ທ່ານນາຍົກລັດຖະມົນຕີ ຕິດຕາມຊຸກຍູ້ໂຄງການຜະລິດເປັນສິນຄ້າຂອງແຂວງສາລະວັນ

​ເຜີຍ​ແຜ່​ໂດຍ: admin|ຢ້ຽມ​ຊົມ: 31 ຄັ້ງ | ເວ​ລາ | 2024-11-21 19:21:45

ໃນຕອນບ່າຍ ວັນທີ 11 ພະຈິກ 2023 ທ່ານ ສອນໄຊ ສີພັນດອນ ນາຍົກລັດຖະມົນຕີ ຫົວໜ້າຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ (ຫົວໜ້າຄະນະສະເພາະກິດ 19/ກມສພ) ພ້ອມດ້ວຍຄະນະ ໄດ້ສືບຕໍ່ຕິດຕາມ ແລະ ຊຸກຍູ້ ການຈັດຕັ້ງປະຕິບັດບັນດາມາດຕະການແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ ຢູ່ແຂວງສາລະວັນ ໂດຍສະເພາະການຜະລິດຮັບໃຊ້ພາຍໃນແຂວງ ແລະ ການຜະລິດເປັນສິນຄ້າສົ່ງອອກ ຕິດພັນກັບການປຸງແຕ່ງ ເພື່ອຫຼຸດການນຳເຂົ້າສິນຄ້າຈາກຕ່າງປະເທດ ໂດຍມີທ່ານ ດາວວົງ ພອນແກ້ວ, ເຈົ້າແຂວງສາລະວັນ ພ້ອມດ້ວຍຄະນະນຳຂອງແຂວງ, ເມືອງ ແລະ ພາກທຸລະກິດ ທີ່ກ່ຽວຂ້ອງ ໃຫ້ການຕ້ອນຮັບ ແລະ ຮ່ວມເຮັດວຽກ.

ໃນໂອກາດນີ້, ຄະນະຂອງທ່ານນາຍົກລັດຖະມົນຕີ ໄດ້ໄປຢ້ຽມຢາມ ແລະ ຊຸກຍູ້ ການພັດທະນາໂຄງການປູກພືດເປັນຢາ (ພືດສະໝຸນໄພ) ເປັນສິນຄ້າສົ່ງອອກ ຂອງບໍລິສັດ ລາວສຶມຸລະ ຈຳກັດ ທີ່ເມືອງເລົ່າງາມ ຊຶ່ງທ່ານ Yoichiro NAKAI ຜູ້ອຳນວຍການບໍລິສັດດັ່ງກ່າວ ໄດ້ລາຍງານໃຫ້ຮູ້ວ່າ ໂຄງການມີເນື້ອທີ່ທັງໝົດ 473 ເຮັກຕາ ໂດຍໄດ້ເລີ່ມປູກທົດລອງ ໃນປີ 2005, ເລີ່ມດຳເນີນກິດຈະການຢ່າງເປັນທາງການ ໃນປີ 2010 ແລະ ໃນປີ 2011 ແມ່ນໄດ້ເປີດນຳໃຊ້ສຳນັກງານຫ້ອງການ, ທີ່ພັກ ແລະ ໂຮງງານປຸງແຕ່ງພືດເປັນຢາ. ສຳລັບແນວພັນພືດທີ່ປູກ ແມ່ນນຳມາຈາກປະເທດຍີ່ປຸ່ນ, ປັດຈຸບັນ ໄດ້ປູກພືດຫຼັກ 6 ຊະນິດ ຄື: ແຄຫອມ, ໄຊໂກະ, ຂີງ, ໝາກກ້ຽງ, ໂຊໂຢະ ແລະ ໝາກຄ້ຽວ. ນອກນັ້ນ ກໍມີພືດທີ່ກຳລັງປູກທົດລອງ 10 ກວ່າຊະນິດ. ສ່ວນປະຕິບັດພັນທະອາກອນຕ່າງໆ ແມ່ນໄດ້ປະຕິບັດຢ່າງເປັນປົກກະຕິ ຊຶ່ງນັບແຕ່ປີ 2018-2022 ລວມມູນຄ່າ ທີ່ມອບພັນທະໃຫ້ລັດ ແມ່ນປະມານ 6,5 ຕື້ກີບ ຊຶ່ງພືດເປັນຢາດັ່ງກ່າວ ພາຍຫຼັງປຸງແຕ່ງເຄິ່ງສຳເລັດຮູບ ແລະ ສຳເລັດຮູບແລ້ວ ແມ່ນໄດ້ສົ່ງໄປຂາຍທີ່ປະເທດຍີ່ປຸ່ນ ໂດຍມີລາຍຮັບຕໍ່ປີ 30 ຕື້ກີບ (ຂໍ້ມູນປີ 2021), ປັດຈຸບັນ ມີພະນັກງານ-ກໍາມະກອນທັງໝົດ 248 ຄົນ (ພະນັກງານປະຈໍາ 158 ຄົນ).

