ລາວ-ຈີນ ເພີ່ມທະວີການຮ່ວມມືທາງດ້ານວຽກງານ ໄອຊີທີ.

​ເຜີຍ​ແຜ່​ໂດຍ: admin|ຢ້ຽມ​ຊົມ: 47 ຄັ້ງ | ເວ​ລາ | 2024-12-22 00:00:00

            ເມື່ອບໍ່ດົນມານີ້, ທ່ານ ທັນສະໄໝ ກົມມະສິດ, ລັດຖະມົນຕີ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ (ປທສ), ໄດ້ພົບປະສອງຝ່າຍກັບ ທ່ານ ມ້ຽວ ເວີຍ, ລັດຖະມົນຕີກະຊວງ ອຸດສາຫະກຳ ແລະ ເຕັກໂນໂລຊີຂໍ້ມູນຂ່າວສານ, ພ້ອມດ້ວຍຄະນະ, ໃນໂອກາດເດີນທາງມາເຂົ້າຮ່ວມກອງປະຊຸມ ກອງປະຊຸມລັດຖະມົນຕີ ອາຊຽນ ໄອຊີທີ ຄັ້ງທີ 19, ທີ່ນະຄອນຫຼວງວຽງຈັນ.

           ການພົບປະສອງຝ່າຍໃນຄັ້ງນີ້ແມ່ນ ເປັນການເພີ່ມທະວີການຮ່ວມມື ທາງດ້ານວຽກງານ ໄອຊີທີ ລະຫວ່າງ ລາວ-ຈີນ ແລະ ໄດ້ຕີລາຄາສູງສາຍພົວພັນມິດຕະພາບ ແລະ ການຮ່ວມມືແບບຄູ່ຮ່ວມຍຸດທະສາດຮອບ ດ້ານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ກໍ່ຄືການພົວພັນ ລະຫວ່າງ ສອງ ກະຊວງ ແລະ ເຊື່ອໝັ້ນວ່າໃນຕໍ່ໜ້າຈະສືບຕໍ່ເສີມຂະຫຍາຍການພົວພັນຮ່ວມມື ໂດຍສະເພາະໃຫ້ຂະແໜງ ໄອຊິທີ ເປັນໂຕຂັບເຄື່ອນວຽກງານ “ໜຶ່ງແລວ ໜຶ່ງເສັ້ນທາງ” ແລະ ການເຊື່ອມໂຍງພາກພື້ນ ແລະ ດິຈິຕອນ ເພື່ອເປັນເຄື່ອງມືໃນການສະໜັບສະໜູນ ການພັດທະນາເສດຖະກິດ ແລະ ສັງຄົມແບບຢຶນຢົງ. ນອກນັ້ນກໍ່ໄດ້ປຶກສາຫາລື ການຮ່ວມມືພັດທະນາວຽກງານຂໍ້ມູນຂ່າວສານຄວາມໄວສູງ ເພື່ອຫຼຸດຜ່ອນຄວາມທຸກຍາກ ແລະ ຮອງຮັບແຖວທາງເສດຖະກິດ “ເສັ້ນທາງສາຍໄໝ ດິຈິຕອນ” ແລະ ແຜນການໃນການຫັນເປັນທັນສະໄໝທາງດ້ານດິຈິຕອນ ໃນ ສປປ ລາວ.

            ໃນການພົບປະສອງຝ່າຍຄັ້ງນີ້, ທ່ານ ລັດຖະມົນຕີ, ທັງສອງຝ່າຍ ໄດ້ຮ່ວມກັນລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືທາງດ້ານເຕັກໂນໂລຊີການສື່ສານຂໍ້ມູນຂ່າວສານ ເພື່ອເປັນການຮ່ວມມືທາງດ້ານການພັດທະນາວຽກງານລະບົບ ICT ແລະ ອຳນວຍຄວາມສະດວກການກໍ່ສ້າງບັນດາໂຄງການພັດທະນາລະບົບການສື່ສານຂໍ້ມູນຂ່າວສານ ໃນ ສປປ ລາວ ເພື່ອປະກອບ ສ່ວນເຂົ້າໃນການພັດທະນາເສດຖະກິດ-ສັງຄົມ ຂອງຊາດເຮົາໄດ້ຢ່າງຮອບດ້ານ ບໍ່ວ່າຈະເປັນທາງກົງ ແລະ ທາງອ້ອມ.

            ຂ່າວ: ກົມແຜນການ ແລະ ການຮ່ວມມື, ປທສ.