ສປປ ລາວ ເປັນເຈົ້າພາບຈັດກອງປະຊຸມ ລັດຖະມົນຕີ ໄອຊີທີ ອາຊຽນ ຄັ້ງທີ 19.

​ເຜີຍ​ແຜ່​ໂດຍ: admin|ຢ້ຽມ​ຊົມ: 41 ຄັ້ງ | ເວ​ລາ | 2024-12-22 00:00:00

           ສປປ ລາວ ກໍ່ຄື ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປ​ທ​ສ) ໄດ້​ເປີດກອງປະຊຸມລັດຖະມົນຕີ ໄອຊີທີ ອາຊຽນ ຄັ້ງທີ 19 (The 19th  ASEAN Telecommunications and Information Technology Ministers Meeting –TELMIN), ຂຶ້ນຢ່າງເປັນທາງການ ໃນວັນທີ 24 ຕຸລາ 2019 ນີ້,  ທີ່ນະຄອນຫຼວງວຽງຈັນ, ພາຍໃຕ້ຄຳຂັວນ “ສ້າງການເຊື່ອມຈອດທີ່ທັນສະໄໝ ເພື່ອການຫັນເປັນດີຈີຕອນ ຂອງອາຊຽນ” (Smart Connectivity for ASEAN Digital Transformation). ຊຶ່ງກອງປະຊຸມໃນຄັ້ງນີ້, ໄດ້ດໍາເນີນໄປເປັນເວລາ 02 ວັນ  (ລະຫວ່າງວັນທີ 24-25 ຕຸລາ 2019).  ໃຫ້​ກຽດ​ກ່າວ​ເປີດກອງປະຊຸມໂດຍ ພະ​ນະ​ທ່ານ ສອນ​ໄຊ ສີ​ພັນ​ດອນ, ຮອງ​ນາ​ຍົກ​ລັດ​ຖະ​ມົນ​ຕີ ແຫ່ງ ສປປ ລາວ ​​ແລະ ​ເປັນປະທານກອງ​ປະ​ຊຸມໂດຍ ທ່ານ ປອ ທັນສະໄໝ ກົມມະສິດ, ລັດຖະມົນຕີກະຊວງ ປທສ ຮ່ວມ​ກັບ ທ່ານ ໂກບິນ ສິງດີໂອ (HE. Gobind Singh Deo), ລັດຖະມົນຕີ ກະຊວງການສື່ສານ ແລະ ສື່ມວນຊົນ, ປະເທດມາເລເຊຍ ມີບັນ​ດາລັດຖະມົນຕີ ສະມາຊິກ ອາຊຽນ 10 ປະເທດ, ເລຂາທິການໃຫຍ່ອາຊຽນ ແລະ ປະເທດຄູ່ຮ່ວມເຈລະຈາ (ສປ ຈີນ, ຍີ່ປຸ່ນ, ສ.ເກົາຫຼີ, ອິນເດຍ, ເອີລົບ, ອາເມລິກາ, ສະຫະພາບໂທລະຄົມມະນາຄົມສາກົນ (ITU) ແລະ ມີບັນດາລັດຖະມົນຕີ, ຫົວໜ້າຫ້ອງການ ພ້ອມດ້ວຍວິຊາການທີ່ຮັບຜິດຊອບກ່ຽວກັບວຽກງານ ໄອຊີທີ ຈາກບັນດາປະເທດອາຊຽນ ເຂົ້າຮ່ວມ.

          ການຈັດກອງປະຊຸມໃນຄັ້ງນີ້, ແມ່ນເປັນຄັ້ງທີ່ 02 ຂອງ ສປປ ລາວ ທີ່ໄດ້ຮັບກຽດເປັນເຈົ້າພາບ ຊຶ່ງໃນ 10 ປີ ທີ່ຜ່ານມາ ສປປ ລາວ ໄດ້ມີການວາງແຜນ ແລະ ສຸມຄວາມພະຍາຍາມໃນ ການປັບປຸງ ແລະ ຂະຫຍາຍພື້ນຖານໂຄງລ່າງໂທລະຄົມມະນາຄົມຂອງປະເທດ ແຕ່ສູນກາງລົງຮອດທ້ອງຖິ່ນ ເພື່ອໃຫ້ການເຊື່ອມຕໍ່ເຄືອຂ່າຍໄດ້ມາດຕະຖານສູງ. ບັນດານິຕິກໍາຕ່າງໆ ແລະ ນະໂຍບາຍດ້ານເຕັກໂນໂລຊີການສື່ສານ ແລະ ຂໍ້ມູນຂ່າວສານ (ໄອຊີທີ)  ກໍໄດ້ຮັບການປັບປຸງໃຫ້ແທດເໝາະກັບສະພາບການຂະຫຍາຍຕົວຂອງເສດຖະກິດ-ສັງຄົມ ແລະ ເຕັກໂນໂລຊີໃໝ່ ເຮັດໃຫ້ອັດຕາສ່ວນຂອງຜູ້ຊົມໃຊ້ໂທລະສັບ ແລະ ອິນເຕີເນັດ ມີການຂະຫຍາຍຕົວຢ່າງກ້າວກະໂດດ ແລະ ປີນີ້ແມ່ນຄົບຮອບ 52 ປີ ແຫ່ງການສ້າງຕັ້ງອາຊຽນ, ຄົບຮອບ 22 ປີ ທີ່ ສປປ ລາວ ເຂົ້າເປັນສະມາຊິກ. ຕະຫຼອດໄລຍະເວລາຜ່ານມາ ອາຊຽນ ໄດ້ມີການຮ່ວມມືຊ່ວຍເຫຼືອເຊິ່ງກັນ ແລະ ກັນ ເພື່ອການພັດທະນາໃນຫຼາຍໆດ້ານ ບໍ່ວ່າຈະເປັນດ້ານ ເສດຖະກິດ-ສັງຄົມ, ວັດທະນະທໍາ, ເຕັກນິກວິຊາການ, ການສຶກສາ ແລະ ອື່ນໆ ລວມທັງການສົ່ງເສີມ ສັນຕິພາບ, ສະຖຽນລະພາບ ແລະ ຄວາມໝັ້ນຄົງ ໃນພາກພື້ນອາຊຽນ. ປັດຈຸບັນ, ອາຊຽນ ໄດ້ກາຍເປັນຈຸດໃຈກາງອັນສຳຄັນໜຶ່ງໃນການ ຂັບເຄື່ອນເສດຖະກິດ-ສັງຄົມ ດ້ວຍການນໍຳໃຊ້ນະວັດຕະກຳໃໝ່ທາງດ້ານໄອຊີທີ ແລະ ການຫັນເປັນດີຈີຕອນ ໃນການເຊື່ອມໂຍງ-ເຊື່ອມຈອດ. ໃນຖານະເປັນສະມາຊິກອາຊຽນ, ສປປ ລາວ ຈະສືບຕໍ່ຕັ້ງໜ້າເສີມຂະຫຍາຍຂີດຄວາມສາມາດຂອງຕົນ ແລະ ສະໜັບສະໜູນການຮ່ວມມືໃນທຸກຂົງເຂດວຽກງານທີ່ອາຊຽນໄດ້ຕົກລົງກັນ ເພື່ອໃຫ້ ບັນລຸເປົ້າໝາຍຕາມແຜນພັດທະນາໃນດ້ານຕ່າງໆຂອງອາຊຽນ ກໍ່ຄືການເຮັັດໃຫ້ ວິໃສທັດປະຊາຄົມອາຊຽນ 2025 ປະກົດຜົນເປັນຈິງ.

