ພາວະຜູ້ນຳ

ສະເຫຼີມສະຫຼອງວັນສ້າງຕັ້ງແຂວງ ບໍ່ແກ້ວ ຄົບຮອບ 40 ປີ ຢ່າງຄຶກຄື້ນ

ເຜີຍແຜ່ໂດຍ: admin ເວລາ | 2023-04-09 16:43:27 Responsive image

ພິທີໂຮມຊຸມນຸມໃຫຍ່ ສະເຫຼີມສະຫຼອງວັນສ້າງຕັ້ງແຂວງ ບໍ່ແກ້ວ ຄົບຮອບ 40 ປີ (26 ມີນາ 1983-26 ມີນາ 2023) ໄດ້ຈັດຂຶ້ນຢ່າງຄຶກຄື້ນ ໃນວັນທີ 26 ມີນານີ້ ທີ່ເດີນກິລາປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ໂດຍໃຫ້ກຽດເຂົ້າຮ່ວມ ຂອງ ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ, ທ່ານ ຄຳພັນ ເຜີຍຍະວົງ ຄະນະເລຂາ ທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ, ທ່ານ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງບໍ່ແກ້ວ, ມີການນຳພັກ-ລັດ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ບົວຄົງ ນາມມະວົງ ໄດ້ຍົກໃຫ້ເຫັນປະຫວັດຄວາມເປັນມາແຫ່ງການສ້າງຕັ້ງແຂວງບໍ່ແກ້ວແຕ່ລະໄລຍະ, ການເຕີບໃຫຍ່ຂະຫຍາຍຕົວ ແລະ ເຂັ້ມແຂງຈົນເຖິງປັດຈຸບັນ, 40 ປີ ແຫ່ງການສ້າງຕັ້ງແຂວງບໍ່ແກ້ວ ພາຍໃຕ້ການນໍາພາຂອງພັກ, ຄະນະພັກ-ຄະນະນຳແຂວງ ໄດ້ເອົາໃຈໃສ່ນຳພາ-ຊີ້ນຳທຸກອົງການຈັດຕັ້ງ, ຂະແໜງການ ຕະຫຼອດຮອດປະຊາຊົນຊາວແຂວງບໍ່ແກ້ວ ມີຄວາມສາມັກຄີເປັນປຶກແຜ່ນແໜ້ນໜາ ກາຍເປັນກ້ອນກໍາລັງຢ່າງແຂງແຮງ ເຂົ້າໃນການປົກປັກຮັກສາ ແລະ ສ້າງສາພັດທະນາແຂວງບໍ່ແກ້ວ ພວກເຮົາໄດ້ພ້ອມກັນຜ່ານຜ່າອຸປະສັກຂໍ້ຫຍຸ້ງຍາກ, ສິ່ງທ້າທາຍ ທົດສອບຫຼາຍດ້ານ ບົນຈິດໃຈເອກະລາດ, ເປັນເຈົ້າຕົນເອງ, ເພິ່ງຕົນເອງ ແລະ ມານະຈິດບຸກບືນ ປະຕິວັດ, ສ້າງຄວາມເຂັ້ມແຂງດ້ວຍຕົນເອງ ຂອງຊາວແຂວງບໍ່ແກ້ວ ເຮັດໃຫ້ແຂວງບໍ່ແກ້ວຂອງພວກເຮົາບັນລຸໄດ້ຜົນສໍາເລັດທີ່ສໍາຄັນໜ້າພາກພູມໃຈໃນຫຼາຍດ້ານ: ເປັນຕົ້ນແມ່ນແຂວງບໍ່ແກ້ວ ມີສະຖຽນລະພາບທາງດ້ານການເມືອງ, ສາມາດແກ້ໄຂຄວາມບໍ່ສະຫງົບທີ່ແກ່ຍາວມາຫຼາຍປີ ກາຍເປັນແຂວງທີ່ມີຄວາມສະຫງົບນັບມື້ນັບໜັກແໜ້ນ, ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງ, ພື້ນຖານໂຄງລ່າງ ໄດ້ຮັບການກໍ່ສ້າງຂຶ້ນເປັນຈໍານວນຫຼວງຫຼາຍ ນັບທັງຢູ່ຕົວເມືອງ ແລະ ຊົນນະບົດ, ຊີວິດການເປັນຢູ່ຂອງປະຊາຊົນນັບມື້ດີຂຶ້ນ, ທຸກການຈັດຕັ້ງ ທັງພັກ-ລັດ, ກໍາລັງປະກອບອາວຸດ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນໄດ້ເຕີບໃຫຍ່ເຂັ້ມແຂງ.

