ປທສ ສໍາມະນາການພັດທະນາໄອຊີທີ ແບບຍືນຍົງ ຂອງປະເທດເຂດລຸ່ມແມ່ນໍ້າຂອງ-ແມ່ນໍ້າລ້ານຊ້າງ

​ເຜີຍ​ແຜ່​ໂດຍ: admin|ຢ້ຽມ​ຊົມ: 48 ຄັ້ງ | ເວ​ລາ | 2024-12-22 00:00:00

     ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ຈັດກອງປະຊຸມສຳມະນາ ພາຍໃຕ້ຫົວຂໍ້: ການພັດທະນາໄອຊີທີແບບຍືນຍົງ ຂອງປະເທດລຸ່ມແມ່ນໍ້າຂອງ-ແມ່ນໍ້າລ້ານຊ້າງ (Lancang-Mekong Forum on Sustainable Development for ICT) ຂຶ້ນໃນວັນລະຫວ່າງວັນທີ 27-28 ມິຖຸນາ 2019 , ທີ່ໂຮງແຮມດອນຈັນພຣາເລດ, ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ທອງໃສ ຊານໄຊຍະ, ຮອງລັດຖະມົນຕີ ກະຊວງ ປທສ,  ມີຜູ້ຕາງໜ້າຈາກ ສະ​ຖານເອກອັກຄະລັດຖະທູດ ສປ. ຈີນ ປະຈຳ ສປປ ລາວ, ຕາງໜ້າຈາກບັນດາປະເທດສະມາຊິກເຂດລຸ່ມ ແມ່ນໍ້າຂອງ-ແມ່ນໍ້າລ້ານຊ້າງ ແລະ ຜູ້ຕາງໜ້າຈາກ ສະ​ຖານເອກອັກຄະລັດຖະທູດທີ່ກ່ຽວຂ້ອງ, ບັນດາກະຊວງ/ອົງການທຽບເທົ່າ, ຄະນະກົມ/ທຽບເທົ່າອ້ອມຂ້າງກະຊວງ ປທສ ແລະ ບັນດາພະແນກ ປທສ ແຂວງ/ນະຄອນຫຼວງ ເຂົ້າຮ່ວມ. ໂດຍມີນັກວິທະຍາກອນຈາກ ກະຊວງ ປທສ, ສະຖາບັນຄົ້ນຄວ້າເສດຖະກິດ ແຫ່ງ ສປປ ລາວ ແລະ ສະມາຄົມການຄ້າ ໄອຊີທີ ລາວ ມາຂຶ້ນບັນຍາຍເອກະສານ.

