ອດທ ສະຫຼຸບວຽກງານປະຈຳປີ 2020 ແລະ ວາງທິດທາງແຜນການ ປີ 2021.

​ເຜີຍ​ແຜ່​ໂດຍ: admin|ຢ້ຽມ​ຊົມ: 33 ຄັ້ງ | ເວ​ລາ | 2024-12-24 00:00:00

        ອົງການດັດສົມໂທລະຄົມມະນາຄົມ (ອດທ), ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດກອງປະຊຸມສະຫຼຸບຜົນການຈັດຕັ້ງປະຕິບັດວຽກງານປະຈຳປີ 2020 ແລະ ທິດທາງແຜນການຈັດຕັ້ງປະຕິບັດວຽກງານປະຈຳປີ 2021 ຂຶ້ນ ໃນວັນທີ 24 ກຸມພາຜ່ານມານີ້, ທີ່ສະຖາບັນເຕັກໂນໂລຊີການສື່ສານຂໍ້ມູນຂ່າວສານ. ໂດຍການເປັນປະທານຮ່ວມຂອງ ສະຫາຍ ບຸນສະເຫຼີມໄຊ ເຄນນາວົງ, ຄະນະປະຈຳພັກກະຊວງ, ຮອງລັດຖະມົນຕີ ກະຊວງ ປທສ ແລະ ທ່ານ ສຸດໃຈ ລໍລອນສີ, ຮັກສາການ ຫົວໜ້າ ອດທ, ມີບັນດາຄະນະກົມ/ທຽບເທົ່າ, ບັນດາບໍລິສັດຜູ້ໃຫ້ບໍລິການໂທລະຄົມມະນາຄົມ, ບໍລິສັດຜູ້ໃຫ້ບໍລິການອິນເຕີເນັດ ປະເພດ I ແລະ II ພ້ອມດ້ວຍພະນັກງານພາຍໃນອົງການເຂົ້າຮ່ວມ.

             ທ່ານ ສຸດໃຈ ລໍລອນສີ ຮັກສາການ ໄດ້ຜ່ານບົດສະຫຼຸບການ ເຄື່ອນໄຫວວຽກງານປະຈຳປີ 2020 ແລະ ທິດທາງແຜນການປະຈຳປີ 2021 ຂອງອົງການດັດສົມໂທລະຄົມມະນາຄົມ, ໂດຍທ່ານໄດ້ຍົກໃຫ້ເຫັນຫຼາຍຜົນງານພົ້ນເດັ່ນທີ່ຍາດມາໄດ້ໃນໜື່ງປີທີ່ຜ່ານມາ ເປັນຕົ້ນ: ສ້າງນິຕິກຳໃໝ່ໄດ້ 02 ສະບັບ, ປັບປຸງນິຕິກໍາເພື່ອໃຫ້ທັນກັບສະພາບໄດ້ຈຳນວນ 03 ສະບັບ, ກໍາລັງສ້າງ ແລະ ປັບປຸງຈໍານວນ 05 ສະບັບ, ການຂື້ນທະບຽນເລກໝາຍໂທລະສັບ ດ້ານນິຕິກຳ ແລະ ລະບົບເຕັກນິກ ສຳເລັດ 100% ເຊິ່ງຮອດວັນທີ 23 ກຸມພາ 2021 ມີຍອດຂື້ນທະບຽນເລກໝາຍໂທລະສັບທັງໝົດ 2.782.335 ເລກໝາຍ, ສາມາດສ້າງລາຍຮັບ ເພື່ອມອບເຂົ້າງົບປະມານແຫ່ງລັດ ໄດ້ທັງໝົດ 24.345.982.500 ກີບ, ຊຸກຍູ້ໃຫ້ບໍລິສັດໂທລະຄົມມະນາຄົມຂະຫຍາຍພື້ນທີ່ໃຫ້ບໍລິການຢູ່ 06 ບ້ານທີ່ຍັງບໍ່ທັນມີສັນຍານ ຂອງແຂວງໄຊສົມບູນ ສໍາເລັດໄດ້ 95%, ສໍາເລັດສ້າງເວັບໄຊ ແລະ ຖານຂໍ້ມູນ ຂອງ ອດທ.

