ປທສ ສຳມະນາການພັດທະນາວຽກງານບໍລິຫານລັດດ້ວຍເອເລັກໂຕຣນິກ.

​ເຜີຍ​ແຜ່​ໂດຍ: admin|ຢ້ຽມ​ຊົມ: 47 ຄັ້ງ | ເວ​ລາ | 2024-12-22 00:00:00

         ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຮ່ວມກັບ ກະຊວງພາຍໃນ ແລະ ຄວາມປອດໄພ (MOIS) ສ.ເກົາຫຼີ ໄດ້ຈັດກອງປະຊຸມສາມະນາ ພາຍໃຕ້ຫົວຂໍ້: ການພັດທະນາວຽກງານບໍລິຫານລັດດ້ວຍເອເລັກໂຕຣນິກ ຂອງ ສປປ ລາວ ແລະ ສ.ເກົາຫຼີ ຂຶ້ນໃນວັນທີ 05 ທັນວານີ້, ທີ່ໂຮງແຮມແລນມາກ, ນະຄອນຫຼວງວຽງຈັນ. ໂດຍການເປັນປະທານຮ່ວມຂອງ ທ່ານ ປອ. ທະວີສັກ ມະໂນທັມ, ຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງ ປທສ ແລະ ທ່ານ ຊິນ ຊຸງ ອິນ (Mr SHIN Seung In), ຫົວຫນ້າກົມ ຄວາມປອດໄພຂໍ້ມູນຂ່າວສານ, ກະຊວງພາຍໃນ ແລະ ຄວາມປອດໄພ (Director of MOIS) ມີຜູ້ຕ່າງໜ້າຈາກບັນດາອົງການຈັດຕັ້ງພັກ, ກະຊວງ/ອົງການທຽບເທົ່າ, ຄະນະກົມ/ທຽບເທົ່າ ອ້ອມຂ້າງກະຊວງ ແລະ ຜູ້ປະກອບການທາງດ້ານໄອຊີທີ ເຂົ້າຮວມ.

        ການຈັດກອງປະຊຸມໃນຄັ້ງນີ້, ກໍ່ເພື່ອເປັນການເຜີຍແຜ່ ແລະ ແລກປ່ຽນບົດຮຽນ ກ່ຽວກັບສະພາບການພັດທະນາ ວຽກງານການບໍລິຫານລັດດ້ວຍເອເລັກໂຕຣນິກ ແລະ ການນຳໃຊ້ລະບົບເຂົ້າໃນວຽກງານຕົວຈິງ ເປັນຕົ້ນ ການບໍລິການແບບປະຕູດຽວຜ່ານທາງອິນເຕີເນັດ, ລະບົບພາສີເອເລັກໂຕຣນິກ, ລະບົບການຄຸ້ມຄອງຊັບພະຍາກອນມະນຸດ, ລະບົບການຄຸ້ມຄອງໄພພິບັດປ່າໄມ້, ກະສິກຳທັນສະໄໝ ແລະ ອຶ່ນໆ ຂອງ ສປປ ລາວ - ສ.ເກົາຫຼີ, ພ້ອມນີ້, ກໍ່ເພື່ອເປັນເວທີໃນການແລກປ່ຽນຄວາມຮູ້, ປະສົບການ ແລະ ຖອດຖອນບົດຮຽນນຳ ສ. ເກົາຫຼີ ທີ່ມີປະສົບການ ແລະ ມີຜົນສຳເລັດໃນການຈັດຕັ້ງປະຕິບັດວຽກງານດັ່ງກ່າວມາແລ້ວ ໃນການແນໃສ່ຊຸກຍູ້, ຍົກລະດັບຄວາມຮູ້ຄວາມສາມາດໃຫ້ແກ່ພະນັກງານຂອງທຸກຂະແໜງການ ໃຫ້ເຫັນໄດ້ເຖິງຄວາມສຳຄັນຕໍ່ກັບວຽກງານດັ່ງກ່າວ ແລະ ນຳໄປຜັນຂະຫຍາຍເຂົ້າໃນວຽກງານຂອງຕົນ ໃຫ້ມີປະສິດທິພາບ ແລະ ເກີດປະໂຫຍດສູງສຸດ.

