ສູນນະວັດຕະກຳຊໍາຊຸງເລີ່ມດຳເນີນການໃນລາວພາຍໃຕ້ການຮ່ວມມືກັບ ມຊ

​ເຜີຍ​ແຜ່​ໂດຍ: admin|ຢ້ຽມ​ຊົມ: 179 ຄັ້ງ | ເວ​ລາ | 2023-04-09 23:59:00

ຊຳຊຸງ ຈັດພິທີເປີດ “ສູນນະວັດຕະກຳ” ຫຼື “Samsung Innovation Campus” ທີ່ຄະນະວິທະຍາສາດທຳມະຊາດ ມະຫາວິທະຍາໄລແຫ່ງຊາດ (ມຊ) ເປັນແຫ່ງທຳອິດໃນລາວ ຊຶ່ງນີ້ແມ່ນໜຶ່ງໃນໂຄງການເພື່ອສັງຄົມ ທີ່ຖືກຈັດຂຶ້ນທົ່ວໂລກ ທັງໃນອາເມຣິກາ, ເອີຣົບ ແລະ ອາຊີ. ສູນນະວັດຕະກຳນີ້ ຈະເສີມຂະຫຍາຍຄວາມຮູ້ກ່ຽວກັບນະວັດຕະກຳເຕັກໂນໂລຊີໃຫ້ຊາວໜຸ່ມລາວ.

ການລິເລີ່ມໂຄງການດັ່ງກ່າວ ໄດ້ຈັດຂຶ້ນໃນວັນທີ 21 ມີນາ ຜ່ານມາ ດ້ວຍການລົງນາມໃນບົດບັນທຶກຂໍ້ຕົກລົງ ແລະ ສົ່ງມອບສູນນະວັດຕະກຳ ຢ່າງເປັນທາງການ ລະຫວ່າງ ທ່ານ ແຫຼມທອງ ລັດດາວົງ ຄະນະບໍດີ ຄະນະວິທະຍາສາດທໍາມະຊາດ ແລະ ທ່ານ ຊັງ ໂຮໂຈ (Sang Ho Jo) ປະທານກຳມະການບໍລິຫານ ປະຈໍາອາຊີຕາເວັນອອກສ່ຽງໃຕ້ ແລະ ໂອເຊຍເນຍ ບໍລິສັດ ຊໍາຊຸງອີເລັກໂຕຣນິກ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ຊູງຮີ ປາກ (Seunghee Park) ປະທານ ດ້ານການພົວພັນອົງກອນ ຂອງ ຊຳຊຸງອີເລັກໂຕຣນິກ, ແລະ ມີ ທ່ານ ຢຸງ ຊູ ຈຸງ (Yung Soo Jung) ເອກອັກຄະລັດຖະທູດ ແຫ່ງ ສ ເກົາຫຼີ ປະຈໍາ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມພິທີ.

ທ່ານ ພຸດ ສິມມາລາວົງ ໄດ້ກ່າວວ່າ: ການສ້າງສູນດັ່ງກ່າວ, ຖືເປັນການລິເລີ່ມ ແລະ ບາດກ້າວທີ່ສຳຄັນ ໃນການຖ່າຍທອດຄວາມຮູ້ຂັ້ນສູງ ຈາກປະສົບການຂອງຊໍາຊຸງ ໃຫ້ແກ່ນັກຮຽນນັກສຶກສາລາວເຮົາ, ເພື່ອໃຫ້ພວກເຂົາສາມາດເຂົ້າເຖິງຄວາມຮູ້ການນຳໃຊ້ຕົວຈິງ ແລະ ນຳໄປພັດ ທະນາເສັ້ນທາງສາຍອາຊີບຂອງພວກເຂົາໃນອະນາຄົດ.”

ທ່ານ ຊູງຮີ ປາກ ໄດ້ກ່າວວ່າ: ໂຄງການ “ສູນນະວັດຕະກຳຊໍາຊຸງ” ມີຈຸດປະສົງເພື່ອກຽມຄວາມພ້ອມໃຫ້ນັກຮຽນໃນຂອບເຂດທົ່ວປະເທດ ຊຶ່ງຈະໃຫ້ທັກສະທີ່ສາມາດນຳໃຊ້ໄດ້ໃນຕົວຈິງ ແລະ ມີ ຄວາມເຂົ້າໃຈກ່ຽວກັບເຕັກໂນໂລຊີຮຸ່ນໃໝ່ ທີ່ຈະຊ່ວຍສົ່ງເສີມອະນາຄົດຂອງພວກເຂົາ. ການຮ່ວມມື ຈະໄດ້ສະໜອງດ້ານພື້ນຖານໂຄງລ່າງ, ເຄື່ອງມື, ເຟີນິເຈີ, ການດຳເນີນການ ແລະ ລວມໄປເຖິງການພັດທະນາຫຼັກສູດສໍາລັບນັກສຶກສາ ເພື່ອໃຫ້ແນ່ໃຈວ່າໂຄງການນີ້ ຈະສາມາດເສີມສ້າງຄວາມຮູ້ ແລະ ຄວາມເຂົ້າໃຈທາງດ້ານດີຈີຕອນຂອງຊາວໜຸ່ມລາວ, ສົ່ງເສີມຄົນຮຸ່ນຕໍ່ໆໄປ ເພື່ອການພັດທະນາຂອງ ສປປ ລາວ. ການເຊັນບົດບັນທຶກຂໍ້ຕົກລົງຄັ້ງນີ້, ເປັນຂີດໝາຍໃນການລິເລີ່ມໂຄງການດັ່ງກ່າວຢ່າງເປັນທາງການ ໄດ້ເກີດຂຶ້ນໄດ້ຢ່າງລາບລື້ນ ແລະ ປະສົບຜົນສຳເລັດ.

