ສະພາແຫ່ງຊາດ ສະເໜີ 6 ບັນຫາ ຕໍ່ລັດຖະບານໃນການແກ້ໄຂບັນຫາຢາເສບຕິດ ໃນຕໍ່ໜ້າ

​ເຜີຍ​ແຜ່​ໂດຍ: admin|ຢ້ຽມ​ຊົມ: 4 ຄັ້ງ | ເວ​ລາ | 2026-06-28 06:34:19

ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ 9 ໃນວັນທີ 20 ພະຈິກ 2024 ນີ້, ພາຍໃຕ້ການເປັນ ປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ພົນໂທ ສຸວອນ ເລືອງບຸນມີ ຮອງປະທານສະພາ ແຫ່ງຊາດ ຕາງໜ້າໃຫ້ຄະນະປະຈໍາສະ ພາແຫ່ງຊາດ ໄດ້ຂຶ້ນມີຄໍາເຫັນຕໍ່ບົດ ລາຍງານຂອງລັດຖະບານ ກ່ຽວກັບການ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍສະເໜີ 6 ບັນຫາ ຕໍ່ລັດຖະບານ ໃນການແກ້ໄຂບັນຫາຢາເສບຕິດ ໃນຕໍ່ໜ້າ.

ທ່ານ ພົນໂທ ສຸວອນ ເລືອງບຸນມີ ກ່າວວ່າ: ອີງຕາມມະຕິ ເລກທີ 110/ສພຊ ລົງວັນທີ 21 ພະຈິກ 2023 ໃນໄລຍະປີ 2024 ເຊີ່ງທ່ານໄດ້ເປັນເອກະ ພາບຕາມ ທິດທາງແຜນການຂອງລັດຖະບານ ແຕ່ຄະນະປະຈໍາສະພາແຫ່ງຊາດ ແລະ ມີບາງຄໍາເຫັນເພື່ອໃຫ້ລັດຖະບານພິຈາລະ ນາ ໃນການຈັດຕັ້ງປະຕິບັດ ໂດຍ 6 ບັນຫາ ຕໍ່ລັດຖະບານ ໃນການແກ້ໄຂບັນ ຫາຢາ ເສບຕິດ ໃນຕໍ່ໜ້ານີ້:

1. ສະເໜີໃຫ້ລັດຖະບານ ເອົາໃຈໃສ່ຄົ້ນຄວ້າວິເຄາະ, ວິໄຈ ບັນຫາທີ່ຍັງຄົງຄ້າງ, ເປັນອຸປະສັກ ແລະ ເປັນຂອດອຸດຕັນ ໃນການຈັດຕັ້ງປະຕິບັດວາລະແຫ່ງຊາດ ໃນໄລຍະຜ່ານມາ ໃຫ້ຮູ້ສາເຫດຢ່າງລະອຽດ, ຈະແຈ້ງ ແລ້ວກໍານົດວິທີການ ແລະ ມາດຕະການແກ້ໄຂ ໃຫ້ບັນລຸໃນລະດັບທີ່ແນ່ນອນ ຈຶ່ງຈະສ້າງໄດ້ກຳລັງແຮງອັນແທ້ຈິງ ໃຫ້ແກ່ການສືບຕໍ່ຈັດຕັ້ງປະຕິບັດວາລະແຫ່ງຊາດມວ່າດ້ວຍການແກ້ໄຂບັນຫາຢາເສບຕິດ ແຕ່ນີ້ຫາປີ 2025 ໃຫ້ມີປະສິດທິພາບ ແລະ ປະສິດທິຜົນ.

2. ⁠ສືບຕໍ່ໂຄສະນາສ້າງຄວາມຮັບຮູ້ທາງ ກ້ານກົດໝາຍ ແລະ ຜົນຮ້າຍ ຂອງບັນຫາຢາເສບຕິດ ໃຫ້ທົ່ວເຖິງທຸກເປົ້າໝາຍໃນສັງຄົມ ໂດຍສະເພາະ ແມ່ນບັນດາເປົ້າໝາຍທີ່ເປັນກຸ່ມສ່ຽງ, ບ່ອນຫ່າງໄກສອກຫຼີກ.

