ພາວະຜູ້ນຳ

ກອງປະຊຸມ ຄະນະກຳມະການບໍລິຫານງານ ຄັ້ງທີ 46 ຂອງອົງການໂທລະຄົມມະນາຄົມ ອາຊີ-ປາຊີຟິກ (APT) ທີ່ ບາງກອກ, ຣາຊະອານາຈັກໄທ

ເຜີຍແຜ່ໂດຍ: admin|ຢ້ຽມຊົມ: 52 ຄັ້ງ | ເວລາ | 2024-12-22 00:00:00

ກະຊວງເຕັກໂນໂລຊີ ແລະ ການສື່ສານ (ກຕສ) ນຳໂດຍ ທ່ານ ນາງ ພາວັນນາ ດວງບຸບຜາ, ຮອງຫົວໜ້າຫ້ອງການ ກຕສ, ຮອງປະທານຄະນະກຳມະການບໍລິຫານງານ ອົງການໂທລະຄົມມະນາຄົມ ອາຊີ-ປາຊີຟິກ (APT) ສົກປີ 2021-2023 ໄດ້ເຂົ້າຮ່ວມກອງປະຊຸມ ຄະນະກຳມະການບໍລິຫານງານ ຄັ້ງທີ 46 (46th Session of the Management Committee (MC-46)) ຂອງ APT ໃນລະຫວ່າງວັນທີ 13-16 ທັນວາ 2022 ຜ່ານມານີ້, ທີ່ບາງກອກ, ຣາຊະອານາຈັກໄທ ມີຜູ້ເຂົ້າຮ່ວມຈາກ 30 ປະເທດສະມາຊິກ APT ແລະ ຄະນະຈາກບັນດາກົມ/ທຽບເທົ່າ ພາຍໃນ ກຕສ ໄດ້ເຂົ້າຮ່ວມຜ່ານລະບົບກອງປະຊຸມທາງໄກ.

ກອງປະຊຸມຂອງຄະນະກຳມະການບໍລິຫານງານ ຄັ້ງທີ 46 (MC-46) ໄດ້ຈັດຂຶ້ນທຸກໆປີ ໂດຍມີວາລະປຶກສາຫາລືສຳຄັນ ເຊັ່ນ: ການລາຍງານ ບັນດາກິດຈະກຳ/ໂຄງການ ທີ່ໄດ້ຮັບອະນຸມັດ ໃນຊຸມປີຜ່ານມາ ທີ່ລວມ 01 ກິດຈະກຳ/ໂຄງການ ຂອງກົມແຜນການ ແລະ ການເງິນ (ກິດຈະກຳ ຫັນລະບົບຂໍ້ມູນ ຂອງ ສປປ ລາວ ເປັນທັນສະໄໝ), ພິຈາລະນາ ບັນດາກິດຈະກຳ/ໂຄງການ ທີ່ສະເໜີໃໝ່ ພາຍໃຕ້ກອງທຶນ APT, ບັນດາປະເທດຄູ່ຮ່ວມ ສປ ຈີນ (EBC-C), ສ. ເກົາຫຼີ (EBC-K) ແລະ ຍີ່ປຸ່ນ (EBC-J) ທີ່ລວມມີບັນດາ ກິດຈະກຳ/ໂຄງການ ຂອງ ກຕສ. ພ້ອມທັງ ທົບທວນຄືນບັນດາກິດຈະກຳ ປີ 2022 ແລະ ພິຈາລະນາແຜນກິດຈະກຳ, ຫົວຂໍ້ການຝຶກອົບຮົມໃໝ່ ຂອງສົກປີ 2023, ທົບທວນການຈັດຕັ້ງປະຕິບັດແຜນຍຸດທະສາດ 03 ປີ (2021-2023) ແລະ ຄົ້ນຄວ້າຮ່າງແຜນຍຸດທະສາດ ສະບັບໃໝ່ (2024-2026), ຄົ້ນຄວ້າຈັດສັນງົບປະມານໃຫ້ແກ່ແຜນງານ ປີ 2023, ເລືອກຕັ້ງ ປະທານ ແລະ ຮອງປະທານ ຄະນະກຳມະການບໍລິຫານງານ (MC) ຊຸດໃໝ່ ແລະ ປຶກສາຫາລືກະກຽມໃຫ້ແກ່ກອງປະຊຸມ ສະມັດຊາໃຫຍ່ ຄັ້ງທີ 16 (GA-16).

ກອງປະຊຸມຄັ້ງນີ້, ໄດ້ເລືອກຕັ້ງ ປະທານ ແລະ ຮອງປະທານ ຄະນະກຳມະການບໍລິຫານງານ ປະຈຳສົກປີ 2022-2024 ຄົນໃໝ່ ໂດຍແມ່ນ ທ່ານ Dr. Ahmad Reza Sharafat ຈາກປະເທດອີລານ ເປັນປະທານ ແລະ ຮອງປະທານ 02 ທ່ານ ຄື: ທ່ານ ນາງ ພາວັນນາ ດວງບຸບຜາ, ຮອງຫົວໜ້າຫ້ອງການ, ກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ທ່ານ Dr. NARANMANDAKH Tumen-Ulzii ຈາກປະເທດມົງໂກນ ສືບຕໍ່ດຳລົງຕຳແໜ່ງເປັນ ສະໄໝທີ II. ພ້ອມກັນນັ້ນ, ທ່ານ ນາງ ພາວັນນາ ດວງບຸບຜາ ກໍຍັງໄດ້ຮັບຄັດເລືອກໃຫ້ເປັນປະທານ ຄະນະຄົ້ນຄວ້າສ້າງແຜນຍຸດທະສາດຂອງອົງການໂທລະຄົມມະນາຄົມອາຊີ-ປາຊິຟິກ (Correspondence Group on the Strategic Plan of the Asia-Pacific Telecommunity) ສົກປີ 2024-2026 ໂດຍມີ ສປ ຈີນ ແລະ ບັງກລາເທດ ເປັນຮອງປະທານ ຊຶ່ງຈະໄດ້ເລີ່ມຕົ້ນຄົ້ນຄວ້າ ໃນເດືອນມັງກອນ 2023 ນີ້. ໃນສະໄໝຜ່ານມາ ທ່ານ ນາງ ພາວັນນາ ດວງບຸບຜາ ຕາງໜ້າໃຫ້ ກຕສ ເຄີຍໄດ້ຮັບໜ້າທີ່ເປັນ ຮອງປະທານ ຄະນະຄົ້ນຄວ້າສ້າງແຜນຍຸດທະສາດຂອງອົງການໂທລະຄົມມະນາຄົມອາຊີ-ປາຊິຟິກ ສົກປີ 2021-2023 ແລະ ມີ ສປ ຈີນ ເປັນ ປະທານ ຄະນະຄົ້ນຄວ້າດັ່ງກ່າວ. ຊຶ່ງເປັນການສະແດງໃຫ້ເຫັນວ່າ ໄດ້ເປັນບາດກ້າວໜຶ່ງທີ່ສຳຄັນ ໃນການຍົກສູງພາລະບົດບາດ ຂອງ ສປປ ລາວ ໃນເວທີສາກົນ ເພື່ອຍາດແຍ່ງການຊ່ວຍເຫຼືອຂະແໜງ ເຕັກໂນໂລຊີ ແລະ ການສື່ສານ ຂອງ ສປປ ລາວ.