ລາວ- ຈີນ ຮ່ວມມືກັນ ໃນຂົງເຂດໂທລະຄົມມະນາຄົມ ແລະ ໄອຊີທີ (ICT)

​ເຜີຍ​ແຜ່​ໂດຍ: admin|ຢ້ຽມ​ຊົມ: 40 ຄັ້ງ | ເວ​ລາ | 2024-12-22 00:00:00

ທ່ານ ທອງໃສ ຊານໄຊຍະ ຮອງລັດຖະມົນຕີ ກະຊວງ ໄປສະນີ ໂທລະຄົມມະ ນາຄົມ ແລະ ການສື່ສານ (ປທສ) ແຫ່ງ ສປປ ລາວໄດ້ຕ້ອນຮັບການຢ້ຽມຢາມ ແລະ ພົບປະ ຂອງ ທ່ານ ຊາງ ເຟິງ (ZHANG FENG) ຮອງລັດຖະມົນຕີ ກະຊວງ ອຸດສະຫາກຳ ແລະ ເຕັກໂນໂລຊີຂໍ້ມູນຂ່າວສານ (MIIT) ແຫ່ງ ສປ ຈີນ ພ້ອມດ້ວຍຄະນະ ເນື່ອງໃນໂອກາດໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງ ວັນທີ 3-6 ທັນວາ 2017 ນີ້.

         ໃນໂອກາດໄດ້ເດີນທາງມາຢ້ຽມຢາມ ແລະ ພົບປະໃນຄັ້ງນີ້, ຖືວ່າເປັນການພົບປະຄັ້ງທໍາອິດ ຂອງສອງກະຊວງ ເພື່ອເປັນການປຶກສາຫາລື ເພີ່ມທະວີການຮ່ວມມືທາງດ້ານ ICT ຮອບດ້ານຂອງສອງຊາດ ສປປ ລາວ ແລະ ສປ. ຈີນ ກໍ່ຄືກະຊວງ ປທສ ແລະ MIIT ເພື່ອຊຸກຍູ້ການຮ່ວມມືພັດທະນາວຽກງານຂະແໜງການ ICT ຂອງປະເທດ, ໂດຍສະເພາະ ໃນຄັ້ງນີ້, ທັງສອງຝ່າຍໄດ້ຮ່ວມລົງນາມ ໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ໃນຂົງເຂດໂທລະຄົມມະນາຄົມ ແລະ ເຕັກໂນໂລຊີການສື່ສານຂໍ້ມູນຂ່າວສານ (ICT) ເພື່ອເປັນບ່ອນອີງໃນການຮ່ວມມືໃນຕໍ່ໜ້າ. ໂດຍລັດຖະບານ ແຫ່ງ ສປປ ລາວ ກໍ່ຄື ລັດຖະບານ ແຫ່ງ ສາທານະລັດ ປະຊາຊົນ ຈີນ ໄດ້ເຫັນເຖິງຄວາມໝາຍ ຄວາມສຳຄັນ ຂອງບົດບາດວຽກງານ ໂທລະຄົມມະນາຄົມ ແລະ ICT ເພື່ອປະກອບສ່ວນ ເຂົ້າໃນການພັດທະນາ ເສດຖະກິດ-ສັງຄົມ ພາຍໃນປະເທດ ແລະ ໃນລະດັບສາກົນ.