         ການຈັດກອງປະຊຸມສຳມະນາໃນຄັ້ງນີ້ ກໍ່ເພື່ອເປັນເວທີການແລກປ່ຽນຄວາມຮູ້ ແລະ ປະສົບການລະຫວ່າງປະເທດເຂດລຸ່ມ ແມ່ນໍ້າຂອງ-ແມ່ນໍ້າລ້ານຊ້າງ ແລະ ສປ. ຈີນ ກ່ຽວກັບ ຫົວຂໍ້ດັ່ງກ່າວ. ຊຶ່ງໄດ້ຮັບທຶນ​ສະ​ໜັບ​ສະ​ໜູນ ພາຍ​ໃຕ້​ກອງ​ທຶນ​ພິ​ເສດ ແມ່​ນ້ຳ​ຂອງ-ແມ່ນ​້ຳ​ລ້ານ​ຊ້າງ, ຂອງ​ລັດ​ຖະ​ບານ ສ​ປ. ຈີນ. ຊຶ່ງເປັນໜຶ່ງໃນຫຼາຍກິດຈະກຳ ທີ່ ສປ. ຈີນ ໄດ້ໃຫ້ການຊ່ວຍເຫຼືອແກ່ ສປປ ລາວ ແລະ ບັນດາປະເທດ ເຂດລຸ່ມ ແມ່ນໍ້າຂອງ-ແມ່ນໍ້າລ້ານຊ້າງ ໃນປີ 2017 ແລະ 2018. ພ້ອມທັງເປັນການຜັນຂະຫຍາຍ ວິໃສທັດຮອດປີ 2030, ແຜນຍຸດທະສາດ ໄລຍະ 10 ປີ (2016-2025) ແລະ ແຜນພັດທະນາ 5 ປີ ຄັ້ງທີ II (2016-2020) ຂອງຂະແໜງ ປທສ.ການສົນທະນາກ່ຽວກັບການພັດທະນາ ໄອຊີທີ ຂອງພາກພື້ນນີ້ບໍ່ພຽງແຕ່ເປັນການແລກປ່ຽນຄວາມຮູ້ ແລະ ປະສົບການອັນດີລະຫວ່າງກັນແລ້ວ ແຕ່ຍັງເປັນການສົ່ງເສີມສາຍພົວພັນອັນດີລະຫວ່າງປະເທດເພື່ອນບ້ານທີ່ຢູ່ໃນຂົງເຂດ ແມ່​ນ້ຳ​ຂອງ-ແມ່ນ​້ຳ​ລ້ານ​ຊ້າງ.     ໃນໂອກາດນີ້, ທ່ານ  ທອງໃສ ຊານໄຊຍະ, ຮອງລັດຖະມົນຕີ ກະຊວງ ປທສ ຍັງໄດ້ກ່າວໃນ​ງານ​ວ່າ:  “ໃນຍຸກເສດຖະກິດດິຈິຕອນ, ໄອຊີທີ ແລະ ເຕັກໂນໂລຊີດິຈິຕອນ ແມ່ນມີບົດບາດສໍາຄັນໃນການພັດທະນາເສດຖະກິດ-ສັງຄົມ ຂອງທຸກປະເທດ ພ້ອມກັບນັບມື້ນັບຂະຫຍາຍຕົວ ແລະ ມີຄວາມເກາະກ່າຍຂ້າມຂະແໜງການ. ພວກເຮົາຫວັງຢ່າງຍິ່ງວ່າ ການຮ່ວມມືພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງນີ້ ຈະຂັບເຄື່ອນໃຫ້ບັນລຸເປົ້າໝາຍ ຊຶ່ງຈະເປັນການຊ່ວຍພັດທະນາຂະແໜງການ ໄອຊີທີ ແບບຍືນຍົງໃນອະນຸພາກພື້ນ ເພື່ອໃຫ້ເປັນແຮງຜັກດັນການສ້າງສາ ແລະ ພັດທະນາປະເທດຊາດໂດຍລວມ”. ພ້ອມນີ້ ທ່ານ ຍັງໄດ້ ຊົມເຊີຍ ກະຊວງ ການຕ່ງປະເທດ ຂອງ ສປປ ລາວ ທີ່ໄດ້ຊ່ວຍຊຸກຍູ້ ແລະ ຍາດແຍ່ງກາລະໂອກາດຕ່າງໆ ໃຫ້ບັນດາຂະແໜງການເພື່ອໃຫ້ສາມາດບັນລຸເປົ້າໝາຍແຫ່ງການພັດທະນາຂອງ ປະເທດເຮົາ.

          ໃນງານສໍາມະນາດັ່ງກ່າວ, ບັນດາ​ນັກສໍາມະນາກອນໄດ້ຮັບຟັງການເຜີຍແຜ່, ປະກອບຄໍາເຫັນ, ແລກປຽ່ນບົດຮຽນ, ປະສົບການທາງດ້ານເຕັກໂນໂລຊີ ແລະ ແນວທາງນະໂຍບາຍຕ່າງໆ, ນິຕິກໍາ ທີ່ຍົກໃຫ້ເຫັນສະພາບການນໍາໃຊ້ ໄອຊີທີ, ທິດທາງ ແລະ ແຜນການຂອງແຕ່ລະປະເທດ. ຊຶ່ງລວມມີຫົວ​ຂໍ້ຕິດພັນກັບ ການພັດທະນາແບບຍືນຍົງ, ເສດຖະກິດ ດິຈິຕອນ (Digital Economy) ແລະ ການຫັນເປັນທັນສະໄໝ (Digital Transformation). ນອກຈາກ 6 ປະເທດ ຈະໄດ້ຂື້ນແລກປ່ຽນບົດຮຽນ ແລ້ວ ຍັງມີແຂກພິເສດມາຮ່ວມສົນທະນາໃນວາລະຂອງການສຳມະນາ ເປັນຕົ້ນແມ່ນ ຈາກ ກະຊວງ ປທສ, ສະຖາບັນຄົ້ນຄ້ວາ ເສດຖະກິດ ແຫ່ງຊາດ ແລະ ສາມາຄົມການຄ້າ ໄອຊີທີ ລາວ ອີກດ້ວຍ.

            ຂ່າວ: ກົມແຜນການ ແລະ ການຮ່ວມມື, ປທສ.

          ພາບ: ຫ້ອງການກະຊວງ.