ລາວ-ຫວຽດນາມ ພົບປະແລກປ່ຽນສອງຝ່າຍ ລາວ-ຫວຽດນາມ

​ເຜີຍ​ແຜ່​ໂດຍ: admin|ຢ້ຽມ​ຊົມ: 46 ຄັ້ງ | ເວ​ລາ | 2024-12-22 00:00:00

ກະຊວງ ໄປສະນີ ໂທລະຄົມມະນາຄົມ ແລະການສື່ສານ (MPT) ສປປ ລາວ ແລະ ກະຊວງ ຖະແຫລງຂ່າວ ແລະ ການສື່ສານ (MIC) ສສ. ຫວຽດນາມໄດ້ມີການຈັດກອງປະຊຸມເວທີຮ່ວມມືເຕັກໂນໂລຊີສື່ສານຂໍ້ມູນຂ່າວສານ ລາວ-ຫວຽດນາມ, ຫວຽດນາມ-ລາວ ກ່ຽວກັບ ການຮ່ວມມື ທາງດ້ານ ເຕັກໂນໂລຊີການສື່ສານຂໍ້ມູນຂ່າວສານ ຂຶ້ນໃນວັນທີ 02 ພະຈິກ ຜ່ານມານີ້, ທີ່ ຊັ້ນ 03 ຂອງຫໍວັດທະນະທຳແຫ່ງຊາດ. ໂດຍການເປັນປະທານຮ່ວມຂອງ ທ່ານ ທອງໃສ ຊານໄຊຍະ ຮອງ ລັດຖະມົນຕີ ກະຊວງ ປທສ ແລະ ທ່ານ ຮ່ວາງ ວີງ ບາວ (Hoang Vinh Bao) ຮອງ ລັດຖະມົນຕີ ກະຊວງ ຖະແຫລງຂ່າວ ແລະ ການສື່ສານ (MIC) ສສ. ຫວຽດນາມ. ມີທ່ານ ຫງຽນ ບ໋າ ຮືງ (Nguyen Ba Hung) ເອອັກຄະລະສະທູດ ຜູ້ມີອຳນາດເຕັມແຫ່ງ ສສ. ຫວຽດນາມ ປະຈຳລາວ ພ້ອມດ້ວຍແຂກທີ່ຖືກເຊີນ ທັງພາກລັດ, ບັນດາ ບໍລິສັດ ຜູ້ປະກອບການ ນັກທຸລະກິດ ຂອງ ສປປ ລາວ ແລະ ສສ ຫຽວດນາມ.

           ການຈັດກອງປະຊຸມໃນຄັ້ງນີ້ແມ່ນເພື່ອ ເປັນການ ເສີມຂະຫຍາຍ ສົ່ງເສີມ ການຮ່ວມມື ແລະ ແລກປ່ຽນ ປະສົບການ ໃນການຄຸ້ມຄອງ ພາກລັດ ຕໍ່ກັບວຽກງານດ້ານການລົງທືນ ແລະ ປະກອບການທຸລະກິດ ພ້ອມກັນນັ້ນກໍເປັນການເປີດໂອກາດໃຫ້ບັນດາ ນັກລົງທືນ ແລະ ຜູ້ປະກອບການໄດ້ມີໂອກາດ ພົບປະ ແລກປ່ຽນບົດຮຽນ ເພື່ອ ຊອກຫາໂອກາດ ແລະ ຊ່ອງທາງ ໃນການຮ່ວມມື ໃນໃນຂົງເຂດ ໂທລະຄົມມະນາຄົມ ແລະ ເຕັກໂນໂລຊີການສື່ສານ ຂໍ້ມູນຂ່າວສານ ລະຫວ່າງສອງ ປະເທດ ລາວ-ຫວຽດນາມ, ຫວຽດນາມ-ລາວ.

