ສານສະແດງຄວາມເສົ້າສະຫຼົດໃຈຈາກປະທານາທິບໍດີ ຣັດເຊຍ

​|ຢ້ຽມ​ຊົມ: 18 ຄັ້ງ | ເວ​ລາ | 2025-04-06 05:08:35

ໃນວັນທີ 3 ເມສາ ຜ່ານມາ ນີ້, ທ່ານ ວາລາດີເມຍ ປູຕິນ ປະທານາທິບໍດີ ແຫ່ງ ສ ຣັດເຊຍ ໄດ້ສົ່ງສານສະແດງຄວາມເສົ້າສະຫຼົດໃຈ ເຖິງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ຕໍ່ການມໍລະນະກໍາຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ ອະດີດປະທານປະເທດ ແຫ່ງ ສປປ ລາວ.

ເນື້ອໃນສານ ໄດ້ລະບຸວ່າ: ຂ້າພະເຈົ້າ ຂໍສະແດງຄວາມເສຍໃຈຢ່າງສຸດຊຶ້ງ ຕໍ່ການເສຍຊີວິດຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກປະຊາຊົນ ປະຕິວັດລາວອະດີດປະທານເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.

ບັນດາເຫດການສຳຄັນໃນປະຫວັດສາດສະໄໝໃໝ່ຂອງ ສປປ ລາວ ແມ່ນຕິດພັນກັບຊື່ສຽງຂອງນັກການເມືອງທີ່ໂດດເດັ່ນ ຊຶ່ງ ທ່ານ ພົນເອກ ຄຳໄຕ ສີພັນດອນ ກໍແມ່ນໜຶ່ງໃນບັນດາຜູ້ນຳທີ່ໄດ້ຕໍ່ສູ້ເພື່ອປະເທດຊາດ ແລະ ໄດ້ປະກອບສ່ວນຕົນຢ່າງໃຫຍ່ຫຼວງ ໃນການສະຖາປະນາ ສປປ ລາວ.

ສະຫະພັນຣັດເຊຍ ຈະຈົດຈຳຄຸນງາມຄວາມດີຂອງທ່ານ ໃນຖານະທີ່ເປັນຜູ້ນຳ ໃຫ້ການສະໜັບສະໜູນ ແບບສະເໝີຕົ້ນສະເໝີປາຍຜູ້ໜຶ່ງ ຕໍ່ການພັດທະນາການພົວພັນເພື່ອນມິດ ລະຫວ່າງ ສອງປະເທດພວກເຮົາ ຊຶ່ງປະກອບສ່ວນຢ່າງໃຫຍ່ຫຼວງ ຕໍ່ການຮັດແໜ້ນການຮ່ວມມືສອງຝ່າຍ ແບບຕ່າງຝ່າຍຕ່າງໄດ້ຮັບຜົນປະໂຫຍດ.

ຂ້າພະເຈົ້າ ຂໍສົ່ງຄວາມເຫັນໃຈຢ່າງສຸດຊຶ້ງ ແລະ ແບ່ງເບົາຄວາມທຸກໂສກ ມາຍັງຄອບຄົວ ແລະ ເພື່ອນມິດຂອງ ທ່ານອະດີດປະທານປະເທດ ກໍຄື ຕໍ່ປວງຊົນລາວທັງຊາດ.