ພາວະຜູ້ນຳ

ມອບໂອນວຽກ-ບຸກຄະລາກອນ ສູນສະຖິຕິ ຂຶ້ນກັບພະແນກ ຜທ ສາລະວັນ

ເຜີຍແຜ່ໂດຍ: admin ເວລາ | 2022-12-16 01:14:00 ອັບເດດຄັ້ງລ້າສຸດ ໂດຍ: admin ເວລາ 2024-11-21 23:33:18 ຢ້ຽມຊົມ: 85 ຄັ້ງ

ໃນວັນທີ 5 ເມສາ ນີ້, ສູນສະຖິຕິ ແຂວງສາລະວັນ ໄດ້ຈັດພິທີປະກາດໂອນວຽກ ແລະ ພະນັກງານ-ລັດຖະກອນ ຂອງສູນສະຖິຕິປະຈໍາແຂວງສາລະວັນ ໄປຂຶ້ນກັບພະແນກແຜນການ ແລະ ການລົງທຶນ (ຜທ )ແຂວງ, ໂດຍການລົງນາມເຊັນບົດບັນທຶກຂອງ ທ່ານ ຄຳກິ່ງ ແກ້ວສຸພັນ ຫົວໜ້າສູນສະຖິຕິປະຈຳແຂວງ ຮອງຫົວໜ້າພະແນກ ຜກ ແຂວງ ກັບ ທ່ານ ໂພສີ ແກ້ວສີພັນດອນ ກໍາມະການພັກແຂວງ ຫົວໜ້າພະແນກ ຜກ ແຂວງ, ໂດຍການເຂົ້າຮ່ວມຂອງ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງແນວຄິດ, ວຽກພັກ-ພະນັກງານ, ມີບັນດາຫົວໜ້າ, ຮອງພະແນກການ, ອົງການທຽບເທົ່າອ້ອມຂ້າງແຂວງ, ເມືອງ ແລະ ສູນສະຖິຕິ 8 ເມືອງເຂົ້າຮ່ວມເປັນສັກຂີພິຍານ. ໂດຍປະຕິບັດຕາມມະຕິຕົກລົງຂອງຄະນະປະຈຳພັກແຂວງສາລະວັນ ເລກທີ 734/ຄຈພຂ.ສວ ວ່າດ້ວຍການມອບໂອນວຽກສູນສະຖິຕິ ປະຈຳແຂວງ, ຂໍ້ຕົກລົງຂອງທ່ານເຈົ້າແຂວງສາລະວັນ ເລກທີ 185/ຈຂ.ສວ ວ່າດ້ວຍການໂອນພະນັກງານ-ລັດຖະກອນ ໄປຂຶ້ນກັບພະແນກ ຜທ ແຂວງສາລະວັນ.

ໃນພິທີ, ທ່ານ ຄຳກິ່ງ ແກ້ວສຸພັນ ກໍໄດ້ລາຍງານສະພາບລວມ, ພາລະບົດບາດ, ໜ້າທີ່ຂອງຕົນໃນການເກັບກໍາຂໍ້ມູນ, ສັງລວມ, ວິເຄາະວິໄຈ ແລະ ເຜີຍແຜ່, ສະໜອງຂໍ້ມູນສະຖິຕິທາງການກ່ຽວກັບການພັດທະນາເສດຖະກິດ-ສັງຄົມ ໃຫ້ແກ່ອົງການຈັດຕັ້ງຂອງພັກ-ລັດ ເພື່ອຄົ້ນຄວ້າ, ວາງແຜນນະໂຍບາຍຕ່າງໆ ແລະ ເປັນໃຈກາງປະສານງານລະຫວ່າງພະແນກການຕ່າງໆ, ເມືອງ, ທັງໄດ້ລາຍງານການເຄື່ອນໄຫວຜ່ານມາ ເຖິງຜົນສຳເລັດທີ່ສາມາດຈັດຕັ້ງປະຕິບັດໄດ້ຕາມລະດັບຄາດໝາຍທີ່ວາງໄວ້ ໂດຍສະເພາະວຽກງານທີ່ມີຄວາມພົ້ນເດັ່ນທາງດ້ານວິຊາສະເພາະ ເຊັ່ນ: ວຽກນິຕິກຳ, ການຜະລິດຂໍ້ມູນສະຖິຕິທາງການ, ວຽກພັດທະນາພື້ນຖານໂຄງລ່າງ, ຄວາມອາດສາມາດ ແລະ ການຮ່ວມມືໃນລະດັບພາກພື້ນ ແລະ ສາກົນ. ນອກນັ້ນກໍໄດ້ລາຍງານກ່ຽວກັບການຄຸ້ມຄອງພະນັກງານ-ລັດຖະກອນ, ດ້ານງົບປະມານ, ພາຫະນະ ແລະ ອຸປະກອນທີ່ນຳໃຊ້ເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນ, ພ້ອມທັງໄດ້ຜ່ານບັນດາຄາດໝາຍ ການຈັດຕັ້ງປະຕິບັດວຽກງານຕ່າງໆໃນຕໍ່ໜ້າ ເປັນຕົ້ນບັນດາທິດທາງແຜນການຈຸດສຸມຂອງວຽກງານ, ແຜນສືບຕໍ່ ແລະ ອື່ນໆ.

(ຂ່າວ-ພາບ: ວິໄລວອນ ສິດທິໄຊ)