ປທສ ​ປະກາດແຕ່ງຕັ້ງຮອງຫົວໜ້າສູນບໍລິຫານລັດດ້ວຍເອເລັກໂຕຼນິກໃໝ່

​ເຜີຍ​ແຜ່​ໂດຍ: admin|ຢ້ຽມ​ຊົມ: 46 ຄັ້ງ | ເວ​ລາ | 2024-12-22 00:00:00

        ໃນຕອນເຊົ້າຂອງວັນພຸດ, ວັນທີ 16 ມັງກອນ ຜ່ານມານີ້, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ(ປທສ) ໄດ້ຈັດພິທີປະກາດການແຕ່ງຕັ້ງພະນັກງານນຳພາ-ຄຸ້ມຄອງ ຂັ້ນຮອງຫົວໜ້າສູນບໍລິຫານລັດດ້ວຍເອເລັກໂຕຼນິກ, ທີ່​ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໂດຍເປັນປະທານ ຂອງ ທ່ານ ທອງໃສ ຊານໄຊຍະ ຮອງເລຂາຄະນະພັກ, ຮອງລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ, ມີບັນດາຫົວໜ້າ-ຮອງຫົວໜ້າກົມ/ທຽບເທົ່າ, ບັນດາຫົວໜ້າ-ຮອງຫົວໜ້າພະແນກ ແລະ ພະນັກງານອ້ອມຂ້າງເຂົ້າຮ່ວມ.​

         ​​ທ່ານ ນາງ ວັນນາ ພົມມະວົງ ຮອງຫົວໜ້າກົມຈັດຕັ້ງ-ພະນັກງານ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ  ໄດ້ໃຫ້ກຽດອ່ານຜ່ານຂໍ້ຕົກລົງຂອງ ທ່ານ ລັດຖະມົນຕີ ກະຊວງ ປທສ ສະບັບເລກທີ 022/ປທສ, ລົງວັນທີ 10 ມັງກອນ 2019  ວ່າດ້ວຍການແຕ່ງຕັ້ງ  ທ່ານ ປອ ສົມໄພວັນ ແສງສຸຣິຍະ  ແລະ  ທ່ານ ນາງ ຈິດຕະພອນ ຈັນສິລິລາດ ເປັນຮອງຫົວໜ້າສູນບໍລິຫານລັດດ້ວຍເອເລັກໂຕຼນິກ. ໃນໂອກາດນີ້, ທ່ານ ຮອງລັດຖະມົນຕີໄດ້ໃຫ້ກຽດໂອ້ລົມພ້ອມທັງສະແດງຄວາມຍ້ອງຍໍຊົມເຊີຍຕໍ່ບັນດາທ່ານ ທີ່ໄດ້ຮັບການແຕ່ງຕັ້ງ ແລະ ໄດ້ກ່າວເນັ້ນຕື່ມ ໃຫ້ຜູ້ຖືກແຕ່ງຕັ້ງໃນຄັ້ງນີ້ໃຫ້ ເອົາໃຈໃສ່ເພີ່ມທະວີຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງຂຶ້ນກ່ວາເກົ່າ, ປະຕິບັດຕົນໃຫ້ກາຍເປັນແບບຢ່າງທີ່ດີຂອງພະນັກງານ, ມີຄວາມຫ້າວຫັນໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ, ເອົາໃຈໃສ່ຝຶກຝົນຫຼໍ່ຫຼອມຕົນເອງໃນທຸກດ້ານເປັນຕົ້ນແມ່ນ ທາງດ້ານຄຸນສົມບັດສິນທຳປະຕິວັດ ແລະ ແບບແຜນການເຮັດວຽກຂອງຕົນ ໃຫ້ສາມາດຊີ້ນຳ-ນຳພາການປະຕິບັດວຽກງານຂອງຕົນຮັບຜິດຊອບ, ຫຼີກເວັ້ນພະຍາດອາຍາສິດ ບໍ່ຫຼີ້ນພັກຫຼີ້ນພວກ, ມີສະຕິສູງໃນການເຄື່ອນໄຫວດຳລົງຊີວິດຂອງຕົນ ແລະ ໃຫ້ຖືເອົາຄວາມສາມັກຄີພາຍໃນ ເປັນໝາກຫົວໃຈຂອງການເຮັດວຽກໃນການຊີ້ນຳ-ນຳພາວຽກງານຂອງຕົນ. ພ້ອມດຽວກັນນັ້ນ ທ່ານ ຮອງລັດຖະມົນຕີ ຍັງໄດ້ໃຫ້ທິດທາງໃນການປະຕິບັດວຽກງານ ແລະ ແບບແຜນການດຳລົງຊີວິດຕົວຈິງແກ່ຜູ້ເຂົ້າຮ່ວມກອງປະຊຸມຕື່ມອີກ.

       ​ພາຍຫຼັງ ທ່ານຮອງລັດຖະມົນຕີໄດ້ໃຫ້ຄຳໂອວາດແລ້ວ, ທ່ານ ປອ ສົມໄພວັນ ແສງສຸຣິຍະ ຮອງຫົວໜ້າສູນບໍລິຫານລັດດ້ວຍເອເລັກໂຕຼນິກ ຕາງໜ້າຜູ້ຖືກແຕ່ງຕັ້ງ ຂຶ້ນກ່າວຮັບຄຳໂອວາດ ແລະ ໜ້າທີ່ ພ້ອມທັງສະແດງຄວາມຮູ້ບຸນຄຸນຕໍ່ຄຳໂອວາດຂອງ ທ່ານຮອງລັດຖະມົນຕີ ເພື່ອນຳໄປຜັນຂະຫຍາຍ ໃນໜ້າທີ່ວຽກງານຂອງຕົນ ໃຫ້ມີປະສິດທິຜົນສູງສຸດ.

ແຫຼ່ງ: ກ​ຊ ປ​ທ​ສ / 18/01/2019