4 ຄາດໝາຍສູ້ຊົນຂອງອົງການກວດກາແຫ່ງລັດ

​ເຜີຍ​ແຜ່​ໂດຍ: admin|ຢ້ຽມ​ຊົມ: 2 ຄັ້ງ | ເວ​ລາ | 2026-06-28 04:13:23

4 ຄາດໝາຍສູ້ຊົນຂອງອົງການກວດກາແຫ່ງລັດ

……………………………………………………………………….

(ສພຊ) - ຕອນບ່າຍວັນທີ 25 ມີນາຜ່ານມາ, ທ່ານ ວັນໄຊ ພອງສະຫວັນ ປະທານອົງການກວດກາແຫ່ງລັດ ໄດ້ລາຍງານຫຍໍ້ທິດທາງວຽກງານ 5 ປີ (2026-2030) ຂອງອົງການກວດກາແຫ່ງລັດ ຕໍ່ກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ X ເຊິ່ງມີຄາດໝາຍສູ້ຊົນ 4 ດ້ານ ຄື:

1. ການເສີມສ້າງລະບົບກວດກາ: ສືບຕໍ່ປັບປຸງ ແລະ ພັດທະນາກົນໄກການກວດກາ ໃຫ້ຄົບຖ້ວນ ແລະ ທັນສະໄໝ ໂດຍການປັບປຸງກົດໝາຍ, ລະບຽບ ແລະ ຂໍ້ກໍານົດຕ່າງໆ ໃຫ້ສອດຄ່ອງກັບສະພາບການພັດທະນາເສດຖະກິດ-ສັງຄົມ, ໃຫ້ວຽກງານກວດກາເປັນກົນໄກສໍາຄັນໃນການຄຸ້ມຄອງລັດ ໃຫ້ໂປ່ງໃສມີປະສິດທິພາບ.

2. ການຍົກສູງປະສິດທິຜົນຂອງວຽກງານກວດກາ:

- ການກວດກາໃຫ້ຄວບຄຸມໃນທຸກຂົງເຂດວຽກງານການຄຸ້ມຄອງບໍລິຫານລັດທຸກຂັ້ນ;

- ຕິດຕາມກວດກາຄວາມຮັບຜິດຊອບການເມືອງ ຫຼື ການປະຕິບັດໜ້າທີ່ທີ່ໄດ້ຮັບມອບໝາຍ, ກວດກາການນໍາໃຊ້ສິດອໍານາດຂອງຜູ້ນໍາພາ ແລະ ຄຸ້ມຄອງບໍລິຫານລັດທຸກຂັ້ນ ດ້ວຍການແບ່ງຄວາມຮັບຜິດຊອບຢ່າງຈະແຈ້ງ;

- ເນັ້ນການກວດກາໃຫ້ເຂົ້າສູ່ລວງເລິກ, ກວດກາຂົງເຂດສໍາຄັນ, ຂົງເຂດທີ່ມີຄວາມສ່ຽງ ເຊັ່ນ: ໂຄງການພັດທະນາຂອງລັດໃນຂົງເຂດຕ່າງໆ, ການຄຸ້ມຄອງ ແລະ ນໍາໃຊ້ຊັບສິນສາທາລະນະ, ການຄຸ້ມຄອງການເງິນ ແລະ ການນໍາໃຊ້ງົບປະມານ;

- ແກ້ໄຂຜົນຂອງການກວດກາໃຫ້ວ່ອງໄວຖືກຕ້ອງຕາມລະບຽບກົດໝາຍ, ເກັບກູ້ເອົາຊັບສິນ ແລະ ງົບປະມານທີ່ຕົກເຮ່ຍເສຍຫາຍ ເຂົ້າງົບປະມານຂອງລັດ.

3. ການປ້ອງກັນ ແລະ ຕ້ານການສໍ້ລາດບັງຫຼວງ:

- ສືບຕໍ່ໂຄສະນາເຜີຍແຜ່ກົດໝາຍ, ຂໍ້ກໍານົດ, ລະບຽບການຕ່າງໆ ເພື່ອປູກຈິດສໍານຶກໃຫ້ພະນັກງານ, ສະມາຊິກພັກ ແລະ ປະຊາຊົນ ເຂົ້າໃຈເຖິງຜົນຮ້າຍຂອງການສໍ້ລາດບັງຫຼວງ ແລະ ເຂົ້າຮ່ວມໃນຂະບວນການຕ້ານການສໍ້ລາດບັງຫຼວງໃຫ້ກວ້າງຂວາງ;

- ເຜີຍແຜ່ໃຫ້ການຈັດຕັ້ງ, ປະຊາຊົນ ແລະ ສັງຄົມ ຮັບຊາບຜົນຂອງການກວດກາຕາມຄວາມເໝາະສົມ;

- ສ້າງເງື່ອນໄຂໃຫ້ທຸກການຈັດຕັ້ງ, ສະມາຊິກພັກ, ພະນັກງານ, ສື່ມວນຊົນ ແລະ ປະຊາຊົນ ເຂົ້າຮ່ວມວຽກງານຕິດຕາມ, ກວດກາຢ່າງຕັ້ງໜ້າ.

4. ການພັດທະນາຄະນະກວດກາ ແລະ ພະນັກງານກວດກາ:

- ພັດທະນາວຽກງານກວດກາໃຫ້ມີຄວາມເຂັ້ມແຂງ, ໂປ່ງໃສ, ທັນສະໄໝ ແລະ ມີປະສິດທິຜົນ;

- ຍົກລະດັບຄຸນນະພາບຂອງພະນັກງານກວດກາ ດ້ວຍການເຝິກອົບຮົມ, ພັດທະນາທັກສະວິຊາການ, ຄວາມເປັນມືອາຊີບ;

- ສ້າງໃຫ້ມີຈັນຍາບັນ, ຈັນຍາທໍາ, ມີວິໄນສູງ, ບໍ່ສວຍໃຊ້ໜ້າທີ່ໃນທາງທີ່ບໍ່ຖືກຕ້ອງໃນການປະຕິບັດໜ້າທີ່ວຽກງານ;

- ນໍາໃຊ້ເຕັກໂນໂລຊີເຂົ້າໃນວຽກງານກວດກາ, ຄຸ້ມຄອງຂໍ້ມູນຫຼັກຖານຜົນຂອງການກວດກາ ເພື່ອໃຫ້ມີຄວາມຊັດເຈນແມ່ນຢໍາ.

ແຫຼ່ງ: ຂ່າວ ຜູ້​ແທນ​ປະ​ຊາ​ຊົນ