ທ່ານ ຢຸງ ຊູ ຈຸງ ກໍໄດ້ເນັ້ນໜັກວ່າ: ສ ເກົາຫຼີ ແລະ ສປປ ລາວ ນັບມື້ນັບມີຄວາມເຂັ້ມແຂງໃນທຸກໆຂະແໜງການ ຊຶ່ງປະເທດລາວ ຖືເປັນປະເທດ ທີ່ມີປະຊາກອນໜຸ່ມຫຼາຍທີ່ສຸດ ໃນອາຊີຕາເວັນອອກສ່ຽງໃຕ້ ແລະ ເຕັມໄປດ້ວຍທ່າແຮງດ້ານນະວັດຕະກຳ. ດັ່ງນັ້ນ, ພວກເຮົາສາມາດເວົ້າໄດ້ວ່າ ມັນມີຄວາມເປັນໄປໄດ້ສຳລັບແນວຄວາມຄິດແບບໃໝ່ໆ. ປັດຈຸບັນ, ຊໍຊຸງ ກໍາລັງວາງແຜນທີ່ຈະສະໜອງຫຼັກສູດກ່ຽວກັບການຂຽນລະຫັດ ແລະ ການຂຽນໂປຣແກຣມໃຫ້ແກ່ນັກສຶກສາຂອງ ມ.ຊ ໃນປີ 2023 ນີ້ ປະມານ 30 ຄົນ. ໂດຍການຖ່າຍທອດຄວາມຮູ້ ແລະ ປະສົບການກ່ຽວກັບ ITC, ຊໍາຊຸງ ມຸ່ງຫວັງທີ່ຈະເປັນສ່ວນໜຶ່ງທີ່ສຳຄັນ ໃນການສ້າງຜູ້ຊ່ຽວຊານດ້ານໄອທີ ຂອງລາວ. ຂ້າພະເຈົ້າຫວັງວ່າໃນອະນາຄົດອັນໃກ້ນີ້, ຜູ້ຊ່ຽວຊານໄວໜຸ່ມນ້ອຍ ຂອງ ສ ເກົາຫຼີ ແລະ ສປປ ລາວ, ຈະສາມັກຄີກັນນຳເອົາການປ່ຽນແປງໃນທາງທີ່ດີມາສູ່ປະຊາຊົນລາວ.

ໃນພິທີດັ່ງກ່າວ, ຊຳຊຸງ ຍັງໄດ້ກ່າວເຖິງທ່າແຮງ ແລະ ຄວາມເຂັ້ມແຂງຂອງ ເມືອງປູຊານ ໃນການເປັນເຈົ້າພາບຈັດງານ World Expo 2030 ພາຍໃຕ້ຄຳຂວັນ "Transforming Our World, Navigating towards a Better Future" ເຊັ່ນກັນ. ບໍລິສັດ ຊຳຊຸງ ອີເລັກໂຕຣນິກເປັນໜຶ່ງໃນຄະນະກໍາມະການ ໃນການຄັດເລືອກໃນງານ World Expo 2030 ທີ່ ປູຊານ, ສະໜັບສະ ໜູນ ສ ເກົາຫຼີ ໃນການເປັນເຈົ້າພາບງານ World Expo 2030 ໃນຖານະພາກສ່ວນເອກະຊົນ ຊຶ່ງງານດັ່ງກ່າວນັ້ນ ຈະມີບົດບາດສໍາຄັນ ໃນການເຮັດໃຫ້ຜູ້ຄົນສາມາດເຂົ້າເຖິງເຕັກໂນໂລຊີ ແລະ ນະວັດຕະກໍາຊັ້ນນໍາ ຫຼາຍຍິ່ງຂຶ້ນ.

(ຂ່າວ: ສຸກສະຫວັນ, ພາບ: ສອນທະວີ)