະຊົນ ໃນການສ້າງສູນການສຶກສາ ແລະ ຝຶກອົບຮົມເຕັກໂນໂລຊີລະດັບສູງ ແນໃສ່ໃຫ້ນັກຮຽນ-ນັກສຶກສາ ສາມາດຂຸດຄົ້ນພອນສະຫວັນ ແລະ ຄວາມສາມາດບົ່ມຊ້ອນຂອງຕົນ, ຈັດຕັ້ງການບຳລຸງວິຊາຊີບ ແລະ ການຮຽນຮູ້ທັກສະໃໝ່ໃນດ້ານເຕັກໂນໂລຊີດິຈິຕ໋ອນ ໃຫ້ຜູ້ຫວ່າງງານ ຫຼື ຜູ້ທີ່ຕ້ອງການປ່ຽນອາຊີບໃໝ່; ຈັດຕັ້ງຝຶກອົບຮົມ ໃຫ້ແກ່ບັນດາພະນັກງານ-ລັດຖະກອນ ແລະ ແຮງງານທົ່ວໄປຢ່າງເປັນປະຈຳ ເພື່ອຍົກລະດັບທັກສະ ແລະ ຄວາມຊຳນານ ໃຫ້ທັນກັບສະພາບຂອງການຫັນເປັນດິຈິຕ໋ອນ.
ພັດທະນາພື້ນຖານໂຄງລ່າງທີ່ສຳຄັນຈຳນວນໜຶ່ງ ເພື່ອສ້າງຄວາມອາດສາມາດ ແລະ ຄວາມເຂັ້ມແຂງ ໃຫ້ແກ່ການຫັນເປັນດິຈິຕ໋ອນ, ເປັນຕົ້ນແມ່ນ: ປັບປຸງອິນເຕີເນັດຄວາມໄວສູງ ໃຫ້ມີຄຸນນະພາບໃນຂອບເຂດທົ່ວປະເທດ ໂດຍການຊຸກຍູ້ໃຫ້ບັນດາຫົວໜ່ວຍທຸລະກິດ ແລະ ວິສາຫະກິດເອກະຊົນມີສ່ວນຮ່ວມໃນການສ້າງພື້ນຖານໂຄງລ່າງໂທລະຄົມມະນາຄົມ ແລະ ໂຄງລ່າງພື້ນຖານອື່ນສຳລັບການຫັນເປັນດິຈິຕ໋ອນແຫ່ງຊາດ. ສ້າງ ແລະ ພັດທະນາສູນຂໍ້ມູນແຫ່ງຊາດ ເພື່ອນຳໃຊ້ຮ່ວມກັນຂອງທຸກອົງການຈັດຕັ້ງພັກ-ລັດ ໂດຍເຊື່ອມໂຍງກັບບັນດາສູນຂໍ້ມູນຂອງທ້ອງຖິ່ນ, ຮັບປະກັນຄວາມໝັ້ນຄົງ ແລະ ປອດໄພຂອງລະບົບຂໍ້ມູນທັງຂອງພາກລັດ ແລະ ເອກະຊົນ ໂດຍການຍົກລະດັບເຄື່ອງມື, ອຸປະກອນ ແລະ ພາຫະນະໃນການເກັບກຳ, ຮັກສາ, ປຸງແຕ່ງ ແລະ ປົກປ້ອງຂໍ້ມູນທີ່ເປັນຂອງສ່ວນລວມ. ຍົກລະດັບ ແລະ ປັບປຸງພື້ນຖານໂຄງລ່າງດ້ານເຕັກນິກ ເພື່ອຮັບປະກັນຄວາມປອດໄພຂໍ້ມູນ ແລະ ຕາໜ່າງເຄືອຂ່າຍ ໃຫ້ສອດຄ່ອງກັບບັນດານະໂຍບາຍ ແລະ ນິຕິກຳທີ່ກ່ຽວຂ້ອງກັບລະບົບຄວາມປອດໄພໄຊເບີຂອງປະເທດເຮົາ. ປັບປຸງພື້ນຖານໂຄງລ່າງຂອງບັນດາຂະແໜງການທີ່ເຫັນວ່າມີຄວາມສຳຄັນ ແລະ ຈຳເປັນເພື່ອສົ່ງເສີມຂະບວນການຫັນເປັນດິຈິຕ໋ອນ ໂດຍສະເພາະແມ່ນພື້ນຖານໂຄງລ່າງທາງດ້ານພະລັງງານ ແລະ ໂທລະຄົມມະນາຄົມໃຫ້ມີຄວາມສະດວກ ແລະ ໝັ້ນຄົງ.
