ທ່ານ ບຸນສະເຫຼີມໄຊ ເຄນນາວົງ ເຂົ້າຮ່ວມ ກອງປະຊຸມ ລັດຖະມົນຕີດິຈິຕອນ ອາຊຽນ ຄັ້ງທີ 1 ແລະ ກອງປະຊຸມປິ່ນອ້ອມ.

​ເຜີຍ​ແຜ່​ໂດຍ: admin|ຢ້ຽມ​ຊົມ: 34 ຄັ້ງ | ເວ​ລາ | 2024-12-22 00:00:00

        ທ່ານ ບຸນສະເຫຼີມໄຊ ເຄນນາວົງ, ຮອງລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປ​ທ​ສ) ໄດ້ນໍາພາຄະນະຜູ້ແທນ ສປປ ລາວ ເຂົ້້າຮ່ວມກອງ​ປະ​ຊຸມທາງໄກລັດຖະມົນຕີ ດິຈິຕອນອາຊຽນ ຄັ້ງທີ 1 ແລະ ກອງປະຊຸມປິ່ນອ້ອມ (The 1st ASEAN Digital Ministers Meeting and Related Meetings), ພາຍໃຕ້ຄຳຂວັນ ‘‘ ການເຊື່ອມໂຍງ ແລະ ເຊື່ອມຈອດ ດິຈິຕອນ ຂອງປະຊາຄົມອາຊຽນ’’ (ASEAN A Digitally Connected Community) ຜ່ານລະບົບກອງປະຊຸມທາງໄກ. ຊຶ່ງໄດ້ເປີດຂື້ນຢ່າງເປັນທາງການໃນວັນທີ 21 ມັງກອນ 2021 ນີ້ ແລະ ໄດ້ດຳເນີນໄປເປັນເວລາ 02 ວັນ (ລະຫວ່າງວັນທີ 21-22 ມັງກອນ 2020). ໂດຍການເປັນປະທານຂອງທ່ານ Dato' Saifuddin Bin Abdullah, ລັດຖະມົນຕີ ກະຊວງການສື່ສານ ແລະ ສື່​ສານມວນຊົນ, ປະ​ເທດມາເລເຊຍ. ມີບັນດາລັດຖະມົນຕີສະມາຊິກອາຊຽນ 10 ປະເທດ, ເລຂາທິການໃຫຍ່ອາຊຽນ ແລະ ປະເທດຄຸ່ຮ່ວມເຈລະຈາ ເປັນຕົ້ນ: ສປ ຈີນ, ຍີ່ປຸ່ນ, ສ.ເກົາຫຼີ ແລະ ມີບັນດາ ຫົວໜ້າຫ້ອງການ, ຫົວໜ້າກົມ/ທຽບເທົ່າ ແລະ ວິຊາການທີ່ຮັບຜິດຊອບກ່ຽວກັບວຽກງານ ໄອຊີທີ ແລະ ດິ​ຈິ​ຕອນ ຈາກບັນດາປະເທດສະມາຊິກເຂົ້າຮ່ວມ.

