ພິທີເຊັນສັນຍາຕົວແທນຜູ້ໃຫ້ບໍລິການອອກໃບຮັບຮອງລາຍເຊັນເອເລັກໂຕຣນິກທົ່ວໄປ

​ເຜີຍ​ແຜ່​ໂດຍ: admin|ຢ້ຽມ​ຊົມ: 34 ຄັ້ງ | ເວ​ລາ | 2024-12-22 00:00:00

        ໃນຕອນເຊົ້າຂອງວັນທີ 28 ມັງກອນ 2021 ນີ້, ທີ່ ສູນອິນເຕີເນັດແຫ່ງຊາດ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ໄດ້ມີພິທີລົງນາມເຊັນສັນຍາຕົວແທນ ໃຫ້ບໍລິການອອກໃບຮັບຮອງລາຍເຊັນເອເລັກໂຕຣນິກທີ່ທັນສະໄຫມ ໃນ ສປປ ລາວ ລະຫວ່າງ ບໍລິສັດ ວິນເທັກສ ຈໍາກັດ ແລະ ບໍລິສັດ ສະຕາຣ ໂທລະຄົມ (Unitel),​ ໂດຍມີ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ປທສ, ມີບັນດາຫົວໜ້າກົມ/ທຽບເທົ່າ ອ້ອມຂ້າງກະຊວງ ປທສ, ຄະນະອຳນວຍການ ບໍລິສັດ ວິນເທັກສ ແລະ ບໍລິສັດ ສະຕາຣ ໂທລະຄົມ ຈຳກັດ ພ້ອມດ້ວຍບັນດາຄະນະນຳ ແລະ ພະນັກງານທີ່ກ່ຽວຂ້ອງທັງສອງຝ່າຍ ເຂົ້າຮ່ວມ.

         ໃນຍຸກ New Normal ການນຳໃຊ້ເຕັກໂນໂລຊີດິຈິຕອນ ແມ່ນຈຳເປັນ ແລະ ຂາດບໍ່ໄດ້, ຄວາມຕ້ອງການໃນການຊົມໃຊ້ລາຍເຊັນເອເລັກໂຕຣນິກ ແມ່ນມີຈຳນວນຫຼາຍ ໃນຫຼາກຫຼາຍຂົງເຂດວຽກງານທີ່ແຕກຕ່າງກັນ, ເຮັດໃຫ້ບໍ່ທັນສາມາດຕອບສະ   ໜອງສັງຄົມໄດ້ຢ່າງພຽງພໍ. ດັ່ງນັ້ນ, ກະຊວງ ປທສ ຈຶ່ງໄດ້ມອບໃຫ້ ສູນອິນເຕີເນັດແຫ່ງຊາດ ຮ່ວມມືກັບ ບໍລິສັດ ວິນເທັກສ ຈຳກັດ ຊ່ວຍສົ່ງເສີມ ການນຳໃຊ້ລະບົບອອກໃບຮັບຮອງລາຍເຊັນເອເລັກໂຕຣນິກໃຫ້ແກ່ພາກສ່ວນທົ່ວໄປ (Public CA) ເພື່ອໃຫ້ເກີດຜົນປະໂຫຍດສູງສຸດ, ຕອບສະໜອງໄດ້ຕາມຄວາມຮຽກຮ້ອງຕ້ອງການ ການນຳໃຊ້ຂອງສັງຄົມ, ພ້ອມທັງຮັບປະກັນ ໃຫ້ມີການພັດທະນາຢ່າງຕໍ່ເນື່ອງ ແລະ ຍືນຍົງ.  

          ໄລຍະຜ່ານມາ, ລັດຖະບານ ກໍ່ໄດ້ຮັບຮອງເອົາກົດໝາຍວ່າດ້ວຍລາຍເຊັນເອເລັກໂຕນິກ ເພື່ອເປັນບ່ອນອີງໃຫ້ແກ່ການຈັດຕ້ັງປະຕິບັດວຽກງານ ການພັດທະນາລະບົບອອກໃບຮັບຮອງລາຍເຊັນເອເລັກໂຕຣນິກແຫ່ງຊາດ ໂດຍການນຳໃຊ້ເຕັກໂນໂລຊີ Public Key Infrastructure (PKI). ພ້ອມນີ້, ກະຊວງ ປທສ ກໍ່ໄດ້ມີການອອກໃບຮັບຮອງລາຍເຊັນເອເລັກໂຕຣນິກ ໃຫ້ແກ່ພາກລັດ (Government CA) ໃນການນຳໃຊ້ເຂົ້າໃນການບໍລິການຕ່າງໆ ເປັນຕົ້ນ: ລະບົບ e-Office, e-License ພາຍໃນກະຊວງ ປທສ ແລະ ນຳໃຊ້ເຊັນອະນຸມັດການອອກວີຊາ ໃນລະບົບ e-Visa ຂອງກະຊວງການຕ່າງປະເທດ. ໃນປັດຈຸບັນ ກໍ່ກຳລັງຕິດຕັ້ງເຂົ້າໃນລະບົບ TaxRIS ຂອງກະຊວງການເງິນ, ບັນດາທະນາຄານ ແລະ ອີກຫຼາຍພາກສ່ວນທີ່ມີຄວາມພ້ອມໃນການຫັນເປັນທັນສະໄໝທາງດ້ານດິຈິຕອນ.

          ການຮ່ວມມື ລະຫວ່າງ ສອງບໍລິສັດ ໃນຄັ້ງນີ້, ຈະເປັນຈຸດລິເລີ່ມໃນການໃຫ້ບໍລິການອອກໃບຮັບຮອງລາຍເຊັນເອເລັກໂຕຣນິກທົ່ວໄປ (Public CA) ໃຫ້ແກ່ສັງຄົມ ໃນ ສປປ ລາວ ຢ່າງເປັນຮູບປະທຳ ເພື່ອໃຫ້ລູກຄ້າ ມີຄວາມສະດວກສະບາຍໃນການຮັບຮອງລາຍເຊັນເອເລັກໂຕຣນິກ ແລະ ນໍາໃຊ້ເຂົ້າໃນວຽກງານໃຫ້ເກີດປະໂຫຍດສູງສຸດ.

           ບໍລິສັດ ສະຕາຣ ໂທລະຄົມ ກໍ່ແມ່ນບໍລິສັດທີ່ມີຄວາມນຳໜ້າທາງດ້ານເຕັກໂນໂລຊີ ແລະ ໄດ້ພັດທະນາພື້ນຖານໂຄງລ່າງລະບົບເຄືອຂ່າຍ ໂທລະຄົມມະນາຄົມ ໃນຂອບເຂດທົ່ວປະເທດ ແລະ ນຳໃຊ້ເຕັກໂນໂລຊີທີ່ທັນສະໄໝ, ໄດ້ປະກອບສ່ວນ ໃນການສະໜອງບໍລິການທາງດ້ານໂທລະຄົມມະນາຄົມ ໃຫ້ແກ່ສັງຄົມ ແລະ ໄດ້ກາຍເປັນບໍລິສັດ ທີ່ນອນຢູ່ໃນລະດັບແຖວໜ້າຂອງ ສປປ ລາວ ມີພື້ນທີ່ປົກຄຸ້ມສັນຍານກວ້າງຂວາງ, ມີລະບົບເຄືອຂ່າຍ ສາມາດຮັບໃຊ້ໃຫ້ລູກຄ້າໄດ້ຈຳນວນຫຼາຍ.

          ຂ່າວ: ສູນອິນເຕີເນັດແຫ່ງຊາດ, ປທສ.

          ພາບ: ຫ້ອງການກະຊວງ.