         ສຳລັບວຽກງານດ້ານ ໂທລະຄົມມະນາຄົມ ແລະ ເຕັກໂນໂລຊີ ການສື່ສານ ຂໍ້ມູນຂ່າວສານ ໃນປະຈຸບັນຖືເປັນ ປັດໃຈ ແລະ ເຄື່ອງມືທີ່ສຳຄັນ ແລະ ມີຄວາມຈຳເປັນຢ່າງຍີ່ງ ເຊີ່ງ ລັດຖະບານລາວເຮົາກໍໃຫ້ຄວາມສຳຄັນ ແລະ ຖືເອົາວຽກງານດັ່ງກ່າວເປັນບັນຫາສຳຄັນ ເພື່ອ ຊ່ວຍສົ່ງເສີມ, ພັກດັນ ໃຫ້ເປັນເຄື່ອງມື ປະກອບເຂົ້າໃນ ວຽກງານການ ພັດທະນາ ເສດຖະກິດ ໃນຍຸກໃໝ່ ເພື່ອ ຫັນເປັນທັນສະໄໝ, ສະນັ້ນ ລັດຖະບານລາວ ຈຶ່ງໄດ້ມີນະໂຍບາຍ ຊ່ວຍສະໜັບສະໜຸນ ສົ່ງເສີມ, ອຳນວຍຄວາມສະດວກ ແລະ ສ້າງທຸກເງື່ອນໄຂທີ່ ສາມາດສ້າງຄວາມເຊື່ອຖື ແລະ ເປັນປະໂຫຍດໃຫ້ແກ່ ບັນດາ ຫົວໜ່ວຍທຸລະກິດ ຂອງ ຕ່າງປະເທດ ເຂົ້າມາລົງທືນ ເຮັດທຸລະກິດ ໃນຂົງເຂດ ດັ່ງກ່າວ ຢູ່ພາຍໃນ ສປປ ລາວ. ລາວ ແລະ ຫວຽດນາມ ຜ່ານມາ ແຕ່ອາດີດເຖີງປະຈຸບັນ ໄດ້ມີສາຍພົວພັນ ແບບພິເສດຮອບດ້ານ ທີ່ເປັນມູນເຊື້ອ ລະຫວ່າງ ພັກ, ລັດ ແລະ ປະຊາຊົນ ສອງຊາດ ອ້າຍນ້ອງ ເຊີ່ງມັນໄດ້ສົ່ງຜົນອັນດີໃຫ້ແກ່ວຽກງານ ດ້ານການພົວພັນຮ່ວມມື ທີ່ຈະສ້າງຜົນສຳເລັດຍິ່ງຂຶ້ນ ບໍ່ວ່າ ທັງພາກລັດ ແລະ ລະຫວ່າງບັນດາຫົວໜ່ວຍປະກອບການທຸລະກິດ ຂອງສອງປະເທດ ໃນຂົງເຂດ ໂທລະຄົມມະນາຄົມ ແລະ ເຕັກໂນໂລຢີ ການສື່ສານ ຂໍ້ມູນຂ່າວສານ ໃນກອງປະຊຸມ ຄັ້ງນີ້ ທ່ານ ຮອງ ລັດຖະມົນຕີ ກະຊວງ ປທສ ລາວ ໄດ້ເຊີນຊວນ ໃຫ້ ບັນດາ ຜູ້ປະກອບການ ທຸລະກິດ ຂອງຫວຽດນາມ ໃຫ້ເຂົ້າມາລົງທືນ ຢູ່ ລາວ ໃຫ້ຫຼາຍຂຶ້ນ.

         ໃນກອງປະຊຸມພົບປະຄັ້ງນີ້ ຍັງມີການລົງນາມບົດບັນທືກຄວາມເຂົ້າໃນ ການຮ່ວມມື ລະຫວ່າງ ສະຖາບັນເຕັກໂນໂລຊີ ຂໍ້ມູນຂ່າວສານ, ກະຊວງ ໄປສະນີ ໂທລະຄົມມະ ນາຄົມ ແລະ ການສື່ສານ ກັບ ສະຖາບັນ ເຕັກໂນໂລຊີ ໄປສະນີ ໂທລະຄົມມະນາຄົມ (PTIT) ກະຊວງ ຖະແຫລງຂ່າວ ແລະ ການສື່ສານ (MIC) ຫວຽດນາມ, ນອກນັ້ນຍັງມີການເຊັນ ບົດບັນທືກຄວາມເຂົ້າໃນ ການຮ່ວມມື ກັນຂອງ ບັນດາຜູ້ປະກອບການ ທຸລະກິດ ເປັນຕົ້ນ: ການເຊັນ ບົດບັນທືກຄວາມເຂົ້າໃນ ການຮ່ວມມື ລະຫວ່າງ ບໍລິສັດ ລາວໂທລະຄົມ ກັບ ກູ່ມບໍລິສັດ VNPT ແລະ ລະຫວ່າງ ບໍລິສັດ ໄປສະນີລາວ ກັບ ບໍລິສັດ ໄປສະນີ ຫວຽດນາມ.

     ຂ່າວ: ຄອນສະຫວັນ ແກ້ວໂສພາ.