ໃນໂອກາດດຽວກັນ, ທ່ານນາຍົກລັດຖະມົນຕີ ກໍໄດ້ໃຫ້ກຽດໂອ້ລົມ ຕໍ່ຄະນະອຳນວຍການຂອງບໍລິສັດ ໂດຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດ ແລະ ຄວາມຈິງໃຈເຮັດແທ້ທຳຈິງ ຂອງບໍລິສັດຜູ້ພັດທະນາ ໂດຍເຮັດໃຫ້ກິດຈະການຂອງຕົນ ດຳເນີນມີຄວາມຄືບໜ້າດີ, ມີຜົນກຳໄລເປັນກ້າວໆ ແລະ ປະກອບພັນທະໃຫ້ລັດຫຼາຍຂຶ້ນຕໍ່ເນື່ອງ, ທັງສ້າງວຽກເຮັດງານທຳ ໃຫ້ແກ່ປະຊາຊົນທ້ອງຖິ່ນ ມີລາຍຮັບ, ໄດ້ໃຫ້ການຊ່ວຍເຫຼືອສັງຄົມ ໃນການພັດທະນາໂຄງລ່າງພື້ນຖານ ເສັ້ນທາງຄົມມະນາຄົມ, ໄຟຟ້າ, ອຸປະກອນການຮຽນການສອນ ແລະ ກິດຈະກຳສຳຄັນຕ່າງໆ, ຊຶ່ງທັງໝົດນັ້ນ ໄດ້ປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ກໍຄື ສປປ ລາວ ໃນແຕ່ລະໄລຍະ ຢ່າງຕໍ່ເນື່ອງ. ນອກນັ້ນ, ທ່ານນາຍົກລັດຖະມົນຕີ ໄດ້ສະເໜີບໍລິສັດຜູ້ພັດທະນາໂຄງການ ສົມທົບກັບອົງການປົກຄອງທ້ອງຖິ່ນທີ່ກ່ຽວຂ້ອງ ສືບຕໍ່ປັບປຸງເສັ້ນທາງໄປມາ ໃນເຂດໂຄງການ ກໍ່ຄືບ້ານຂອງປະຊາຊົນ ໃຫ້ມີຄວາມສະດວກສະບາຍຫຼາຍຂຶ້ນ ໂດຍນຳໃຊ້ທ່າແຮງດ້ານທຶນຮອນ ຈາກບໍລິສັດ, ສັງຄົມ ແລະ ປະຊາຊົນ ຕາມເງື່ອນໄຂຕົວຈິງ; ໃນແຕ່ລະໄລຍະ ໃຫ້ບໍລິສັດ ຄົ້ນຄວ້າ, ທົດລອງ ແລະ ເລືອກເຟັ້ນປູກພືດຊະນິດທີ່ມີເສດຖະກິດສູງ, ທັງສ້າງເງື່ອນໄຂ ໃຫ້ປະຊາຊົນທ້ອງຖິ່ນມີສ່ວນຮ່ວມໃນການປູກໃນເນື້ອທີ່ຂອງຕົນ ເພື່ອສະໜອງຂາຍໃຫ້ບໍລິສັດ; ໃຫ້ບໍລິສັດ ສືບຕໍ່ໃຫ້ບຸລິມະສິດ ນຳໃຊ້ແຮງງານທ້ອງຖິ່ນ ເຂົ້າໃນການດຳເນີນໂຄງການ ເພື່ອສ້າງວຽກເຮັດງານທຳ ກໍຄືລາຍຮັບໃຫ້ແກ່ເຂົາເຈົ້າ, ພ້ອມທັງ ສືບຕໍ່ໃຫ້ການຊ່ວຍເຫຼືອສັງຄົມ ໃນດ້ານຕ່າງໆ ໂດຍສະເພາະການແກ້ໄຂຄວາມທຸກຍາກຂອງປະຊາຊົນ ກໍຄືການສ້າງອາຊີບຄົງທີ່, ພັດທະນາສີມືແຮງງານ, ສົ່ງເສີມການສຶກສາ ແລະ ສຸຂະພາບ, ພັດທະນາ ໂຄງລ່າງພື້ນຖານ ແລະ ອື່ນໆ. ຫຼັງຈາກນັ້ນ, ຄະນະຂອງທ່ານ ນາຍົກລັດຖະມົນຕີ ກໍໄດ້ຢ້ຽມຊົມໂຮງງານປຸງແຕ່ງ ແລະ ລົງເບິ່ງພື້ນທີ່ປູກຕົວຈິງ ຕື່ມອີກ.

(ຂ່າວ ແລະ ພາບ: ກົມປະຊາສຳພັນ ຫສນຍ)