ທ່ານ ບັນດິດ ສຈ. ບໍ່ວຽງຄຳ ວົງດາລາ ພົບປະສອງຝ່າຍກັບ ທ່ານ ຫງ໋ຽນ ແມ້ງ ຮຸ່ງ.

​ເຜີຍ​ແຜ່​ໂດຍ: admin|ຢ້ຽມ​ຊົມ: 48 ຄັ້ງ | ເວ​ລາ | 2024-12-22 00:00:00

         ໃນວັນທີ 01 ກັນຍາ 2021, ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕີ ກະຊວງ ເຕັກໂນໂລຊີ ແລະ ການສື່ສານ (ກຕສ) ພ້ອມ​ດ້ວຍ​ຄະນະ ແລະ ຄະນະອໍານວຍການບໍລິສັດ ລາວໂທລະຄົມມະນາຄົມ ຈໍາກັດ, ຄະນະອໍານວຍການບໍລິສັດ ສະຕ້າ ເທເລຄອມ ໄດ້ເຂົ້າຮ່ວມກອງປະຊຸມພົບປະສອງຝ່າຍກັບ ທ່ານ ຫງ໋ຽນ ແມ້ງ ຮຸ່ງ, ລັດຖະມົນຕີ ກະຊວງຖະແຫຼງຂ່າວ ແລະ ການສື່ສານ ແຫ່ງ ສສ ຫວຽດນາມ ພ້ອມດ້ວຍຄະນະ ຜ່ານລະບົບກອງປະຊຸມທາງໄກ.

          ກອງປະຊຸມພົບປະສອງຝ່າຍໃນຄັ້ງນີ້ ຖືເປັນນິມິດໝາຍອັນດີ ແລະ ມີຄວາມໝາຍສໍາຄັນ ທີ່ພັກ-ລັດຖະບານ ແລະ ປະຊາຊົນສອງຊາດ ພວມຊື່ນຊົມຕໍ່ຜົນສຳເລັດ ຂອງການເດີນທາງມາຢ້ຽມຢາມ ສປປ ລາວ ຢ່າງເປັນທາງການ ຂອງ ສະຫາຍ ຫງວຽນ ຊວນ ຟຸກ ກຳມະການສູນກາງພັກ ກອມມູນິດຫວຽດນາມ, ປະທານປະເທດແຫ່ງສາທາລະນະລັດສັງຄົມນິຍົມຫວຽດນາມ ພ້ອມດ້ວຍຄະນະໃນລະຫວ່າງ ວັນທີ 9-10 ສິງຫາ ທີ່ຜ່ານມານີ້. ພ້ອມນີ້,  ຍັງເປັນມິດ ໝາຍອັນດີໃຫ້ແກ່ການກະກຽມ ຈັດຕັ້ງການສະເຫຼີມສະຫຼອງປີສາມັກຄິມິດຕະພາບໃນປີ 2022 ກໍ່ຄືວັນຄົບຮອບວັນສ້າງຕັ້ງ ສາຍພົວພັນ ການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ. ໃນໂອກາດນີ້, ສອງຝ່າຍໄດ້ລາຍງານສະພາບການພັດທະນາໂດຍຫຍໍ້ຂະແໜງ ການຂອງຕົນ ແລະ ຕີລາຄາຄືນຜົນສຳເລັດ ການຮ່ວມມືໃນໄລຍະຜ່ານມາ ເພື່ອເປັນທິດທາງແຜນການຮ່ວມມືກັນໃນຕໍ່ໜ້າ.