ທ່ານກ່າວຕື່ມວ່າ: ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງ, ໃນປີ 2022 ລວມຍອດຜະລິດຕະພັນພາຍໃນ (GDP) ບັນລຸໄດ້ 3.545,41 ຕື້ກີບ, ເສດຖະກິດຂະຫຍາຍຕົວຢູ່ໃນລະດັບ 3,3%, ສະເລ່ຍລາຍຮັບ 1.010,66 ໂດລາ/ຄົນ/ປີ, ລວມຍອດຜະລິດຕະພັນກະສິກໍາກວມເອົາ 37,01% ຂອງ GDP, ອຸດສາຫະກໍາກວມເອົາ 20,01% ຂອງ GDP, ການບໍລິການກວມເອົາ ກວມເອົາ 42,98% ຂອງ GDP, ລະບົບພື້ນຖານໂຄງລ່າງ ຖະໜົນຫົນທາງ, ໄຟຟ້ານໍ້າປະປາ, ນໍ້າລິນ ນໍ້າສະອາດ ໄດ້ຮັບການພັດທະນາດີຂຶ້ນເປັນກ້າວໆ, ປັດຈຸບັນ ບ້ານທີ່ມີເສັ້ນທາງເຂົ້າເຖິງຈໍານວນ 246 ບ້ານ ກວມ 99,19% ຂອງຈໍານວນບ້ານທົ່ວແຂວງ, ບ້ານທີ່ໄດ້ຊົມໃຊ້ໄຟຟ້າມີ 241 ບ້ານ ກວມ 97,18%, ບ້ານທີ່ໄດ້ໃຊ້ນໍ້າປະປາ ແລະ ໃຊ້ນໍ້າລິນສະອາດ ມີຈໍານວນ 246 ບ້ານ, ກວມ 99,19%, ສັນຍານໂທລະສັບເຂົ້າເຖິງ 246 ບ້ານ ກວມ 99,19%, ການລົງທຶນຂອງພາກເອກະຊົນພາຍໃນ ແລະ ຕ່າງປະເທດນັບມື້ຫຼາຍຂຶ້ນ ທົ່ວແຂວງມີຫົວໜ່ວຍວິສະຫະກິດທັງໝົດ 5.945 ຫົວໜ່ວຍ, ມູນຄ່າຈົດທະບຽນທັງໝົດ 3.780,99 ຕື້ກີບ, ມີເຂດເສດຖະກິດພິເສດສາມຫຼ່ຽມຄໍາ ເປັນການລົງທຶນຂະໜາດໃຫຍ່ຂອງຕ່າງປະເທດ, ວຽກງານກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດແກ້ໄຂຄວາມທຸກຍາກຂອງປະຊາຊົນຕາມ 4 ເນື້ອໃນ, 4 ຄາດໝາຍ ແລະ ວຽກງານ 3 ສ້າງ ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ, ການຊຸກຍູ້, ຂະບວນການຜະລິດກະສິກໍາເປັນສິນຄ້າ ຂອງປະຊາຊົນໄດ້ຂະຫຍາຍຕົວຢ່າງກວ້າງຂວາງ, ສາມາດລົບລ້າງຄອບຄົວທຸກຍາກໄດ້ 27.242 ຄອບຄົວ ກວມເອົາ 79,54%; ລົບລ້າງບ້ານທຸກຍາກໄດ້ 188 ບ້ານ ກວມ 75,81%; ສ້າງບ້ານພັດທະນາຮອບດ້ານໄດ້ 124 ບ້ານກວມເອົາ 50% ຂອງຈຳນວນບ້ານທັງໝົດ; ສ້າງໄດ້ເມືອງພົ້ນທຸກ 2 ເມືອງ ແລະ ສ້າງບ້ານໃຫຍ່ເປັນຕົວເມືອງໃນຊົນນະບົດໄດ້ 3 ບ້ານຈຸດສຸມຄື: ຈຸດສຸມບ້ານໃຫຍ່ນໍ້າເກິ່ງ, ຈຸດສຸມບ້ານດ່ານຖິ່ນ ແລະ ຈຸດສຸມບ້ານໃຫຍ່ສີເມືອງງາມ ແລະ ວຽກງານອື່ນໆ ກໍຂະຫຍາຍຕົວເປັນກ້າວໆ.