3. ⁠ກວດກາຄືນບັນດາກົດໝາຍ ແລະ ນິຕິກຳໃຕ້ກົດໝາຍທີ່ກ່ຽວຂ້ອງ ອັນໃດບໍ່ທັນມີ ຫຼື ບໍ່ທັນສອດຄ່ອງ ໂດຍສະເພາະ ນິຕິກຳທີ່ເປັນບ່ອນອີງໃຫ້ແກ່ການຈັດຕັ້ງປະຕິບັດໂທດຕໍ່ຜູ້ກະທຳຜິດ ກ່ຽສກັບຢາເສບຕິດທີ່ເກີດຂື້ນ, ຂຸ້ນຂ້ຽວສ້າງ ຫຼື ປັບປຸງໃຫ້ສໍາເລັດໂດຍໄວ ເພື່ອຮອງຮັບໃຫ້ແກ່ການຕັດສິນຄະດີ ໄປຕາມກົດໝາຍທີ່ກຳນົດໄວ້.

4. ⁠ເອົາໃຈໃສ່ປັບປຸງ ແລະ ເຝິກອົບຮົມທັກສະການເປັນມືອາຊີບ ໃຫ້ແກ່ກຳລັງ ປກສ ຫຼາຍຂັ້ນ ແລະ ເປັນປົກກະຕິ, ຕໍ່ເນື່ອງ ໂດຍສະເພາະແມ່ນ ປກສ ຂັ້ນເມືອງ, ຂັ້ນບ້ານ; ປະກອບງົບປະມານ, ພາຫະນະ, ອຸປະກອນຮັບໃຊ້ທີ່ຈໍາເປັນ ເພື່ອໃຫ້ເຂົາເຈົ້າສາມາດ ແລະ ເປັນເຈົ້າຕົນເອງ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວນການແກ້ໄຂບັນຫາຢາເສບຕິດ ຢູ່ຂັ້ນຮາກຖານ ໃຫ້ມີປະສິດທິພາບ ແລະ ປະສິດທິຜົນຫຼາຍຂື້ນ,

5. ⁠ເອົາໃຈໃສ່ຕິດຕາມກວດກາ ແລະ ສຶກສາອົບຮົມປະຊາຊົນ ໂດຍສະເພາະ ຢູ່ເຂດຫ່າງໄກສອກຫຼີກ ບໍ່ໃຫ້ລັກລອບປູກຝິ່ນ ແລະ ພືດທີ່ມີສານເສບຕິດ, ທັງຊຸກຍູ້ສົ່ງເສີມ ແລະ ຊ່ວຍເຫຼືອໃຫ້ເຂົາເຈົ້າໄດ້ ເຂົ້າຮ່ວມໂຄງການປູກພືດທົດແທນໃຫ້ຫຼາຍຂື້ນ ແລະ ຫັນເປັນອາຊີບແບບຖາ ວອນໝັ້ນຄົງ, ພ້ອມທັງຕິດຕາມກວດ ດຳເນີນມາດຕະການດ້ານກົດໝາຍ ຕໍ່ຜູ້ສະໜອງທຶນຢູ່ເບື້ອງຫຼັງ ຢ່າງເຂົ້ມງວດ.

6. ⁠ເພີ້ມທະວີຄວາມເປັນເຈົ້າການ ໃນການພົວພັນປະສານສົມທົບ ກັບບັນດາປະເທດໃກ້ຄຽງ ທີ່ມີຊາຍແດນຕິດຈອດກັບ ສປປ ລາວ ໂດຍສະເພາະແມ່ນປະເທດທີ່ຍັງມີພື້ນທີ່ ທີ່ມີຄວາມສ່ຽງໃນການຂົນສົ່ງ, ຄ້າ-ຂາຍ ແລະ ເປັນບ່ອນຜະລິດຢາເສບຕິດ ເພື່ອຊອກວິທີແກ້ໄຂຮ່ວມກັນໃຫ້ຫຼາຍຂື້ນ.

ແຫຼ່ງ: ໜັງ​ສື​ພິມ ກອງ​ທັບ​ປະ​ຊາ​ຊົນ