ສຳມະນາ ການພັດທະນາລະບົບບໍລິຫານລັດດ້ວຍເອເລັກໂຕຣນິກ, ໄອຊີທີ ແລະ ການພັດທະນາລະບົບແຈ້ງເຕືອນໄພພິບັດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 38 ຄັ້ງ | ເວ​ລາ | 2024-12-22 00:00:00

         ກະຊວງ ໄປສະນີໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດງານປະຊຸມສຳມະນາກ່ຽວກັບ ການພັດທະນາລະບົບບໍລິຫານລັດດ້ວຍເອເລັກໂຕຣນິກ, ໄອຊີທີ ແລະ ການສະໜັບສະໜູນໃຫ້ກັບລະບົບແຈ້ງເຕືອນໄພພິບັດຢູ່ ສປປ.ລາວ ຂື້ນໃນວັນທີ 27 ມິຖຸນາ 2019 , ທີ່ໂຮງແຮມ ດອນຈັນພາເລດ, ນະຄອນຫຼວງວຽງຈັນ. ໂດຍການເປັນປະທານຂອງ         ທ່ານ ປອ. ສົມໄພວັນ ແສງສຸຣິຍະ ຮອງຫົວໜ້າສູນບໍລິຫານລັດດ້ວຍເອເລັກໂຕຣນິກ, ກະຊວງ ປທສ ມີຜູ້ຕາງໜ້າຈາກບັນດາອົງການຈັດຕັ້ງລັດ, ສະຖາບັນການສຶກສາຕ່າງໆທີກ່ຽວຂ້ອງ ລວມເຖິງບໍລິສັດໂທລະຄົມ ແລະ ບັນດາກົມອ້ອມຂ້າງກະຊວງ ປທສ  ເຂົ້າຮ່ວມ.

          ການຈັດກອງປະຊຸມສຳມະນາຄັ້ງນີ້ ແມ່ນເພື່ອເປັນການເຜີຍແຜ່, ແລກປ່ຽນຄວາມຮູ້ ແລະ ປະສົບການ ກ່ຽວກັບການພັດທະນາລະບົບບໍລິຫານລັດດ້ວຍເອເລັກໂຕຣນິກ, ໄອຊີທີ ແລະ ການພັດທະນາລະບົບແຈ້ງເຕືອນໄພພິບັດ ທາງທຳມະຊາດ ພ້ອມທັງເປັນການສົ່ງເສີມການຫັນເປັນທັນສະໄໝທາງດ້ານດິຈິຕອນ ໃນການຂັບເຄື່ອນ ແລະ ສະໜັບສະໜູນວຽກງານໃນທຸກຂົງເຂດ ປະກອບສ່ວນເຂົ້າໃນການຊຸກຍູ້ການຂະຫຍາຍຕົວຂອງເສດຖະກິດ-ສັງຄົມ ເຮັດໃຫ້ຄົນໃນສັງຄົມມີຊີວິດການເປັນຢູ່ທີ່ດີຂຶ້ນ.

           ທ່ານ ປອ. ສົມໄພວັນ ແສງສຸຣິຍະ ໄດ້ກ່າວວ່າ: ການພັດທະນາລະບົບບໍລິຫານລັດດ້ວຍເອເລັກໂຕຣນິກ, ໄອຊີທີ  ແມ່ນວຽກງານໜຶ່ງທີ່ສໍາຄັນ ແລະ ຈໍາເປັນ ໃນການຊຸກຍູ້, ສົ່ງເສີມ ໃຫ້ແກ່ວຽກງານຂອງທຸກຂະແໜງການ ທັງພາກລັດ -ເອກະຊົນ ໃຫ້ມີຄວາມສະດວກ, ວ່ອງໄວ, ໂປ່ງໃສ, ມີປະສິດທິພາບ ເພື່ອຫັນເປັນລັດຖະບານທັນສະໄໝ ເທື່ອລະກ້າວ. ໃນປະຈຸບັນ ບັນດາປະເທດທົ່ວໂລກ ກໍ່ຄື ບັນດາປະເທດອາຊຽນ ແມ່ນໄດ້ສຸມໃສ່ພັດທະນາວຽກງານດັ່ງກ່າວ ເພື່ອສົ່ງເສີມທຸກຂະແໜງການໃຫ້ມີການພັດທະນາ ແນ່ໃສ່ຊຸກຍູ້ ແລະ ສະໜັບສະໜູນການພັດທະນາເສດຖະກິດ-ສັງຄົມ ແລະ ສ້າງລາຍຮັບເຂົ້າປະເທດໃຫ້ໄດ້ຫຼາຍຂຶ້ນ”. ຊຶ່ງປະກອບມີເນື້ອໃນຫລັກຄື: ສະພາບ ແລະ ແຜນການພັດທະນາ ລະບົບບໍລິຫານລັດດ້ວຍເອເລັກໂຕຣນິກ, ລະບົບ ICT ແລະ ລະບົບຄວາມປອດໄພທາງໄຊເບີ ຢູ່ ສປປ ລາວ, ສະເໜີການພັດທະນາ ແລະ ນຳໃຊ້ລະບົບແຈ້ງເຕືອນໄພພິບັດ ທາງທຳມະຊາດຂອງລາວ. ພ້ອມກັນນັ້ນ, ກໍ່ໄດ້ມີການນຳສະເໜີບົດຮຽນ ຂອງສາກົນ ເປັນ ຕົ້ນແມ່ນ: ການພັດທະນາລະບົບດັ່ງກ່າວ ຢູ່ ສສ ຫວຽດນາມ ແລະ ສ. ເກົາຫລີ ເພື່ອໃຫ້ບັນດານັກສຳມະນາກອນ ສາມາດເຫັນໄດ້ເຖິງຄວາມສຳຄັນ, ຈຳເປັນໃນການພັດທະນາ ແລະ ນຳໃຊ້ລະບົບດັ່ງກ່າວ ເຂົ້າໃນວຽກງານຕົວຈິງ ໃນການເພີ່ມປະສິດທິພາບ ຂອງວຽກງານ ແລະ ໜູນໃຊ້ໃຫ້ເກີດປະໂຫຍດສູງສຸດ. ໃນໂອກາດດຽວກັນ, ກໍໄດ້ມີການແລກປ່ຽນບົດຮຽນ , ປະກອບຄຳຄິດເຫັນ ທີ່ເປັນປະໂຫຍດໃນການພັດທະນາ, ສົ່ງເສີມການນຳໃຊ້ລະບົບບໍລິຫານລັດດ້ວຍເອເລັກໂຕຣນິກ ໃຫ້ກ້ວາງຂວາງ ແລະ ມີປະສິດທິຜົນສູງສຸດ.

             ຂ່າວ: ສູນບໍລິຫານລັດດ້ວຍເອເລັກໂຕຣນິກ, ປທສ.

             ພາບ: ຫ້ອງການກະຊວງ.