ໂອກາດດັ່ງກ່າວ ທ່ານ ບຸນທອງ ຈິດມະນີ ໄດ້ມີຄຳເຫັນບາງຕອນວ່າ: ພວກເຮົາມີຄວາມເອກອ້າງທະນົງໃຈ ທີ່ເຫັນວ່າຕະຫຼອດໄລຍະ 40 ປີທີ່ຜ່ານມາ ດ້ວຍຄວາມບຸກບືນສູ້ຊົນ ຂອງປະຊາຊົນບັນດາເຜົ່າທົ່ວແຂວງບໍ່ແກ້ວ ພາຍໃຕ້ການນຳພາຂອງອົງຄະນະພັກແຂວງ ເຮັດໃຫ້ແຂວງບໍ່ແກ້ວ ຍາດໄດ້ຜົນສຳເລັດອັນໃຫຍ່ຫຼວງ ທີ່ໜ້າພາກພູມໃຈ. ແຕ່ທຽບໃສ່ຄວາມຮຽກຮ້ອງຕ້ອງການໃນໄລຍະໃໝ່ແລ້ວ ເຫັນວ່າຍັງຕ້ອງອອກແຮງສືບຕໍ່ບຸກບືນສູ້ຊົນຕື່ມ, ຕັ້ງໜັ້າບຸກທະລຸທາງດ້ານແນວຄິດຈິນຕະນາການຢ່າງເລິກເຊິ່ງທົ່ວເຖິງ, ເພີ່ມທະວີຄວາມສາມັກຄີເປັນປຶກແຜ່ນພາຍໃນ, ເສີມຂະຫຍາຍຈິດໃຈຮັກຊາດ, ຮັກລະບອບໃໝ່, ເຊີດຊູຈິດໃຈເອກະລາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ ພ້ອມກັນສຸມໃສ່ຄົ້ນຄ້ວາ, ຂຸດຄົ້ນທ່າແຮງບົ່ມຊ້ອນພາຍໃນແຂວງຢ່າງສຸດຂີດ ມີສະຕິຄວາມເປັນເຈົ້າຕໍ່ການພົວພັນຮ່ວມມືກັບຕ່າງປະເທດຕາມແນວທາງຂອງພັກ-ລັດ ເພື່ອສ້າງໃຫ້ມີກຳລັງແຮງໃນການຊຸກຍູ້ການຜະລິດສິນຄ້າ, ຫັນປ່ຽນຈາກເສດຖະກິດທຳມະຊາດໄປສູ່ເສດຖະກິດສິນຄ້າ, ປັບປຸງສັງຄົມບໍລິໂພກ ໃຫ້ກາຍເປັນສັງຄົມການຜະລິດໃຫ້ຫຼາຍຂຶ້ນ, ປັບປຸງປ່ຽນແປງແບບແຜນທຳມາຫາກິນ, ສ້າງຖ່ວງທ່າ ແລະ ພື້ນຖານອັນໜັກແໜ້ນ ເພື່ອເຮັດໃຫ້ແຂວງບໍ່ແກ້ວ ສືບຕໍ່ພັດທະນາຢ່າງບໍ່ຢຸດຢັ້ງ.

