ພາວະຜູ້ນຳ

ມອບ-ຮັບ ແລະ ເປີດນໍາໃຊ້ ລະບົບຊອບແວປະຕິບັດການ ຄວາມປອດໄພໄຊເບີ (SOC) ແລະ ລະບົບການຮຽນອອນລາຍແບບເປີດກວ້າງ (MOOCs)

ເຜີຍແຜ່ໂດຍ: admin|ຢ້ຽມຊົມ: 48 ຄັ້ງ | ເວລາ | 2024-12-22 00:00:00

ໃນຕອນເຊົ້າຂອງວັນທີ 11 ມັງກອນ 2023 ນີ້, ທີ່ຫ້ອງວ່າການສໍານັກງານນາຍົກລັດຖະມົນຕີ ໄດ້ມີພິທີມອບ-ຮັບ ລະບົບຊອບແວປະຕິບັດການ ຄວາມປອດໄພໄຊເບີ (SOC) ແລະ ລະບົບການຮຽນອອນລາຍແບບເປີດກວ້າງ (MOOCs) ລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມ.

ໃນພິທີດັ່ງກ່າວ ຕາງໜ້າໃຫ້ແກ່ລັດຖະບານ ສສ ຫວຽດນາມ ມອບໂດຍ ທ່ານ ຫງວ໋ຽນ ແມັງ ຮຸ່ງ, ກໍາມະການສູນກາງພັກຄອມມູນິດຫວຽດນາມ, ລັດຖະມົນຕີ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ ແລະ ຕາງໜ້າລັດຖະບານ ສປປ ລາວ ຮັບໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ແຫ່ງ ສປປ ລາວ ໂດຍໃຫ້ກຽດເຂົ້າຮ່ວມເປັນສັກຂີພິຍານ ຂອງ ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ແລະ ພະນະທ່ານ ຟ້າມ ມິງ ຈິງ, ນາຍົກລັດຖະມົນຕີ ແຫ່ງ ສສ ຫວຽດນາມ.

ລະບົບຊອບແວປະຕິບັດການຄວາມປອດໄພໄຊເບີ (CSOC) ປະກອບມີ: ລະບົບສູນກາງຕິດຕາມຄວາມປອດໄພຂໍ້ມູນຂ່າວສານ, ລະບົບຕິດຕາມ ແລະ ປ້ອງກັນເວັບໄຊທ໌, ລະບົບຕິດຕາມ, ກວດຈັບຄອມພິວເຕີຜູ້ນໍາໃຊ້, ລະບົບປ້ອງກັນຄວາມປອດໄພເຄືອຂ່າຍຄອມພິວເຕີ ແລະ ລະບົບຄວບຄຸມການເຂົ້າເຖິງເຄືອຂ່າຍ. ສໍາລັບ ລະບົບການຮຽນອອນລາຍແບບເປີດກ້ວາງ (MOOCs) ແມ່ນລະບົບການສັງລວມ ແລະ ແປຫຼັກສູດຈາກພາສາຫວຽດນາມ ມາເປັນພາສາລາວ ແລະ ປ້ອນຂຶ້ນລະບົບ ຈໍານວນ 18 ວິຊາ, ປະກອບມີ 3 ໝວດວິຊາ ຄື: ການຫັນເປັນດິຈິຕ໋ອນ, ຄວາມຮູ້ດ້ານວິຊາສະເພາະ ແລະ ທັກສະທົ່ວໄປ. ຫຼັກສູດການຫັນເປັນດິຈິຕ໋ອນ ເໝາະສຳລັບຜູ້ຮຽນທີ່ເປັນພະນັກງານ ຈາກຂະແໜງການ ແລະ ບັນດາວິສາຫະກິດ. ຫຼັກສູດວິຊາສະເພາະ ແມ່ນເໝາະສົມສໍາລັບຜູ້ຮຽນທີ່ຂຶ້ນກັບບັນດາອົງການຈັດຕັ້ງ ຊຶ່ງມີເນື້ອໃນລົງເລິກ ແລະ ຕາມຂົງເຂດທີ່ແຕກຕ່າງກັນເປັນຕົ້ນ: ເສດຖະກິດ, ການສຶກສາ, ກະສິກໍາ, ສາທາລະນະສຸກ. ຫຼັກສູດກ່ຽວກັບທັກສະທົ່ວໄປ ແມ່ນສໍາລັບປະຊາຊົນ ທີ່ທຸກຄົນສາມາດເຂົ້າເຖິງ ເພື່ອຍົກສູງທັກສະຂອງຕົນ ເປັນ ຕົ້ນ: ທັກສະທາງສັງຄົມ, ທຸລະກິດ, ການຄຸ້ມຄອງການເງິນ ແລະ ອື່ນໆ.

