ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ກະຊວງ ຕສ ແລະ ບໍລິສັດ ສະຕາໂທລະຄົມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 50 ຄັ້ງ | ເວ​ລາ | 2024-12-22 00:00:00

       ໃນຕອນບ່າຍ ຂອງວັນທີ 20 ສິງຫາ 2021 ນີ້, ທີ່ສຳນັກງານໃຫຍ່ ບໍລິສັດ ສະຕາ ໂທລະຄົມ ຈຳກັດ(UNITEL) ໄດ້ຈັດພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ສູນບໍລິຫານລັດດ້ວຍເອເລັກໂຕຣນິກ (ສລອ), ກະຊວງ ເຕັກໂນໂລຊີ ແລະ ການສື່ສານ (ກຕສ) ແລະ ບໍລິສັດ ສະຕາ ໂທລະຄົມ ຈຳກັດ (UNITEL) ຂື້ນຢ່າງເປັນທາງການ. ໃຫ້ກຽດເຂົ້າຮ່ວມເປັນປະທານ ແລະ ສັກຂີພະຍານ ໂດຍ ທ່ານ ບັນດິດ ສາດສະດາຈານ ປະລິນຍາເອກ ບໍ່ວຽງຄຳ ວົງດາລາ ລັດຖະມົນຕີ ກະຊວງ ຕສ, ທ່ານ ລີວ ແມ໋ງ ຮ່າ (Mr. Luu Manh Ha) ອຳນວຍການໃຫຍ່ ບໍລິສັດ ສະຕາ ໂທລະຄົມ ຈຳກັດ, ມີບັນດາທ່ານຫົວໜ້າ ແລະ ຮອງຫົວໜ້າກົມ/ທຽບເທົ່າ ອ້ອມຂ້າງ ກະຊວງ ຕສ ພ້ອມດ້ວຍຄະນະຜູ້ອຳນວຍການ ບໍລິສັດສະຕາ ໂທລະຄົມ ຈຳກັດ.

          ຕາງໜ້າລົງນາມໃນພິທີເຊັນບົດບັນທຶກຄວາມເຂົ້າໃຈ ໃນຄັ້ງນີ້ໂດຍ: ທ່ານ ປະລິນຍາເອກ ທະວີສັກ ມະໂນທັມ, ຫົວໜ້າສູນບໍລິຫານລັດດ້ວຍເອເລັກໂຕນິກ, ກະຊວງ ຕສ ແລະ ທ່ານ ບຸນມີ ມາລາວົງ, ຮອງຜູ້ອຳນວຍການໃຫຍ່ ບໍລິສັດ ສະຕາ ໂທລະຄົມ ຈຳກັດ ເພື່ອຕົກລົງຮ່ວມມືກັນ ສຶກສາຄົ້ນຄວ້າການຫັນເປັນລັດຖະບານດິຈິຕອນ ແລະ ປັບປຸງຟອນພາສາລາວ ໃຫ້ສົມບູນ ພ້ອມທັງສາມາດຮອງຮັບການບໍລິການຕ່າງໆທີ່ຫັນເປັນທັນສະໄໝ ໂດຍສະເພາະລະບົບບໍລິຫານລັດດ້ວຍເອເລັກໂຕຣນິກ ເປັນຕົ້ນແມ່ນ: ການຄົ້ນຄວ້າພັດທະນາ ມາດຕະຖານລະບົບ Software/Program, Application ເພື່ອໃຫ້ບໍລິການທັງພາກລັດ, ຫົວໜ່ວຍທຸລະກິດ ແລະ ປະຊາຊົນທົ່ວປວງຊົນ.

          ພ້ອມນີ້, ສອງຝ່າຍຍັງຈະໄດ້ສຶກສາຄົ້ນຄວ້າ ການພັດທະນາ ລະບົບທຸລະກຳ ແລະ ການຄ້າທາງເອເລັກໂຕຣນິກ (Digital Payment and Commerce Platform) ເພື່ອເຊື່ອມໂຍງກັບລະບົບລັດຖະບານດິຈິຕອນ ແລະ ລະບົບລາຍເຊັນເອເລັກໂຕຣນິກ (e-Signature Platform) ເພື່ອສົ່ງເສີມການບໍລິຫານ, ບໍລິການລັດໃຫ້ທັນສະໄໝ ແລະ ສຸມໃສ່ການຍົກລະດັບຄວາມຮູ້ຂອງພະນັກງານ ລັດຖະກອນ ທາງດ້ານເຕັກໂນໂລຊີດິຈິຕອນ ແລະ ອື່ນໆ ໃຫ້ສາມາດຮອງຮັບ ໃຫ້ກັບວຽກງານ ການຫັນເປັນລັດຖະບານດິຈິຕອນ ແຫ່ງ ສປປ ລາວ ໂດຍໃຫ້ສອດຄ່ອງກັບແຜນພັດທະນາການຫັນເປັນລັດຖະບານດິຈີຕອນໃນປັດຈຸບັນ.

            ຂ່າວ: ສູນບໍລິຫານລັດດ້ວຍເອເລັກໂຕຣນິກ.