               ພ້ອມນີ້, ບັນ​ດາລັດຖະມົນຕີ ອາຊຽນໄດ້ມີການປຶກສາຫາລື, ແລກປ່ຽນດ້ານນະໂຍບາຍ ແລະ ລະບຽບການ ກັບ ປະເທດຄູ່ຮ່ວມເຈລະຈາ ລວມທັງການຮ່ວມມືກັບຄູ່ຮ່ວມພັດທະນາ, ຜູ້ປະກອບການພາກເອກະຊົນ ເພື່ອສ່ົງເສີມໃຫ້ເສດຖະກິດ-ສັງຄົມດິຈິຕອນ ມີການຂະຫຍາຍຕົວ, ສອດຄ່ອງກັບເປົ້າໝາຍປະຊາຄົມອາຊຽນ ຊຶ່ງປີນີ້ ໄດ້ກ້າວເຂົ້າສູ່ປີສຸດທ້າຍ ຂອງການຈັດຕັ້ງປະຕິບັດ ແຜນແມ່ບົດອາຊຽນ ໄອຊີທີ 2020 (AIM 2020) ໂດຍມີຫຼາຍກິດຈະກໍາ ທີ່ໄດ້ຈັດຕັ້ງປະຕິບັດ ເພື່ອຜັນຂະຫຍາຍແຜນແມ່ບົດ ອາຊຽນ ໄອຊີທີ (AIM 2020) ຄຽງຄູ່ກັບການ ຖອດຖອນບົດຮຽນທີ່ສໍາຄັນ  ເພື່ອເປັນແນວທາງ ໃນການສຶບຕໍ່ປະຕິບັດໜ້າທີ່ວຽກງານໃນຕໍ່ໜ້າ ເພື່ອປະກອບສ່ວນເຮັດໃຫ້ບັນດາປະເທດ ສະມາຊິກ ອາຊຽນ ມີຄວາມກ້າວໜ້າໃນແຕ່ລະດ້ານເປັນຢ່າງດີ ແລະ ຫັນເປັນດີຈີຕອນ ເທື່ອລະກ້າວ. ລາຍລະອຽດຜົນຂອງກອງປະຊຸມ ສາມາດເຂົ້າ ຕິດຕາມໄດ້ທີ http://www.aseantelmin2019.gov.la/

ໃນໂອກາດດຽວກັນນີ້, ສ​ປ​ປ ລາວ ຍັງ​ໄດ້ຮັບ​ກຽດ​ເປັນ​ເຈົ້າ​ພາບ​ຈັດ​ງານ​ແຂ່ງ​ຂັນ​ຜະ​ລິດ​ຕະ​ພັນ ໄອ​ຊີ​ທີ ອາ​ຊຽ​ນ​ ປະ​ຈຳ​ປີ 2019 (ASEAN ICT Award – AICTA) ​ທີ່ເປັນ​ແຂ່ງ​ຂັນ​​ປະ​ກວດ​ຜະ​ລິດ​ຕະ​ພັນ​ ICT ຂອງ​ບັນດາປະ​ເທດ​ສະ​ມາ​ຊິກອາຊຽນ, ຊຶ່ງຜະ​ລິດ​ຕະ​ພັນ​ທີ່​ສົ່ງ​ເຂົ້າ​ປະ​ກ​ວດແບ່ງ​ອອກ​ເປັ​ນ 6 ໝວດ (Public Sector, Private Sector, Corporate Social Responsible, Content, Start-up Company ແລະ Research and Development) ຊຶ່ງຈະປະກາດຜົນການແຂ່ງຂັນໃນມື້ນີ້ ວັນທີ 24 ຕຸລາ. ລາຍລະອຽດ ຂອງການປະກວດ ຜະລິດຕະພັນໄອຊີທີ ສາມາເຂົ້າເບີ່ງໄດ້ທີ : https://aseanictaward.com/

   ໂດຍ: ຫ້ອງການກະຊວງ.