ພິທີເຊັນ ບົດບັນທຶກຄວາມເຂົ້າໃຈ ວ່າດ້ວຍ ການຮ່ວມມືການນໍາໃຊ້ ລະບົບພິສູດຕົວຕົນຜ່ານທາງເອເລັກໂຕຣນິກ (e-KYC)

​ເຜີຍ​ແຜ່​ໂດຍ: admin|ຢ້ຽມ​ຊົມ: 34 ຄັ້ງ | ເວ​ລາ | 2024-12-22 00:00:00

         ໃນຕອນເຊົ້າຂອງວັນທີ 27 ຕຸລາ 2020 ນີ້, ທີ່ ສູນອິນເຕີເນັດແຫ່ງຊາດ (ສອຊ), ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ໄດ້ມີພິທີເຊັນບົດບັນທຶກຄວາມເຂົ້າໃຈ ວ່າດ້ວຍການຮ່ວມມືການນໍາໃຊ້ ລະບົບພິສູດຕົວຕົນຜ່ານທາງເອເລັກໂຕຣນິກ (Electronic Know Your Customer, e-KYC) ລະຫວ່າງບໍລິສັດ ເອັສບີແລັບ 856 ຈຳກັດ (SB Lab 856) ແລະ ທະນາຄານ ພັດທະນາລາວ,​ ໃຫ້ກຽດເຂົ້າຮ່ວມໂດຍ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ປທສ, ບັນດາທ່ານຫົວໜ້າກົມ, ຮອງຫົວໜ້າກົມ ພາຍໃນກະຊວງ ປທສ, ທ່ານຜູ້ອໍານວຍການ, ປະທານ, ຮອງອໍານວຍການ, ຮອງປະທານ, ຄະນະພະແນກ ທີ່ກ່ຽວຂ້ອງ ຈາກ ທະນາຄານພັດທະນາລາວ ແລະ ບໍລິສັດ ເອັສບີແລັບ 856 ຈຳກັດ (SB Lab 856).

        ທ່ານ ພອນສະຫວັດ ຄົງສະຫວັດ ຮອງຫົວໜ້າສູນ ສອຊ ໄດ້ກ່າວວ່າ ລະບົບ e-KYC ແມ່ນລະບົບພິສູດຕົວຕົນທາງເອເລັກໂຕຣນິກ ທີ່ມີຄວາມປອດໄພສູງ ຜ່ານຖານຂໍ້ມູນສ່ວນບຸກຄົນທີ່ຖືກຕ້ອງ ແລະ ຜ່ານພື້ນຖານໂຄງລ່າງ ການເຊື່ອມຕໍ່ແລກປ່ຽນຂໍ້ມູນພາກລັດ (Government Data Exchange) ໂດຍແມ່ນກະຊວງ ປທສ ຮ່ວມກັບ ບໍລິສັດ ເອັສບີແລັບ 856 ຈຳກັດ ໄດ້ສຶກສາຄົ້ນຄວ້າ, ພັດທະນາ ແລະ ເປີດທົດລອງນໍາໃຊ້ ເພື່ອກະກຽມຄວາມພ້ອມ ໃນການຫັນເປັນດິຈິຕອນ (Digital Transformation), ການພັດທະນາເສດຖະກິດດິຈິຕອນ (Digital Economy) ແລະ ກະກຽມຄວາມພ້ອມ ໃນຍຸກອຸດສາຫະກໍາ 4.0 ໃນອະນາຄົດ.