ທ່ານກ່າວຕື່ມວ່າ: ແຕ່ນີ້ຮອດປີ 2025 ເຫັນວ່າແຂວງບໍ່ແກ້ວ ຈະຕ້ອງສູ້ຊົນສ້າງທຸກເງື່ອນໄຂຍູ້ເສດຖະກິດໃຫ້ຂະຫຍາຍຕົວດີຂຶ້ນ ໂດຍສຸມໃສ່ຈັດຕັ້ງປະຕິບັດ ບັນດາແຜນງານໃຫຍ່, ບັນດາໂຄງການບຸລິມະສິດ ໃຫ້ມີການຈັດຕັ້ງປະຕິບັດທຸກແຜນວຽກ ແລະ ໂຄງການຕ່າງໆ ທີ່ໄດ້ກໍານົດໄວ້ໃນມະຕິກອງປະຊຸມໃຫຍ່ ຄັ້ງທີ VI ຂອງແຂວງ ໃຫ້ມີຜົນສໍາເລັດຢ່າງແທ້ຈິງ, ການແກ້ໄຂຄອບຄົວທຸກຍາກໃນທົ່ວແຂວງ ໃຫ້ໄດ້ໂດຍພື້ນຖານ. ສ້າງໃຫ້ແຂວງບໍ່ແກ້ວ ໃຫ້ມີພື້ນຖານໂຄງລ່າງເສດຖະກິດ-ເຕັກນິກ, ວັດທະນະທຳ, ວິທະຍາສາດ ແລະ ບຸກຄະລາກອນ ເພື່ອຮອງຮັບການຊຸກຍູ້ພາລະກິດການຫັນເປັນອຸດສາຫະກຳ ແລະ ທັນສະໄໝໃນອະນາຄົດ, ໄປຄຽງຄູ່ກັບການພັດທະນາເສດຖະກິດ, ວຽກງານວັດທະນະທຳ-ສັງຄົມ ກໍຕ້ອງສືບຕໍ່ບຸກທະລຸ ທາງດ້ານການພັດທະນາຊັບພະຍາກອນມະນຸດ, ແນໃສ່ສ້າງຄວາມສີວິໄລທາງດ້ານວັດທະນະທຳ ແລະ ຈິດໃຈ; ແກ້ໄຂປະກົດການຫຍໍ້ທໍ້ຕ່າງໆທາງສັງຄົມຢ່າງເດັດຂາດ; ແກ້ໄຂຄວາມແຕກໂຕນກັນລະຫວ່າງຕົວເມືອງກັບຊົນນະບົດ, ລະຫວ່າງຊັ້ນຄົນຕ່າງໆ ແລະ ຮັບປະກັນຄວາມຍຸຕິທຳໃນສັງຄົມ ໃຫ້ນັບມື້ນັບດີຂຶ້ນ.

ໃນພິທີດັ່ງກ່າວ ຍັງໄດ້ປະດັບຫຼຽນໄຊອິດສະຫຼະຊັ້ນ III ໃຫ້ແກ່ແຂວງບໍ່ແກ້ວທີ່ມີຜົນງານດີເດັ່ນປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາແຂວງບໍ່ແກ້ວຕະຫຼອດໄລຍະຜ່ານມາ, ໂດຍໃຫ້ກຽດປະດັບຫຼຽນ ຂອງ ທ່ານ ບຸນທອງ ຈິດມະນີ.

(ຂ່າວ+ພາບ: ສຳນານ)