ລະບົບຊອບແວປະຕິບັດການຄວາມປອດໄພໄຊເບີ ໄດ້ຖືກຕິດຕັ້ງ ຢູ່ທີ່ສູນປະຕິບັດການຄວາມປອດໄພໄຊເບີແຫ່ງຊາດ ແລະ ລະບົບການຮຽນອອນລາຍແບບເປີດກວ້າງ ທັງສອງລະບົບຊອບແວ ແມ່ນໄດ້ຮັບການຊ່ວຍເຫຼືອ ຈາກກະຊວງ ຖະແຫລ່ງຂ່າວ ແລະ ການສື່ສານ ກໍຄື ລັດຖະບານ ສສ ຫວຽດນາມ. ທັງສອງລະບົບນີ້ ແມ່ນມີຄຸນປະໂຫຍດຢ່າງໃຫຍ່ຫຼວງ ມາສູ່ ພັກ ແລະ ລັດຖະບານ ກໍຄືປະຊາຊົນລາວບັນດາເຜົ່າ ໃນການເຝົ້າລະວັງຄວາມປອດໄພໃນລະບົບເຄືອຂ່າຍອິນເຕີິເນັດຕະຫຼອດ 24 ຊົ່ວໂມງ ແລະ ການເປີດກວ້າງໃຫ້ນັກຮຽນ, ນັກສຶກສາ, ພະນັກງານ ແລະ ປະຊາຊົນ ສາມາດຄົ້ນຄວ້າຂໍ້ມູນການຮຽນ ໂດຍຜ່ານລະບົບອອນລາຍ ບໍ່ວ່າຈະເປັນ ຫຼັກສູດການຫັນເປັນດິຈິຕ໋ອນ, ຫຼັກສູດຄວາມຮູ້ດ້ານວິຊາສະເພາະ ແລະ ຫຼັກສູດທັກສະທົ່ວໄປ.

ໃນຕອນແລງຂອງວັນດຽວກັນ ກໍໄດ້ມີພິທີເປີດນໍາໃຊ້ລະບົບ ຢ່າງເປັນທາງການ ທີ່ສູນອິນເຕີເນັດ ແຫ່ງຊາດ, ກະຊວງເຕັກໂນໂລຊີ ແລະ ການສື່ສານ ໂດຍໃຫ້ກຽດເຂົ້າຮ່ວມພິທີຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ ກຳມະການສູນກາງພັກ, ລັດຖະມົນຕີ ກຕສ ແລະ ທ່ານ ຫງ໋ວຽນ ແມັງ ຮຸ່ງ ກຳມະການສູນກາງພັກຄອມມູນິດຫວຽດນາມ, ລັດຖະມົນຕີ ກະຊວງຖະແຫຼງຂ່າວ ແລະ ການສື່ສານ ສສ ຫວຽດນາມ, ທ່ານ ຫງວຽນ ບັກ ຮຸ່ງ, ເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສປປ ລາວ, ມີບັນດາທ່ານຮອງລັດຖະມົນຕີ, ຫົວໜ້າຫ້ອງການ, ກົມ/ທຽບເທົ່າ ພ້ອມດ້ວຍພະນັກງານວິຊາການທັງສອງຝ່າຍເຂົ້າຮ່ວມ.