           ນັບແຕ່ປີຕົ້ນປີ 2019 ເປັນຕົ້ນມາ, ກະຊວງ ປທສ ໄດ້ຮ່ວມກັບ ບໍລິສັດ ເອັສບີແລັບ 856 ຈຳກັດ ໃນການລິເລີ່ມພັດທະນາການ ລະບົບ e-KYC ຫລືເອີ້ນວ່າ LaoKYC ຂຶ້ນ ເຊິ່ງລະບົບດັ່ງກ່າວ ມີຖານຂໍ້ມູນຢູ່ທີ່ ສູນຂໍ້ມູນແຫ່ງຊາດ (National Data Center) ພ້ອມທັງເປັນຜູ້ຄຸ້ມຄອງ. ໂດຍບໍລິສັດ ເອັສບີແລັບ 856 ຈຳກັດ ໄດ້ພັດທະນາ ລະບົບການເຊື່ອມຕໍ່, ແລກປ່ຽນຂໍ້ມູນ ແລະ ພິສູດຂໍ້ມູນ ກັບຜູ້ຕ້ອງການນໍາໃຊ້ຂໍ້ມູນ ເປັນຕົ້ນແມ່ນ: ພາກລັດ, ບັນດາທະນາຄານ, ການຊໍາລະສະສາງ ທາງອອນລາຍ, ການຄ້າເອເລັກໂຕຣນິກ, ເພື່ອເປັນພື້ນຖານໂຄງລ່າງທີ່ສຳຄັນ ຂອງເຕັກໂນໂລຊີດິຈິຕອນ ໃຫ້ແກ່ການຫັນເປັນທັນສະໄໝ ທົ່ວເສດຖະກິດ-ສັງຄົມ. ໃນຍຸກຂອງ ເສດຖະກິດດິຈິຕອນ, ຄວາມຕ້ອງການນຳໃຊ້ ລະບົບ e-KYC ແມ່ນມີຄວາມຮຽກຮ້ອງຕ້ອງການ ແລະ ມີຄວາມຈໍາເປັນຢ່າງສູງ ໃນການເຮັດທຸລະກຳທາງອອນລາຍ ເຊັ່ນ: ການປະກອບເອກະສານ ຂອງພາກລັດ ແລະ ເອກະຊົນ ທາງອອນລາຍ, ການເປີດບັນຊີທະນາຄານ ຜ່ານທາງອອນລາຍ (Mobile Banking App), ການເປີດບັນຊີ ກະເປົ໋າເງິນເອເລັກໂຕຣນິກ (e-Wallet App) ເທິງໂທລະສັບມືຖື ຜ່ານທາງອອນລາຍ, ການສະໝັກສິນເຊື່ອ ຫລື ການປ່ອຍເງິນກູ້ສ່ວນບຸກຄົນ ຜ່ານທາງອອນລາຍ, ການຊື້ສິນຄ້າ ຫລື ການບໍລິການຕ່າງໆ ຜ່ານທາງອອນລາຍ ທີ່ມີການຄວາມຕ້ອງການ ໃນການປະກອບຂໍ້ມູນສ່ວນຕົວ ແລະ ພິສູດຂໍ້ມູນ ດັ່ງກ່າວວ່າມີຄວາມຖືກຕ້ອງແລ້ວບໍ ແມ່ນສາມາດ ນໍາໃຊ້ຜ່ານລະບົບ e-KYC ໄດ້. 

