ຝຶກອົບຮົມ ກໍານົດຕົວປ່ຽນ, ວິທີການສໍາຫຼວດ, ວິເຄາະ ແລະ ນໍາໃຊ້ຫຼັກການສຶກສາສະພາບການແຂ່ງຂັນໃນຕະຫຼາດໂທລະຄົມມະນາຄົມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 41 ຄັ້ງ | ເວ​ລາ | 2024-12-22 00:00:00

       ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປີດຊຸດຝຶກອົບຮົມໃນຫົວຂໍ້: ພື້ນຖານການກໍານົດຕົວປ່ຽນ, ວິທີການສໍາຫຼວດ, ວິເຄາະ ແລະ ນໍາໃຊ້ຫຼັກການສຶກສາສະພາບການແຂ່ງຂັນໃນຕະຫຼາດໂທລະຄົມມະນາຄົມ ຂຶ້ນໃນລະຫວ່າງວັນທີ 13-17 ພຶດສະພາ 2019, ທີ່ຕຶກສະຖາບັນສະຖາບັນເຕັກໂລຊີການສື່ສານຂໍ້ມູນຂ່າວສານ. ພາຍໃຕ້ການເປັນປະທານ ແລະ ກ່າວເປີດໂດຍ ທ່ານ ບັນຈົງ ເພັດສີແດງ ຫົວໜ້າອົງການດັດສົມໂທລະຄົມມະນາຄົມ, ກະຊວງ ປທສ ມີບັນດາທ່ານຫົວໜ້າກົມ/ທຽບເທົ່າ, ຫົວໜ້າພະແນກ ພ້ອມດ້ວຍພະນັກງານວິຊາການອ້ອມຂ້າງກະຊວງ ປທສ ເຂົ້າຮ່ວມ. ໂດຍມີນັກວິທະຍາກອນ ຈາກສູນຄົ້ນຄວ້ານະໂຍບາຍພັດທະນາວິສາຫະກິດ ແລະ​ ການເຊື່ອມໂຍງສາກົນ, ສະຖາບັນ​ຄົ້ນຄວ້າ​ເສດຖະກິດ​ແຫ່ງຊາດ ທ່ານ ປອ ພັນປະກິດ ອ່ອນພັນລາດາ ແລະ ຄະນະຜູ້ຊ່ວຍ.

       ການຈັດຝຶກອົບຮົມໃນຄັ້ງນີ້, ກໍ່ເພື່ອສ້າງຄວາມເຂັ້ມແຂງ, ສ້າງຄວາມເຂົ້າໃຈ ແລະ ທັກສະໃນການສຳຫຼວດ, ເກັບກຳຂໍ້ມູນ ຮູ້ທີການກຳນົດກຸ່ມເປົ້າໝາຍສຳລັບການລົງສຳຫຼວດ,  ວີທີການສ້າງແບບສອບຖາມສຳລັບແຕ່ລະກຸ່ມເປົ້າໝາຍ ພ້ອມທັງການລົງຢາຍແບບສອບຖາມ ແລະ ຄຳຖາມສຳພາດ, ການສັງລວມວິເຄາະຂໍ້ມູນເພື່ອເຮັດເປັນບົດລາຍງານຜົນການສຳຫຼວດ ຫຼື ຜົນການວິໄຈ. ພ້ອມດຽວກັນນີ້, ຍັງໄດ້ມີການປຶກສາຫາລື  ແລະ ແລກປ່ຽນບົດຮຽນຊື່ງ ແລະ ກັນ ມີການຕັ້ງຄຳຖາມ-ຕອບຄຳຖາມ ມີການຄົ້ນຄິດແບບວິທະຍາ ແລະ ມີການໂຕ້ວາທີແລກປ່ຽນບົດຮຽນຕະຫຼອດໃນໄລຍະ 5 ວັນ ຊຶ່ງປະກອບດ້ວຍ 2 ພາກຄື:  ພາກທິດສະດີ ແລະ ພາກປະຕິບັດຕົວຈີງໄປພ້ອມໆກັນ.

            ຜ່ານການຈັດຝຶກອົບຮົມໃນຄັ້ງນີ້ເຫັນໄດ້ວ່າ ສາມາດບຸກທະລຸທາງດ້ານຈິນຕະນາການເກົ່າໄປເປັນອັນໃໝ່ທີ່ສາມາດນຳໃຊ້ຢ່າງເປັນຮູບປະທຳ, ຊື່ງສະແດງອອກ ຜູ້ເຂົ້າຮ່ວມໄດ້ຮັບຮູ້, ເຂົ້າໃຈຕໍ່ກັບທິດສະດີ, ບັນດາວິທີການຕ່າງໆ ກ່ຽວກັບການວິເຄາະຂໍ້ມູນຈາກການລົງສຳຫຼວດເປັນຢ່າງດີ ແລະ ສາມາດນຳໄປສືບຕໍ່ຜັນຂະຫຍາຍປະຍຸກເຂົ້າໃນໜ້າທີ່ວຽກດ້ານການເກັບກຳ ແລະ ສຳຫຼວດຂໍ້ມູນຕ່າງໆໃນຂອບເຂດວຽກຂອງຕົນຢ່າງມີປະສິດທິພາບຂື້ນກວ່າເກົ່າ.

            ພາບ+ຂ່າວ: ອົງການດັດສົມໂທລະຄົມມະນາຄົມ.