ພິທີປະກາດການແຕ່ງຕັ້ງ ແລະ ຊັບຊ້ອນ ພະນັກງານຂັ້ນຮອງຫົວໜ້າກົມ ພາຍໃນກະຊວງ ປທສ

​ເຜີຍ​ແຜ່​ໂດຍ: admin|ຢ້ຽມ​ຊົມ: 56 ຄັ້ງ | ເວ​ລາ | 2024-12-22 00:00:00

           ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີປະກາດການແຕ່ງຕັ້ງ ແລະ ຊັບຊ້ອນພະນັກງານ ຂັ້ນຮອງກົມ ຂຶ້ນໃນວັນທີ 09 ພຶດສະພາຜ່ານມານີ້, ໂດຍການເປັນປະທານ ຂອງ ທ່ານ ທອງໃສ ຊານໄຊຍະ ຮອງເລຂາຄະນະພັກ, ຮອງລັດຖະມົນຕີ ກະຊວງ ປທສ, ມີບັນດາຫົວໜ້າ-ຮອງຫົວໜ້າກົມ/ທຽບເທົ່າ, ບັນດາຫົວໜ້າ-ຮອງຫົວໜ້າພະແນກ ແລະ ພະນັກງານວິຊາການອ້ອມຂ້າງກະຊວງເຂົ້າຮ່ວມ.​

           ທ່ານ ຈັນທະວີພອນ ເຄຶອບຄຳວອນ ຮອງຫົວໜ້າກົມຈັດຕັ້ງ-ພະນັກງານ, ກະຊວງ ປທສ ໄດ້ໃຫ້ຜ່ານຂໍ້ຕົກລົງຂອງ ທ່ານ ລັດຖະມົນຕີ ກະຊວງ ປທສ ສະບັບເລກທີ 1187/ປທສ, ລົງວັນທີ 07 ພຶດສະພາ 2019  ວ່າດ້ວຍການຍົກຍ້າຍ ທ່ານ ນາງ ພິຊິດໄພ ກ໋ອກມີລາ ຮອງຫົວໜ້າອົງການດັດສົມໂທລະຄົມມະນາຄົມ ໄປເປັນ ຮອງຫົວໜ້າສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ ແລະ ຂໍ້ຕົກລົງ ສະບັບເລກທີ 1133/ປທສ, ລົວັນທີ 30 ເມສາ 2019 ວ່າດ້ວຍການແຕ່ງຕັ້ງ  ທ່ານ ປອ ນາງ ໃຈມາລີ ພະກະຊຸມ ຫົວຫນ້າພະແນກແຂ່ງຂັນ ແລະ ບໍລິການ, ຮອງຫົວໜ້າອົງການດັດສົມໂທລະຄົມມະນາຄົມ ຂຶ້ນເປັນ ຮອງຫົວໜ້າອົງການດັດສົມໂທລະຄົມມະນາຄົມ.

           ໃນໂອກາດດຽວກັນ, ທ່ານ ທອງໃສ ຊານໄຊຍະ ໄດ້ໃຫ້ກຽດໂອ້ລົມຕໍ່ພິທີ: ຊຶ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ບັນດາທ່ານ ທີ່ໄດ້ຮັບການແຕ່ງຕັ້ງ ແລະ ໄດ້ກ່າວເນັ້ນຕື່ມ ໃຫ້ຜູ້ຖືກແຕ່ງຕັ້ງ ເອົາໃຈໃສ່ເພີ່ມທະວີຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງຂຶ້ນກ່ວາເກົ່າ, ປະຕິບັດຕົນໃຫ້ກາຍເປັນແບບຢ່າງທີ່ດີຂອງພະນັກງານ, ມີຄວາມຫ້າວຫັນໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ, ເພີ່ມທະວີການຮຽນຮູ້ຂຶ້ນຕື່ມກ່ຽວກັບ ການຄຸ້ມຄອງລັດເຂົ້າສູ່ລະບຽບກົດໝາຍ, ເອົາໃຈໃສ່ຝຶກຝົນຫຼໍ່ຫຼອມຕົນເອງໃນທຸກດ້ານເປັນຕົ້ນແມ່ນ ດ້ານຄຸນສົມບັດສິນທຳປະຕິວັດ ແລະ ແບບແຜນການເຮັດວຽກຂອງຕົນ ໃຫ້ສາມາດຊີ້ນຳ-ນຳພາວຽກງານທີ່ຕົນຮັບຜິດຊອບໄດ້, ຫຼີກເວັ້ນພະຍາດອາຍາສິດ ບໍ່ຫຼີ້ນພັກຫຼີ້ນພວກ, ມີສະຕິສູງໃນການເຄື່ອນໄຫວດຳລົງຊີວິດຂອງຕົນ ແລະ ໃຫ້ຖືເອົາຄວາມສາມັກຄີພາຍໃນ ເປັນໝາກຫົວໃຈຂອງການເຮັດວຽກໃນການຊີ້ນຳ-ນຳພາວຽກງານຂອງຕົນ. ພ້ອມດຽວກັນນີ້, ທ່ານຮອງລັດຖະມົນຕີຍັງໄດ້ໃຫ້ທິດທາງການປະຕິບັດວຽກງານ ແລະ ແບບ ແຜນການດໍາລົງຊິວິດໃນຕົວຈິງແກ່ຜູ້ເຂົ້າຮ່ວມກອງປະຊຸມຕຶ່ມອີກ.

            ຂ່າວ: ກົມຈັດຕັ້ງ-ພະນັກງານ.

            ພາບ: ຫ້ອງການກະຊວງ.