         ປະຈຸບັນນີ້ ລະບົບ LaoKYC ກຳລັງຈະເປີດທົດລອງນຳໃຊ້ຮ່ວມກັບບັນດາການບໍລິການ ຜ່ານທາງອອນລາຍ ຂອງທະນາຄານພັດທະນາລາວ ເພື່ອຄວາມສະດວກ, ວ່ອງໄວ, ຖືກຕ້ອງ ແລະ ມີຄວາມປອດໄພສູງໃນການຮັກສາຄວາມລັບຂອງຂໍ້ມູນສ່ວນບຸກຄົນຂອງຜູ້ໃຊ້, ຂໍ້ມູນການພິສູດຕົວຕົນ ຜ່ານການຂຶ້ນທະບຽນເລກໝາຍໂທລະສັບ (ຊິມກາດ) ແມ່ນຖືກເກັບຮັກສາໄວ້ ຢູ່ທີ່ສູນຂໍ້ມູນແຫ່ງຊາດ ທີ່ໄດ້ມາດຕະຖານການຈັດການຄວາມປອດໄພຂໍ້ມູນຂ່າວສານ ISO27001. ພ້ອມນີ້, ຍັງສາມາດນໍາໃຊ້ເຂົ້າຮ່ວມກັບແອັບ LDB Trust ຫຼື LDB Wallet ເທິງໂທລະສັບມືຖື ຂອງ ທະນາຄານພັດທະນາລາວໄດ້ອີກດ້ວຍ, ເພາະສຳລັບລູກຄ້າຜູ້ທີ່ສຳເລັດ ການຂຶ້ນທະບຽນເລກໝາຍໂທລະສັບ (ຊິມກາດ) ແລ້ວນັ້ນ ແມ່ນຈະບໍ່ຈຳເປັນຕ້ອງໄດ້ລົງທະບຽນນຳໃຊ້ ແລະ ພິສູດຕົວຕົນອີກ ໃນເວລາສະໝັກເປີດນໍາໃຊ້ແອັບດັ່ງກ່າວ.  ສາມາດເວົ້າໄດ້ວ່າ ລູກຄ້າ ບໍ່ຈໍາເປັນຕ້ອງເຂົ້າໄປສະໝັກທີ່ປ່ອງບໍລິການຂອງທະນາຄານ, ບໍ່ຈຳເປັນຕ້ອງສະແດງຂໍ້ມູນຈາກ ບັດປະຈຳຕົວ, ສໍາມະໂນຄົວ ຫຼື ເອກະສານທີ່ຈໍາເປັນ ເພື່ອໃຊ້ພິສູດຕົວຕົນໃດໆອີກ, ເຊິ່ງຈະເປັນການຫຼຸດຂັ້ນຕອນຈາກ 8 ຂັ້ນຕອນ ມາເປັນຂັ້ນຕອນດຽວໄດ້, ເຮັດໃຫ້ລູກຄ້າ ສາມາດເປີດບັນຊີທະນາຄານທາງອອນລາຍໄດ້, ທະນາຄານ ສາມາດຮັບລູກຄ້າຜ່ານທາງອອນລາຍໄດ້, ເຊິ່ງຈະເຮັດໃຫ້ ກາຍເປັນ ທະນາຄານດິຈິຕອນ ໃນອະນາຄົດ ອັນໃກ້. ນອກນັ້ນ, ກະຊວງ ປທສ ຍັງໄດ້ຮ່ວມກັບ ບໍລິສັດ ເອັສບີແລັບ 856 ຈຳກັດ ໃນການຜັນຂະຫຍາຍຂີດຄວາມສາມາດຂອງລະບົບ LaoKYC ໃນການຫັນເປັນເຄື່ອງມື ໃນການຕິດຕາມປະຫວັດການເຄື່ອນໄຫວ, ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ COVID-19 ໃຫ້ກັບກະຊວງ ສາທາລະນະສຸກ, ພ້ອມນັ້ນ, ກໍ່ຍັງເປັນແອັບ ທີ່ບຸກຄົນ ສາມາດດາວໂຫຼດ ແລະ ນໍາໃຊ້ ເຂົ້າໃນການຂື້ນທະບຽນເລກໝາຍໂທລະສັບ (ຊິມຄາດ), ເຊິ່ງທ່ານ ສາມາດ ດາວໂຫຼດ ໄດ້ຈາກ Android Play Store, iOS App Store ແລະ ດໍາເນີນການລົງທະບຽນເລກຫມາຍໂທລະສັບ (ຊິມຄາດ) ໄດ້ດ້ວຍຕົນເອງ ຜ່ານທາງອອນລາຍ ຈົນຮອດທ້າຍປີ 2020.

          ຂ່າວ: ສູນອິນເຕີເນັດແຫ່ງຊາດ.

          ກວດແກ້+ພາບ: ຫ້ອງການກະຊວງ.