ເອົາໃຈໃສ່ພັດທະນາອຸດສາຫະກຳເຕັກໂນໂລຊີເປັນບູລິມະສິດ ແລະ ເປັນຈຸດສຸມເພື່ອເຮັດໃຫ້ຂະແໜງການອຸດສາຫະກຳການຜະລິດ, ການທ່ອງທ່ຽວ ແລະ ການບໍລິການທີ່ເປັນອົງປະກອບສຳຄັນຂອງເສດຖະກິດປະເທດເຮົາມີການຂະຫຍາຍຕົວຢ່າງແຂງແຮງ. ສຸມໃສ່ພັດທະນາຂະແໜງການ ທີ່ມີຄວາມພ້ອມສູງ ແລະ ເປັນບູລິມະສິດ ເປັນຕົ້ນແມ່ນອຸດສາຫະກຳເຕັກໂນໂລຊີສື່ສານຂໍ້ມູນຂ່າວສານ, ເອເລັກໂຕຣນິກ, ໂທລະຄົມມະນາຄົມ, ຄວາມປອດໄພທາງໄຊເບີ, ໂຮງງານຜະລິດແບບອັດຕະໂນມັດ, ການທະນາຄານເອເລັກໂຕຣນິກ, ການຄ້າທາງເອເລັກໂຕຣນິກ, ການກະສິກຳດິຈິຕ໋ອນ, ການທ່ອງທ່ຽວດິຈິຕ໋ອນ, ວັດທະນະທຳດິຈິຕ໋ອນ, ສາທາລະນະສຸກດິຈິຕ໋ອນ, ການສຶກສາ ແລະ ຝຶກອົບຮົມດິຈິຕ໋ອນ. ຈັດສັນຊັບພະຍາກອນ ໃຫ້ແກ່ການຈັດຕັ້ງປະຕິບັດໂຄງການຄົ້ນຄວ້າທີ່ມີຄວາມສຳຄັນລະດັບຊາດ ໂດຍສະເພາະແມ່ນການຄົ້ນຄວ້າເຕັກໂນໂລຊີທີ່ເປັນບູລິມະສິດແບບມີຈຸດສຸມ ເປັນຕົ້ນແມ່ນເຕັກໂນໂລຊີດິຈິ ຕ໋ອນ, ເຕັກໂນໂລຊີກົນຈັກ, ເຕັກໂນໂລຊີພະລັງງານໃໝ່, ປັນຍາປະດິດ, ເຕັກໂນໂລຊີຊີວະພາບ, ເຕັກໂນໂລຊີທາງດ້ານການແພດ. ສ້າງນະໂຍບາຍ ແລະ ສະພາບແວລ້ອມທີ່ເອື້ອອຳນວຍ ເພື່ອສະໜັບສະໜູນການຄົ້ນຄວ້າ ແລະ ພັດທະນາເຕັກໂນໂລຊີ ໂດຍສະເພາະບັນດາແຜນງານສົ່ງເສີມນະວັດຕະກຳ ແລະ ການນຳໃຊ້ໝາກຜົນຂອງການຄົ້ນຄວ້າພັດທະນາຂອງຄົນລາວ.
ສັງຄົມມະນຸດກໍາລັງຫັນປ່ຽນຈາກອາລະຍະທໍາອຸດສາຫະກໍາໄປສູ່ອາລະຍະທໍາດິຈິຕ໋ອນ, ແລະ ເຕັກໂນໂລຊີດິຈິຕ໋ອນກໍາລັງຂະຫຍາຍຕົວຢ່າງວອງໄວ, ລະບົບປັນຍາປະດິດ (A.I.), ລະບົບເວັບໄຊທ໌ 3.0 (Web 3.0), ລະບົບກຸ່ມຂໍ້ມູນຜູກພັນ (Blockchain 4.0) ແລະອື່ນໆມາຮອດແລ້ວ. ພວກເຮົາຄວນຈະເປີດກວ້າງຢ່າງຕັ້ງໜ້າ, ຊອກຫາຊັບ ພະຍາກອນທົ່ວໂລກ ແລະ ຍິນດີຕ້ອນຮັບຜູ້ທີ່ມີພອນສະຫວັນດ້ານວິທະຍາສາດ, ກອງທຶນ ແລະໂຄງ ການທົ່ວໂລກເພື່ອຮ່ວມມືການພັດທະນາແລະ ການກໍ່ສ້າງກັບປະເທດລາວ, ຊຸກຍູ້ການຫັນເປັນດິຈິຕ໋ອນຢູ່ໃນບັນດາອົງການຈັດຕັ້ງພັກ, ລັດ ເພື່ອຍົກລະດັບການຄຸ້ມຄອງບໍລິຫານ ແລະ ບໍລິການຂອງບັນດາອົງການຈັດຕັ້ງຕ່າງໆໃຫ້ມີປະສິດທິພາບ ແລະ ມີປະສິດທິຜົນສູງ. ເອົາໃຈໃສ່ຊີ້ນຳ-ນຳພາການຫັນເປັນດິຈິຕ໋ອນຢ່າງຕັ້ງໜ້າຢູ່ໃນບັນດາອົງການຈັດຕັ້ງພັກ, ສະພາແຫ່ງຊາດ, ລັດຖະບານ, ແນວລາວສ້າງຊາດ ແລະ ອົງການຈັດຕັ້ງທາງການເມືອງ-ສັງຄົມ ໃຫ້ມີຄວາມເປັນເອກະພາບ. ສ້າງຖານຂໍ້ມູນດິຈິຕ໋ອນຂອງລັດຖະບານ ແລະ ຂອງບັນດາອົງການຈັດຕັ້ງລັດທຸກຂັ້ນໃຫ້ໄດ້ມາດຕະຖານສາກົນ ແລະ ສາມາດເຊື່ອມຕໍ່ຫາກັນໄດ້ ເພື່ອອຳນວຍຄວາມສະດວກໃຫ້ແກ່ປະຊາຊົນ ໄດ້ເຂົ້າເຖິງແຫຼ່ງຂໍ້ມູນຂ່າວສານທີ່ສຳຄັນຂອງພັກລັດຢ່າງທັນການ; ປັບປຸງ ແລະ ພັດທະນາພື້ນຖານໂຄງລ່າງ, ເຄື່ອງມືອຸປະກອນ ເພື່ອເກັບກຳ ແລະ ຄຸ້ມຄອງຂໍ້ມູນ ແລະ ການເຮັດທຸລະກຳແບບເອເລັກໂຕຣນິກຂອງບັນດາໜ່ວຍງານລັດຖະບານ. ຍົກລະດັບຄວາມຮູ້ຄວາມສາມາດໃຫ້ກັບບັນດາພະນັກງານການນຳ, ພະນັກງານຄຸ້ມຄອງ ແລະ ພະນັກງານລັດຖະກອນທົ່ວໄປທັງພາຍໃນອົງການຈັດຕັ້ງ ແລະ ບັນດາບໍລິສັດວິສາຫະກິດໃຫ້ໄດ້ມາດຕະຖານສອດຄ່ອງກັບການຫັນເປັນດິຈິຕອນ; ສ້າງກົນໄກ ແລະ ລະບຽບການໃນການປະສານງານ ແລະ ເຮັດວຽກຮ່ວມກັນຂອງບັນດາອົງການຈັດຕັ້ງລັດຢ່າງຊັດເຈນ ໃນການຈັດຕັ້ງປະຕິບັດບັນດາແຜນງານການຫັນເປັນດິຈິຕອນ ເພື່ອຫຼຸດຜ່ອນການເຮັດທຸລະກຳຮ່ວມກັນໃນຮູບແບບດັ່ງເດີມໃຫ້ໜ້ອຍທີ່ສຸດ ແລະ ຫັນປ່ຽນໄປສູ່ການດຳເນີນງານໃນຮູບແບບລັດຖະບານດິຈິຕ໋ອນ.

ເອົາໃຈໃສ່ສົ່ງເສີມ ແລະ ຂະຫຍາຍການຮ່ວມມືກັບບັນດາປະເທດເພື່ອນມິດຍຸດທະສາດ ແລະ ເຊື່ອມໂຍງກັບພາກພື້ນ ແລະ ສາກົນເພື່ອຍາດແຍ່ງເອົາບົດຮຽນ, ຄວາມຮູ້ ແລະ ການລົງທຶນຈາກຕ່າງປະເທດມາພັດທະນາການຫັນເປັນດິຈິຕ໋ອນ ຂອງ ສປປ ລາວ. ດຶງດູດ ແລະ ຍາດແຍ່ງ ການນຳໃຊ້ຊັບພະຍາກອນຈາກຕ່າງປະເທດ ແລະ ສາກົນຢ່າງມີປະສິດທິພາບເພື່ອສະໜັບສະໜູນການຄົ້ນຄວ້າເຕັກໂນໂລຊີ, ການປະດິດນະວັດຕະກຳ, ການດຳເນີນທຸລະກິດຂອງຜູ້ປະກອບການສະຕາດອັບ ແລະ ການຖ່າຍທອດເຕັກໂນໂລຊີໃຫ້ຄົນລາວ. ດຳເນີນສ້າງ ແລະ ປັບປຸງບັນດານະໂຍບາຍ ທີ່ຕິດພັນໂດຍກົງກັບການລົງທຶນຈາກຕ່າງປະເທດຕາມທິດຍົກສູງມາດຕະຖານເຕັກໂນໂລຊີ, ຊຸກຍູ້ການຮ່ວມທຸລະກິດ ແລະ ສ້າງຄວາມເຂັ້ມແຂງໃຫ້ແກ່ການເຊື່ອມໂຍງ ແລະ ການຖ່າຍທອດເຕັກໂນໂລຊີ ລະຫວ່າງວິສາຫະກິດພາຍໃນ ແລະ ວິສາຫະກິດຕ່າງປະເທດ; ຄຸ້ມຄອງກິດຈະກຳທຸລະກິດຂ້າມຊາດທີ່ບໍ່ມີການຈັດຕັ້ງ ຢູ່ໃນ ສປປ ລາວ ເພື່ອປ້ອງກັນສິດຜົນປະໂຫຍດຂອງຜູ້ປະກອບການພາຍໃນປະເທດ.

ຂ່າວໃໝ່ລ່າສຸດ 7 ອັນດັບ