ງານສຳມະນາກ່ຽວກັບຕົວເມືອງ, ການທ່ອງທ່ຽວ ທັນສະໄໝ (Smart city and Smart tourism) ແລະ ເຕັກໂນໂລຊີ ອິນເຕີເນັດຂອງວັດຖຸສິ່ງຂອງ (Internet of Thing),

​ເຜີຍ​ແຜ່​ໂດຍ: admin|ຢ້ຽມ​ຊົມ: 49 ຄັ້ງ | ເວ​ລາ | 2024-12-22 00:00:00

ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ຮ່ວມກັບບໍລິສັດ VNPT ສສ ຫວຽດນາມໄດ້ຈັດສຳມະນາໃນ 2 ຫົວຂໍ້ຄື: 1) ຕົວເມືອງ ແລະ ການທ່ອງທ່ຽວ ທັນສະໄໝ (Smart city and Smart tourism) ແລະ 2) ການນຳໃຊ້ ແລະ ພັດທະນາເຕັກໂນໂລຊີ ອິນເຕີເນັດຂອງວັດຖຸສິ່ງຂອງ (Internet of Thing) ຂື້ນໃນວັນທີ 25 ມັງກອນ 2018, ເວລາ 14:00 ໂມງ ທີ່ຫ້ອງປະຊຸມກະຊວງ ປທສ. ພາຍໃຕ້ການເປັນປະທານຂອງ ທ່ານ ພູຂົງ ຈິດຮູບໂລກ, ຫົວໜ້າກົມແຜນການ ແລະ ການຮ່ວມມື ໂດຍມີຜູ້ເຂົ້າຮ່ວມຈາກບັນດາກົມອ້ອມຂ້າງກະຊວງ ປທສ ແລະ ຄະນະຜູ້ບໍລິຫານຂອງ ບໍລິສັດ VNPT ປະເທດ ສສ ຫວຽດນາມ ເຂົ້າຮ່ວມທັງໝົດ ຈຳນວນ 30 ທ່ານ.

       ງານສຳມະນາໃນຄັ້ງນີ້ໄດ້ນຳສະເໜີກ່ຽວກັບນິຍາມ, ປະຫວັດຄວາມເປັນມາຂອງການພັດທະນາ, ຄວາມໝາຍຄວາມສຳຄັນ ແລະ ບັນດາອົງປະກອບ ຂອງຕົວເມືອງ ແລະ ການທ່ອງທ່ຽວ ທັນສະໄໝ. ພ້ອມທັງ, ການໃຫ້ຄຳແນະນຳກ່ຽວກັບຂັ້ນຕອນ ແລະ ໜ້າວຽກທີ່ຈະຕ້ອງເຮັດ ແລະ ຖືເປັນບູລິມະສິດໃນການສ້າງ ແລະ ພັດທະນາຕົວເມືອງທັນສະໄໝຂອງ ສປປ ລາວ. 

      ນອກນັ້ນ, ຍັງໄດ້ນຳສະເໜີກ່ຽວກັບລະບົບອິນເຕີເນັດຂອງວັດຖຸສິ່ງຂອງ ຫຼື Internet of Thing, ບັນດາເຕັກໂນໂລຊີ IoT ທີ່ທາງບໍລິສັດ VNPT ໄດ້ພັດທະນາ ແລະ ນຳໃຊ້ໃນປະເທດ ສສ ຫວຽດນາມ ເຊິ່ງຜູ້ເຂົ້າຮ່ວມກໍ່ໃຫ້ຄວາມສົນໃຈຫຼາຍ ໂດຍສະເພາະແມ່ນການນຳເອົາເຕັກໂນໂລຊີ IoT ມາທົດລອງຕິດຕັ້ງຢູ່ສວນຂອງທ່ານ ແກ້ວວິສຸກ ໂສລະພົມ, ຫົວໜ້າສູນອີນເຕີເນັດແຫ່ງຊາດ, ໃນການເຮັດລະບົບການວັດຄວາມຊື້ນຂອງດິນ ແລະ ການສັ່ງຫົດສວນແບບອັດຕະໂນມັດ.

    ການສຳມະນາໃນຄັ້ງນີ້ຖືວ່າເປັນຈຸດເລີ່ມຕົ້ນອີກອັນນື່ງຂອງການຮຽນຮູ້ ແລະ ເຫັນໄດ້ຄວາມໝາຍຄວາມສຳຄັນຂອງການພັດທະນາຕົວເມືອງ ແລະ ການທ່ອງທ່ຽວທັນສະໄໝ ລວມເຖິງການນຳໃຊ້ບັນດາໂປຣແກຣມ IoT ຕ່າງໆ ເຂົ້າມາຮັບໃຊ້ຊີວິດປະຈຳວັນຂອງຄົນເຮົາ. ເຊິ່ງທາງກະຊວງ ປທສ ເອງກໍ່ມີຄວາມສົນໃຈທີ່ຈະສ້າງແລະ ພັດທະນາບາງຕົວເມືອງຂອງ ສປປ ລາວ ໃຫ້ເປັນທັນສະໄໝ. ດັ່ງນັ້ນ, ຈື່ງຕ້ອງການ ການປະສານງານ ແລະ ຮ່ວມມືກັບບັນດາປະເທດຕ່າງໆ ລວມທັງ ປະເທດ ສສ ຫວຽດນາມ.

      ຂ່າວ: ສູນບໍລິຫານລັດດ້ວຍເອເລັກໂຕຣນິກ.