       ການພັດທະນາລະບົບບໍລິຫານລັດດ້ວຍເອເລັກໂຕຣນິກ   ແມ່ນວຽກງານໜຶ່ງ ທີ່ສໍາຄັນ ແລະ ຈໍາເປັນ ໃນການຊຸກຍູ້, ສົ່ງເສີມ ໃຫ້ແກ່ວຽກງານຂອງທຸກຂະແໜງການ ທັງພາກລັດ - ເອກະຊົນ ເພື່ອການຫັນເປັນລັດຖະບານທັນສະໄໝ ເທື່ອລະກ້າວ ດັ່ງທີ່ທ່ານ ປອ. ທະວີສັກ ມະໂນທັມ ໄດ້ກ່າວບາງຕອນວ່າ “ວຽກງານບໍລິຫານລັດດ້ວຍເອເລັກໂຕຣນິກ ຖືວ່າເປັນວຽກງານໜຶ່ງ ທີ່ມີຄວາມສຳຄັນຫຼາຍ ແລະ ເປັນໝາກຫົວໃຈ ໃນການເຊື່ອມໂຍງກັບທຸກຂະແໜງການ ເພື່ອເພີ່ມປະສິດທິພາບການດຳເນີນງານຂອງລັດຖະບານ, ນໍາເອົາການບໍລິການຂອງລັດ ໄປສູ່ປະຊາ ຊົນ ໂດຍນໍາໃຊ້ເອເລັກໂຕຣນິກເປັນການສື່ສານໃນການໃຫ້ບໍລິການ ໃນການເພີ່ມປະສິດທິພາບຂອງວຽກງານ ໃຫ້ມີຄວາມສະດວກວ່ອງໄວ, ປະຢັດຄ່າໃຊ້ຈ່າຍ ແລະ ເວລາ ທີ່ສຳຄັນມີຄວາມປອດ ໃນການຫັນການບໍລິຫານ, ຄຸ້ມຄອງລັດເປັນທັນສະໄໝ ເທື່ອລະກ້າວ. ຊຶ່ງປະຈຸບັນ, ບັນດາປະເທດທົ່ວໂລກ ກໍ່ຄື ບັນດາປະເທດອາຊຽນ ແມ່ນໄດ້ສຸມໃສ່ພັດທະນາວຽກງານດັ່ງກ່າວ ເພື່ອສົ່ງເສີມທຸກຂະແໜງການໃຫ້ມີການພັດທະນາ ແນ່ໃສ່ຊຸກຍູ້ ແລະ ສະໜັບສະໜູນການພັດທະນາເສດຖະກິດ-ສັງຄົມ ແລະ ສ້າງລາຍຮັບໃຫ້ປະເທດໄດ້ຫຼາຍຂຶ້ນ.

        ໃນໂອກາດດຽວກັນ, ບັນດາຜູ້ເຂົ້າຮ່ວມ ຍັງໄດ້ມີການໂອ້ລົມ, ປະກອບຄໍາຄິດເຫັນ, ແລກປ່ຽນບົດຮຽນ ແລະ ປະສົບການ ກ່ຽວກັບສະພາບການພັດທະນາວຽກງານບໍລິຫານລັດດ້ວຍເອເລັກໂຕຣນິກ ໃນ ສປປ ລາວ, ທິດທາງ ແລະ ແຜນການຫັນເປັນລັດຖະບານທີ່ທັນສະໄໝທາງດ້ານດິຈິຕອນ ທີ່ເປັນປະໂຫຍດໃນການສະໜັບສະໜູນ ແລະ ສົ່ງເສີມການພັດທະນາວຽກງານດັ່ງກ່າວ ໃຫ້ກ້ວາງຂວາງ ແລະ ມີປະສິດທິຜົນ.

          ຂ່າວ: ສູນບໍລິຫານລັດດ້ວຍເອເລັກໂຕຣນິກ. /  10/12/2019

          ພາບ: ຫ້ອງການ.