         ໃນໂອກາດດຽວກັນນີ້, ທ່ານ ບຸນສະເຫຼີມໄຊ ເຄນນາວົງ, ຕາງໜ້າ ສປປ ລາວ ໄດ້ກ່າວອຳລາຕຳແໜ່ງປະທານຮອບວຽນໃນຖານະ ສປປ ລາວ ໄດ້ຮັບເປັນປະທານຮອບວຽນກອງປະຊຸມລັດຖະມົນຕີໄອຊີທີ ຄັ້ງຜ່ານມາ ເປັນເວລາ 14 ເດືອນ  ແລະ ກ່າວຮັບໂດຍ ປະເທດມາເລເຊຍ, ພ້ອມນີ້, ສປປ ລາວ ໄດ້ກ່າວຂອບໃຈບັນດາປະເທດສະມາຊິກອາຊຽນ ແລະ ປະເທດຄູ່ຮ່ວມເຈລະຈາ, ກອງເລຂາອາຊຽນໃນການສະໜັບສະ​ໜູນ ແລະ ເອົາໃຈໃສ່ ຮ່ວມກັນໃນການຈັດຕັ້ງປະຕິບັດແຜນວຽກໃຫ້ບັນລຸໄດ້ ຕະຫຼອດໄລຍະໜື່ງປີຜ່ານມາທ່າມກາງສະພາບຄວາມຫຍຸ້ງຍາກ ຂອງໂລກລະບາດ, ແຕ່ຂະແໜງການຂອງພວກເຮົາຍັງສາມາດປະຕິບັດໄດ້ລຶ່ນຄາດໝາຍທີ່ໄດ້ວາງໄວ້ ພາຍໃຕ້ການເປັນປະທານຂອງ ສປປ ລາວ, ຊຶ່ງມີບັນດາກິດຈະກຳທີ່ພົ້ນເດັນ ເຊັ່ນ: ບັນດາກິດຈະກຳສົ່ງເສີມການຮ່ວມມືທາງດ້ານເສດຖະກິດ ດິຈິຕອນ ລະຫວ່າງອາຊຽນ ແລະ ສປ ຈີນ, ການຮັບຮອງພາລະບົດບາດຂອງຄະນະເຮັດວຽກດ້ານຄວາມປອດໄພທາງໄຊເບີຂ້າມຂະແໜງການ, ການ​ປຶກ​ສາ​ຫາ​ລື​ກ່ຽວ​ກັບ​ການ​ເຄື່ອນ​ຍ້າຍ​ຂໍ້​ມູນ​ຂ້າມ​ພົມ​ແດນ, ລະ​ບົບ Over the Top (OTT) ແລະ ສະຫຼຸບການຈັດຕັ້ງປະຕິບັດໃນ 05 ປີຜ່ານມາ, ຮ່າງແຜນການ 05 ປີ ໃນຕໍ່ໜ້າ ແລະ ສະຫຼຸບ​ແຜນ​ການ​ຮ່ວມ​ມື​ກັບ​ບັນ​ດາ​ປະ​ເທດ​ຄູ່​ຮ່ວມ​ເຈ​ລະ​ຈາ.

          ກອງປະຊຸມຄັ້ງນີ້ ແມ່ນເປັນກອງປະຊຸມຄັ້ງປະຖົມມະເລີກ ພາຍຫຼັງໄດ້ປ່ຽນຊື່ ກອງປະຊຸມລັດຖະມົນຕີໄອຊີທີອາ ຊຽນ (TELMIN) ມາເປັນ ກອງປະຊຸມລັດຖະມົນຕີດິຈິຕອນ (ADGMIN), ພ້ອມດຽວກັນນີ້, ບັນ​ດາລັດຖະມົນຕີ ອາຊຽນໄດ້ມີການປຶກສາຫາລື ແລະ ປ່ຽນສະພາບການພັດທະນາດິຈິຕອນ ລວມເຖິງລາຍງານຄວາມຄືບໜ້າ ການພັດທະນາ ດ້ານນະໂຍບາຍ ແລະ ລະບຽບການຂອງແຕ່ລະປະເທດ. ທົບທວນຄືນ ການຈັດຕັ້ງປະຕິບັດ ວຽກງານ ຄວາມປອດໄພທາງໄຊເບີ, ການຫັນເປັນດິຈິຕອນ, ເສດຖະກິດດິຈິຕອນ, ພື້ນຖານໂຄງລ່າງຂໍ້ມູນຂ່າວສານທີ່ສຳຄັນ, ນະວັດຕະກຳດິຈິຕອນ, ການບໍລິຫານຂໍ້ມູນພາກລັດ  ແລະ ບັນດາແຜນງານທີໄດ້ຈັດຕັ້ງປະຕິບັດ ຮ່ວມກັນປະເທດ ຄູ່ຮ່ວມພັດທະນາ ແລະ ຜູ້ປະກອບການພາກເອກະຊົນ ເພື່ອສ່ົງເສີມໃຫ້ ວຽກງານດິຈິຕອນ ຂັບເຂື່ອນ ເສດຖະກິດ-ສັງຄົມ ໃຫ້ຂະຫຍາຍຕົວ ແລະ ຮັບປະກັນຄວາມ ສອດຄ່ອງກັບເປົ້າໝາຍປະຊາຄົມອາຊຽນ.

    ຂ່າວ​ໂດຍ:   ພະ​ແນກ​ອາ​ຊຽນ, ກົມ​ແຜນ​ການ ແລະ ການ​ຮ່ວມ​ມື.

     ພາບ​ໂດຍ:   ຫ້ອງ​ການ​ກະ​ຊວງ.