             ພ້ອມນີ້, ທ່ານຍັງຍົກໃຫ້ເຫັນສະພາບຕະຫຼາດໂທລະຄົມມະນາຄົມ ແລະ ອິນເຕີເນັດ ເຊັ່ນ: ປະຈຸບັນ ສປປ ລາວ ມີຜູ້ໃຫ້ບໍລິການໂທລະຄົມມະນາຄົມ ທັງໝົດ 4 ບໍລິສັດ, ຜູ້ໃຫ້ບໍລິການອິນເຕີເນັດ ປະເພດ 1: 7 ບໍລິສັດ, ປະເພດ 2: 7 ບໍລິສັດ  ແລະ ປະເພດ 3: 14 ບໍລິສັດ, ມີລະບົບສູນກາງໂທລະສັບມືຖື ທີ່ສາມາດຮອງຮັບລູກຄ້າໄດ້ 7ລ້ານກ່ວາລູກຄ້າ, ມີສະຖານີຮັບສົ່ງສັນຍານໂທລະສັບມືຖື ທັງໝົດ 9,680 ສະຖານີ ທຽບໃສ່ປີ 2019 ເພີ່ມຂື້ນ 1,798 ສະຖານີ, ທົ່ວປະເທດມີຈຸດເຊື່ອມຕໍ່ອອກຕ່າງປະເທດ ຂອງຜູ້ໃຫ້ບໍລິການໂທລະຄົມມະນາຄົມ ແລະ ອິນເຕີເນັດ ທັງໝົດ 44 ຈຸດ.

             ໃນຕອນທ້າຍ ທ່ານ ບຸນສະເຫຼີມໄຊ ເຄນນາວົງ ໄດ້ໃຫ້ກຽດໂອ້ລົມຕໍ່ກອງປະຊຸມ, ຊຶ່ງກ່ອນອຶ່ນໝົດ ທ່ານໄດ້ສະແດງຄວາມຍ້ອງຍໍ ແລະ ຊົມເຊີຍຕໍ່ບັນດາຜົນສຳເລັດ ທີ່ ອດທ ຍາດມາໄດ້ ໃນການເອົາໃຈໃສ່ຈັດຕັ້ງປະຕິບັດ ແລະ ຊີ້ນໍາ-ນໍາພາ ປະກອບສ່ວນຢ່າງຕັ້ງໜ້າ. ພ້ອມນີ້, ທ່ານຍັງໄດ້ເນັ້ນໜັກໃຫ້ເອົາໃຈໃສ່ສືບຕໍ່ສຶກສາອົບຮົມທາງດ້ານການເມືອງ-ແນວຄິດ ຕໍ່ສະມາຊິກພັກກໍ່ຄືພະນັກງານພາຍໃນອົງການ ໃຫ້ມີຄວາມຫ້າວຫັ້ນ, ມີຄວາມຮັບຜິດຊອບ ແລະ ເປັນເຈົ້າການໃນການປະຕິບັນໜ້າທີ່ ທີ່ໄດ້ຮັບການມອບໝາຍ, ໃຊ້ເວລາຫວ່າງໃນການຊອກຫາ, ຮຽນຮູ້, ສຶກສາວິທີການສ້າງເສດຖະກິດຄອບຄົວດ້ວຍຫຼາຍຮູບການ ເປັນຕົ້ນ ການເຮັດກະສິກຳ ແລະ ການຄ້າ ໂດຍນຳໃຊ້ເຕັກໂນໂລຊີ,  IoT ເຂົ້າຊ່ວຍ ແລະ ການສ້າງທຸລະກິດສະຕາດອັບ (Start-Up) ຕ່າງໆ ຄຽງຄູ່ກັບການ ມີສະຕິຕໍ່ການນຳໃຊ້ສື່ສັງຄົມອອນລາຍ ແລະ ພ້ອມກັນສືບຕໍ່ເສີມຂະຫຍາຍສະຕິປັນຍາ ແລະ ຫົວຄິດປະດິດສ້າງຂອງຕົນເຂົ້າໃນການພັດທະນາໜ້າທີ່ຕາມຄວາມຮັບຜິດຊອບໃຫ້ໄດ້ຮັບຜົນສໍາເລັດຍິ່ງໆຂຶ້ນ.

           ຂ່າວ: ອດທ.

          ພາບ: ຫ້ອງການກະຊວງ