         ທ່ານຮອງລັດຖະມົນຕີ ກະຊວງ ປທສ ໄດ້ຕີລາຄາສູງ ຕໍ່ການມາຢ້ຽມຢາມ ຂອງທ່ານ ຊາງ ເຟິງ (ZHANG FENG). ເຊິ່ງໃນໄລຍະຜ່ານມາ ສອງຝ່າຍຄູ່ຮ່ວມມິດຕະພາບພິເສດອັນຍາວນານ ກໍໄດ້ມີການຮ່ວມມື ຜ່ານຂອບການຮ່ວມມື ພາກພື້ນ ແລະ ສາກົນ ເປັນຕົ້ນ: ການກໍ່ສ້າງບຸກຄະລາກອນທາງດ້ານ ICT, ສະໜັບສະໜູນດ້ານການເງີນ ໃນການກໍ່ສ້າງໂຄ່ງລ່າງພື້ນຖານ. ພາກທຸລະກິດ ກໍ່ໄດ້ມີການຮ່ວມມືກັນເຊັ່ນ: ບໍລິສັດ ດາວທຽມລາວ ເອເຊຍ-ປາຊີຟິກ ຈຳກັດ (LaoSAT), ບໍລິສັດໂທລະຄົມມະນາຄົມ, ລວມທັງບໍລິສັດ ສະໜອງອຸປະກອນ ICT. ສໍາລັບ ກະຊວງ ປທສ ກໍ່ໄດ້ມີການຮ່ວມມືສະເພາະດ້ານ ເປັນຕົ້ນ: ການຮ່ວມມື ລະຫວ່າງ ສູນອິນເຕີເນັດແຫ່ງຊາດ (LANIC) ແລະ ສູນເຄືອຂ່າຍຂໍ່້ມູນຂ່າວສານ (CNNIC) ສປ. ຈີນ, LaoCERT-CNCERT/CC, ການຝຶກອົບຮົມ ຂອງ CNCERT/CC ໃຫ້ LaoCERT ໃນເດືອນຕຸລາ ທີ່ຜ່ານມາ. ກະຊວງ ປທສ ກໍ່ໄດ້ໄປຢ້ຽມຢາມ ແລະ ແລກປ່ຽນບົດຮຽນ ນຳ ສປ. ຈີນ ຫຼາຍຄັ້ງ. ການຮ່ວມມື ລະຫວ່າງ ສອງກະຊວງ ແມ່ນມີຢ່າງຕໍ່ເນື່ອງ ແລະ ຫຼາຍລະດັບ. ການມາເຮັດວຽກຂອງທ່ານໃນຄັ້ງນີ້ ກໍ່ຈະກາຍເປັນ ບາດກ້າວໜຶ່ງ ທີ່ເປັນພື້ນຖານ ໃຫ້ແກ່ການຮ່ວມມືທາງດ້ານການຄຸ້ມຄອງ ວຽກງານ ໂທລະຄົມມະນາຄົມ ແລະ ICT ລະຫວ່າງ ສອງປະເທດ ເພື່ອຮອງຮັບໃຫ້ແກ່ການ ເຊື່ອມໂຍງກັບ ບັນດາປະເທດອາຊຽນ ທັງເປັນການຕອບສະໜອງ ໃຫ້ແກ່ການຈັດຕັ້ງ ປະຕິບັດ ແລະ ບັນລຸເຖິງເປົ້າໝາຍຍຸດທະສາດ ການພັດທະນາ ທາງດ້ານໂທລະຄົມມະນາຄົມ ແລະ ໄອຊີທີ ໃນຂົງເຂດຂອງອາຊຽນ

         ພ້ອມກັນນີ້, ທັງສອງຝ່າຍໄດ້ເຊັນບົດບັນທຶກຄວາມເຂົ້າໃຈ ລະຫວ່າງ ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ ແຫ່ງ ສປປ ລາວ ກັບ ສູນປະສານງານ ແລະ ແກ້ໄຂເຫດສຸກເສີນດ້ານເຕັກນິກຂອງ ສປ ຈີນ, ເພື່ອສ້າງຈຸດປະສານງານ, ແລກປ່ຽນຂໍ້ມູນຂ່າວສານ ດ້ານຄວາມປອດໄພທາງໄຊເບີ, ຊ່ວຍເຫຼືອແກ້ໄຂເຫດສຸກເສີນ ແລະ ໂຄງການຮ່ວມມືຕ່າງໆ. ສຳລັບ ສປປ ລາວ ການພັດທະນາ ວຽກງານ ໂທລະຄົມມະນາຄົມ ແລະ ICT ຍັງປະເຊີນກັບ ສິ່ງທ້າທາຍ ຫຼາຍດ້ານ ແລະ ມີຄວາມຈຳເປັນ ຕ້ອງມີການ ແລກປ່ຽນບົດຮຽນ ແລະ ປະສົບການກັບ ບັນດາປະເທດ ທັງພາກພື້ນ ແລະ ສາກົນ ເພື່ອນຳມາດັດປັບ ໝູນໃຊ້ເຂົ້າໃນການ ພັດທະນາວຽກງານ ໂທລະຄົມມະນາຄົມ ແລະ ICT ໃຫ້ມີປະສິດທິຜົນ ແນ່ໃສ່ປະກອບສ່ວນເຂົ້າໃນການພັດທະນາ ເສດຖະກິດ-ສັງຄົມ ຂອງ ສປປ ລາວ ຫຼາຍຂຶ້ນກວ່າເກົ່າ, ທັງສ້າງເງື່ອນໄຂ ໃຫ້ ສປປ ລາວ ສາມາດເຊື່ອມໂຍງ ກັບພາກພື້ນ ແລະ ສາກົນ.

          ຂ່າວ: ລາວເຊີດ, ປທສ