         ໃນການຮ່ວມມືສອງຝ່າຍຄັ້ງນີ້, ສອງຝ່າຍໄດ້ເນັ້ນບັນດາວຽກງານທີ່ພົ້ນເດັ່ນເປັນຕົ້ນ: ຂົງເຂດວຽກງານ ໄປສະນີ, ໂທລະຄົມມະນາຄົມ, ອິນເຕີເນັດ, ການຈັດສັນຄື້ນຄວາມຖີ່, ວົງຈອນດາວທຽມ, ການຫັນເປັນລັດຖະບານທັນສະໄໝ (ດິຈິຕອນ), ຄວາມປອດໄພທາງຂໍ້ມູນຂ່າວສານ, ການຫັນເປັນດິຈິຕອນ, ນະວັດຕະກຳ ເຕັກໂນໂລຊີດິຈິຕອນ ສະໄໝໃໝ່, ການພັດທະນາບຸກຄະລາກອນ ແລະ ຍົກສູງຄວາມອາດສາມາດ ໃນຂອບເຂດຂອງການພັດທະນາດິຈິຕອນ. ພ້ອມນັ້ນ, ໃນໄລຍະຜ່ານມາ ສອງຝ່າຍກໍໄດ້ມີການແລກປ່ຽນຄະນະຜູ້ແທນຂັ້ນສູງ ແລະ ຄະນະວິຊາການ ຢ່າງເປັນປະຈໍາ, ໂດຍມີໂຄງການຮ່ວມກັນຫຼາຍໂຄງການ ເຊັ່ນ: ຊ່ວຍສ້າງບຸກຄະລາກອນດ້ານ ໄອຊີທີ ໂດຍຍົກລະດັບທັງ ປ.ຕີ ແລະ ປ.ໂທ, ຈັດຝຶກອົບຮົມຄູອາຈານ ແລະ ພະນັກງານດ້ານ ໄອຊີທີ ເປັນຕົ້ນແມ່ນ ວິຊາການບໍລິຫານຄື້ນຄວາມຖີ່, ວິຊາການບໍລິຫານລະຫັດຊື່ອິນເຕີເນັດ, ວິຊາການດ້ານຄວາມປອດໄພທາງອິນເຕີເນັດ. ພ້ອມກັນນັ້ນ, ກອງປະຊຸມໄດ້ຮຽກຮ້ອງໃຫ້ມີການຍົກສູງຄວາມຮັບຜິດຊອບ ໃນການສືບຕໍ່ຊຸກຍູ້ຜັກດັນ ການຮ່ວມລະຫວ່າງສອງກະຊວງ ແລະ ສືບຕໍ່ອໍານວຍຄວາມສະດວກ, ສົ່ງເສີມການຮ່ວມມືລະຫວ່າງພາກເອກະຊົນຂອງສອງຊາດ ໂດຍສະເພາະ ບົດບາດໃນການສ້າງສັງຄົມຜູ້ປະກອບການດ້ານທຸລະກິດລິເລີ່ມ (Start up) ດ້ວຍເຕັກໂນໂລຊີ ເພື່ອເປັນທ່າແຮງໃນການຮ່ວມມືກັນໃນຂົງເຂດ ທີ່ໄດລົງນາມໃນບົດບັນທຶກຄວາມເຂົ້າໃຈ ບົນພື້ນຖານຫຼັກການຊ່ວຍເຫຼືອເຊິ່ງກັນ ແລະ ກັນ, ມີຄວາມສາມັກຄີພິເສດ ແລະ ຮ່ວມມືຮອບດ້ານ.

         ໃນໂອກາດດຽວກັນນີ້, ສອງຝ່າຍໄດ້ລົງນາມບົດບັນທຶກຄວາມເຂົ້າໃຈກ່ຽວກັບການຮ່ວມມື ໃນຂົງເຂດ ໄອຊີທີ ແລະ ການຫັນເປັນທັນສະໄໝ ດ້ວຍລະບົບດິຈິຕອນ ເພື່ອສືບຕໍ່ຊຸກຍູ້ ແລະ ເສີມຂະຫຍາຍການຮ່ວມມືສອງຝ່າຍ ໃຫ້ນັບມື້ນັບໄດ້ຮັບໝາກຜົນ ພ້ອມທັງເປັນການສືບຕໍ່ປະກອບສ່ວນຢ່າງຕັ້ງໜ້າ ໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ມີຄວາມເລີກເຊິ່ງ ແລະ ແໜ້ນແຟ້ນເພີ່ມຂຶ້ນເລື້ອຍໆຂື້ນ.